"கசடற"

"பாலியல் கேள்விகளுக்கு "கசடற"வின் பதில்கள்" - 5

2008-09-23T21:18:00.000-07:00

"பாலியல் கேள்விகளுக்கு "கசடற"வின் பதில்கள்" - 5

"நான் ஒரு பெண். பிற‌ப்புறுப்பில் சில‌ நாட்க‌ளாக அரிப்பு இருந்து வ‌ந்த‌து. டாக்ட‌ரிட‌ம் சென்று ஆலோச‌னை பெற்ற‌தில் விரைவில் ச‌ரியாகிவிடும் என்று சொல்லி ஒரு க்ரீமை த‌ட‌வ‌ச் சொன்னார். ஆனால் த‌ற்போது அரிப்பும் வெள்ளையாக திர‌வ‌ம் போன்ற ஒன்று வ‌டிகிற‌து வாடையுடன் கடந்த 3 நாட்களாக‌. இதுவ‌ரை உட‌லுற‌வு கொண்ட‌தில்லை. அந்த இட‌த்தில் சிறு புள்ளியாய் கிள்ளியெடுத்த‌து போன்று இரு இட‌ங்க‌ளில் இருக்கிற‌து. என்னவெண்று தெரிய‌வில்லை. வ‌லி ஏதும் இல்லை ஆனால் அரிப்பு உள்ள‌து. இத‌ற்கு தீர்வு என்ன‌? ஆலோச‌‌னைக‌ள் சொல்வீர்க‌ளா? ம‌ருந்துக‌ள் ஏதேனும்??
இத‌னால் மிகுந்த ம‌ன‌ வ‌ருத்த‌த்தில் உள்ளேன். வேலையிலும் ஈடுபாடின்றி இருக்கிறேன். கூடிய விரைவில் த‌ங்க‌ளிட‌மிருந்து இத‌ற்கான ப‌திலை ப‌திவின் மூல‌ம் எதிர்நோக்கியுள்ளேன். நன்றிகள் பல‌"

அன்பு சகோதரி!

நீங்கள் கூறியுள்ள குறைந்த பட்சத் தகவல்களை வைத்துப் பார்க்கும் போது, இது ஒன்றும் பயப்படத்தக்க விஷயம் இல்லை எனவே கருதுகிறேன்.

உடலுறவு ஏதும் இல்லை எனச் சொல்வதால், இது ஒரு பால்வினை நோயாக இருக்க வாய்ப்பில்லை.

அரிப்பு, வாடை கலந்த வெள்ளை நிறத் திரவம் என்கையில் இது ஒரு நோய்தான் எனத் தெரிகிறது!

சாதாரணமாக, பெண்களுக்கு பிறப்புறுப்பில் ஒரு வெள்ளை நிறத் திரவம் வரும்

ஆனால், அதில் வாடை இருக்காது.

பாக்டீரியல் வஜைனோஸிஸ் [Bacterial vaginosis], அல்லது க்ளாமைடியா[Chlamydia] கிருமிகளின் தொந்தரவால் பால்வினை[sexullay transmitted diseases] அல்லாத இது போன்ற விளைவுகள் வரலாம்.

அப்போது வாடையுடன் கலந்த வெள்ளை [அ] பழுப்பு நிறத் திரவம் வரலாம்.

அரிப்பும் இருக்கக் கூடும்.

இதற்கு ஃப்லாஜைல்[Flagyl] என்கிற மெட்ரோநிடஸால்[Metronidazole] மாத்திரை மிகுந்த பயனளிக்கும்.

இது க்ரீம் [flagyl cream] வடிவிலும் கிடைக்கும் என்றாலும், ரத்தத்தில் கலந்த கிருமிகளை[bacteria] அழிக்க, மாத்திரை உட்கொள்வதே சிறந்தது.

500 [அ] 750 மில்லிகிராம் மாத்திரைகளை தினம் ஒன்றாக 7 நாட்களுக்கு எடுக்கவும்.

பலனளிக்கும் என நம்புகிறேன்.... நீங்கள் சொன்ன தகவல் அனைத்தும் உண்மையெனில்!

உபயோகித்தபின் தெரிவியுங்கள்!

"பாலியல் கேள்விகளுக்கு "கசடற"வின் பதில்கள்!" - 4

2008-08-29T08:08:00.000-07:00

"பாலியல் கேள்விகளுக்கு "கசடற"வின் பதில்கள்!" - 4

Anonymous has left a new comment on your post ""பாலியல் கேள்விகளுக்கு "கசடற"வின் பதில்கள்!" - 3":

விஎஸ்கே ஐயா,
வலது பக்க testisஇல், சிறு கரும் புள்ளியாக ஆரம்பித்து, இரு நாட்களுக்குள் கொஞ்சம் பரவி விட்டது. இப்போது அது சிவப்பும் வெள்ளையும் நிறமாக மாறிவிட்டது. மருத்துவரிடம் கேட்டபோது இது ஹெர்பிஸ் என்றும், உடலுறவு கொள்வதால் பரவும் என்றும் சொன்னார்.(மருத்துவர் எந்தவித சோதனையும் செய்யவில்லை..மேலும் 2 மருத்துவர்களிடமும் கேட்டுவிட்டேன்.. அவர்களும் ஹெர்பிஸாக இருக்கலாம் என்று சொல்கிறார்கள், ஆனால் எந்த சோதனையும் செய்யவில்லை)

ஆனால், நான் இதுவரை எந்தவிதத்திலும் யாருடனும் உடலுறவு கொண்டதில்லை..வேறு வகையில் வர வாய்ப்பு இருக்கிறதா?

இதை முழுமையாகக் குணப்படுத்த முடியுமா?
நான் இன்னும் 2 வருடங்களுக்குத் திருமணம் செய்யப்போவதில்லை. அதற்குப் பின் திருமணம் செய்துகொள்ளலாமா?

இதனால் கொஞ்சம் மனஉளைச்சல் அதிகமாக இருக்கிறது.. இது மிகவும் கவலைப்படவேண்டிய விசயமா?
முடிந்தவரை விரைவில் பதிலளிக்கவும்...
நன்றி...

கேள்விக்கு நன்றி.

அன்புள்ள அனானியாரே!,

இன்னும் சில விஷயங்களைத் தெளிவாகச் சொல்லியிருந்தால், பதிலளிக்க வசதியாய் இருந்திருக்கும்.

1.எப்போது இது வந்தது?
2.எத்தனை நாட்களாக இருக்கிறது?
3.சிகிச்சை ஏதும் தரப்பட்டதா?
4. நீங்கள் பார்த்த மருத்துவர்களில் யாராவது தோல் சம்பந்தப்பட்ட துறை நிபுணரா?
5. உங்களுக்கு இப்போது என்ன வயது?
6. அந்த இடத்தில் அரிப்பு ஏதாவது இருக்கிறதா?

என்றெல்லாமும் தெரிந்திருந்தால் நன்றாக இருந்திருக்கும். இருப்பினும் நீங்கள் சொல்லியிருக்கும் தகவலை வைத்துப் பார்த்தால்,....

உடலுறவு கொள்ளவில்லை என நிச்சயமாகச் சொல்லுவதால், இது ஹெர்பிஸ் வகையைச் சேர்ந்தது இல்லை என நினைக்கிறேன். பெரும்பாலும் [99%] ஜெனிடல் ஹெர்பிஸ் [Genital Herpes] என்பது உடலுறவால் மட்டுமே பரவுவது.

மேலும், இது தென்பட்ட இடம் "Testis" எனச் சொல்லுவதிலிருந்து, விரைப்பையின் மேல்தோலின் மீது [Scrotal sac] எனக் கொள்கிறேன். ஹெர்பிஸ் நோய் அநேகமாக குறியின் [Penis]மீதோ, அதன் தண்டின் [shaft] மீதோதான் பெரும்பாலும் வரும்.

முதலில் கரும்புள்ளிகளாக வந்து, பின் நிறம் மாறியதாகவும் சொல்லி இருக்கிறீர்கள்.

இதையெல்லாம் வைத்துப் பார்க்கும்போது, இது "Scrotal Angioma" எனப்படும் ஒரு ரத்தக்குழாய் சம்பந்தப்பட்டதாக இருக்கும் என நினைக்கிறேன். விரைப்பைத் தோல் மீது, சிறு சிறு ரத்தக்குழாய்கள் இருக்கின்றன. இவைகள் புடைப்பினால் சிறிய அளவில் ரத்தம் கசிந்து இது போல நிகழக்கூடும். இவை நீங்கள் சொன்னது போலவே நிறமும் மாறும். நடுத்தர வயதுக்காரர்களுக்கு [25 - 35] இது அதிகமாக நிகழும் வாய்ப்பு இருக்கிறது.

ஒரு சருமநோய் மருத்துவரிடம் [Skin Specialist, Dermatologist] இதைக் காட்டி, உறுதிப்படுத்திக் கொண்டு, ஒரு சில களிம்புகளின் [Cream] மூலம் இதைச் சரிப்படுத்த முடியும்.

உடலுறவு கொள்ளவில்லை என்றால் அதிகம் பயப்படத் தேவையில்லை.

வாழ்த்துகள். முடிந்தால், பிறகு மீண்டும் இங்கு வந்து சொல்லுங்கள். நன்றி.

"பாலியல் கேள்விகளுக்கு "கசடற"வின் பதில்கள்!" - 3

2008-07-21T18:08:00.000-07:00

"பாலியல் கேள்விகளுக்கு "கசடற"வின் பதில்கள்!" - 3

முந்தையப் பதிவு

வேந்தன் அரசு :

கேள்வி: ஐயா கசடு அற,

குழாயை துண்டித்து விட்டால் விதையில் பிறக்கும் தலைபிரட்டைகளின கதி என்ன?

கசடற: இவை மீண்டும் ரத்தத்தில்[நேரடியாக அல்ல!] கலக்கின்றன. செயலிழந்த நிலையில்.

நன்றி... கேள்விக்கு!

கேள்வி: வேந்தன் அரசு
நன்றி

அறுபடாத குழாய் உள்ளவர்கள் பல நாள் வடிக்காமல் இருந்தால் இதே விளைவு உண்டா?

கசடற: இது குறித்து இன்னும் சில விளக்கங்கள்.

நம் உடலில் சுரக்கும் உமிழ்நீர், சிறுநீர் போல எப்போதுமே இந்த விந்து சுரப்பதில்லை.

இந்தச் சுரப்பியை உணர்வு பெற்று எழச் செய்யும் போது மட்டுமே, இந்த நாளங்கள் உந்தப்பட்டு, மற்ற சில கலவைகளோடு, விந்தணுவும் சேர்ந்து விந்து வெளிப்படுகிறது.

உடலுறவின் இறுதியிலோ, அல்லது சுய இன்பம் போன்ற செயல்பாடுகளாலோ, இந்த விந்து வெளிப்படுகிறது.

இந்த அறுவை சிகிச்சை செய்தவர்களுக்கு, விந்தணு சுரப்பதில் ஒரு தடையும் இருப்பதில்லை.

விந்தோடு கலக்க உதவும், குழாய் துண்டிக்கப்படுவதால், இதன் கலப்பு தடுக்கப்பட்டு, விந்தணு இல்லாத விந்து வெளியேறுகிறது.

வெளியேற முடியாத விந்தணு ரத்தத்தோடு கலக்கிறது.
---------------------------

கேள்வி: ஆண்களுக்கு வரும் பால்வினை நோய் எதனால் வருகிறது என்று விளக்கமுடியுமா? அப்படியே அதை எப்படித் தவிர்க்கலாம் என்றும் விளக்குங்களேன்.

கசடற: ஆண்களுக்கு, பெண்களுக்கு எனப் பொதுவாக இல்லை எனினும், முக்கிய நோய்கள் அனைத்துமே இருபாலருக்கும் வரக்கூடும் என்றாலும், இந்தக் கேள்வியை மையமாகக் கொண்டு ஒரு சில முக்கியமான பால்வினை நோய்களை விளக்க முற்படுகிறேன்.

ஒரு டஃஜனும் மேற்பட்ட பால்வினை நோய்கள் இருக்கின்றன. இதில், குறிப்பாக ஒரு ஆறு நோய்கள் ஆண்களை வருத்தும். அவைகள் என்னவென்று பார்ப்போம்.

ஸிஃபிலிஸ் என்னும் மேகநோய்:
எய்ட்ஸ்/ ஹெச்.ஐ.வி
கொனோரியா என்னும் வெட்டைநோய்
க்ளமிடியா
ஹ்யூமன் பபில்லோ வைரஸ்
ஜெனிடல் ஹெர்பிஸ்

இதில் இந்த எய்ட்ஸ்/ ஹெச்.ஐ.வி பற்றி விவரமான பதிவு ஏற்கெனவே போட்டிருக்கிறேன்.

மற்ற நோய்களைப் பற்றி ஒரு சுருக்கமான வரைவு.

கொனோரியா என்னும் வெட்டைநோய்:

சிறுநீர் வழியே ஒரு வெள்ளை நிற திரவம் வடிவது, சிறுநீர் கழிக்கும் போது வரும் எரிச்சலும் இந்நோயின் அறிகுறிகள்.
இது ஆண்மை இழப்புக்கும் வழி வகுக்கும்... சரியான சிகிச்சை எடுக்காவிட்டால்.
இந்நோய் இருப்பவருடன் உடலுறவு கொள்வதால் இது வருகிறது.

உடலின் பல பாகங்களை இது பாதிக்கும்.
எலும்பு நோய்[], கண்பார்வை பாதிப்பு போல பல மோசமான விளைவுகளை இது ஏற்படுத்தும் என்பதால் இந்த நோயின் அறிகுறி கண்டவுடனேயே சிகிச்சை எடுப்பது நல்லது.
ஒரு சில எளிய மருந்துகள் மூலம் இதைக் கட்டுப்பாட்டுக்குள் கொண்டுவர முடியும். கவனம்!

"க்ளமைடியா"

இந்த நோய் வந்ததின் அறிகுறிகளே தெரியாமல் இருப்பதுதான் இதன் சிறப்பு !
தனக்கு இது வந்ததே தெரியாமல் மற்றவருக்கும் பரப்பப்படும் நோய் இது.
எரிச்சல், விரை வீங்குதல் போன்ற அறிகுறிகள் இதற்கு.

ஹெர்பிஸ் சிம்ப்லெக்ஸ் வைரஸ்[2]:

ஆணுறுப்பில் சில புண்களை உண்டாக்கும் இந்த நோய் கிட்டத்தட்ட ஸிஃபிலிஸ் என்னும் மேகநோய் பொன்ற தோற்றத்தை அளிக்கும்.
மருந்துகள் மூலம் குணமாக்கலாம் இதனை.

ஹ்யூமன் பாபில்லோ வைரஸ்:

ஆணுறுப்பு, ஆசன வாய், இன்னும் சில இடங்களில் ஒரு சில தழும்புகளை இது ஏற்படுத்தும். ஆண், பெண் இருவருக்கும் இது ஒருவர் மூலம் ஒருவருக்குத் தொற்றும்.
11 முதல் 12 வயதுக்குள் போட்டுக்கொள்ளும் ஊசியினால் இதைத் தவிர்க்க முடியும்.

ஸிஃபிலிஸ்:

தவிர்க்க முடியாது என்றாலும் குணப்படுத்த்க் கூடிய நோய்தான் இந்தக் கொடிய நோய். இது வந்தவருடன் கலப்பதால் இது வருகிறது.
ஆனால், சரியான சிகிச்சை எடுத்துக் கொள்ளாவிட்டால், இது ஆளையே இறுதிவரை துன்பப் படுத்தும் என்பதை மனதில் கொண்டு முறைய்யன சிகிச்சை மேஷ்ற்கொள்ள வேண்டும்.
ஆணுறுப்பில் ஒரே ஒரு புண் மட்டும் வந்து சில நாட்களில் மறைந்துவிடும்.
ஆனால், இந்தக் கிருமி உள்ளேயே இருந்துகொண்டு, பல மோசமான விளைவுகளை ஏற்படுத்தும்.
இதை மனதில் கொள்ளுங்கள்.
உரிய காலத்தில் சிகிச்சை எடுத்துக் கொள்ளுங்கள்.
அசட்டையாய் இருந்து விடாதீர்கள்.

கேள்வி: இதை எப்படி தவிர்ப்பது?

கசடற: 1. கட்டியவருக்கு உண்மையாய் இருங்கள்! 2. உங்கள் உறவைத் தவிர, மற்றவருடான உடலுறவைத் தவிருங்கள். 3. ஆணுறை உபயோகிங்கள்.
இந்த மூன்று செய்திகளை ஒரு மந்திரமாகப் பயன்படுத்துங்கள்!
உங்கள் வாழ்வு சிறக்கட்டும்.
வாழ்த்துகள்!

"பாலியல் கேள்விகளுக்கு "கசடற"வின் பதில்கள்!" - 2

2008-07-12T14:53:00.000-07:00

"பாலியல் கேள்விகளுக்கு "கசடற"வின் பதில்கள்!" - 2

"குடும்பக் கட்டுப்பாடு அறுவை சிகிச்சை" [Vasectomy]

சென்ற பதிவில் குடும்பக் கட்டுப்பாடு அறுவைச் சிகிச்சை பற்றி சொல்வதாகச் சொல்லியிருந்தேன்.

இதோ அதன் விரிவு.

இதுவும் கேள்வி-பதில் வடிவிலேயே!

கேள்வி: 'வாஸெக்டமி' என்றால் என்ன? இது எப்படி செய்யப்படுகிறது?

கசடற: பொதுவாக 'குடும்பக் கட்டுப்பாடு ஆப்பரேஷன்' என வழங்கப்படும் இதன் நேரடி மொழிபெயர்ப்பு 'குழாய் அறுப்பு' என்பதே!

விதைப்பைக்குள்[scrotum] இருக்கும் விதைகளில்[testicle] இருந்து சுரக்கும் விந்தணு[sperm] ஒரு குழாய்[vas deferans] மூலமாக.... ஒவ்வொரு விதை[விரை][testicle]யிலிருந்தும் ஒரு குழாய்... இதை எடுத்துச் செல்ல உதவும் விந்துவுடன் கலந்து உடலுறவின் இறுதியில் பெண்ணின் உறுப்புக்குள் பாய்கிறது.

இந்தக் குழாய்கள் துண்டிக்கப்படும் அறுவைச் சிகிச்சையே இந்த 'வாஸெக்டமி'.

இதன் மூலம் ஒரு ஆண் கருத்தரிக்கச் செய்யும் சக்தியை மட்டும் இழக்கிறான்...... தன் ஆண்மையை அல்ல!

இது ஒரு எளிய அதிகம் செலவில்லாத சிகிச்சை.

இனிமேல் ஒரு பெண்ணைக் கருத்தரிக்கச் செய்யமுடியாது என்ற ஒன்றைத் தவிர, ஒரு ஆணின் செயல்பாட்டில் வேறு எந்தக் குறைபாடும் வருவதில்லை என்பதை நன்றாகப் புரிந்து கொள்ளுங்கள்.

உடலுறவில் எந்தவொரு சிரமமும் இல்லாமல் செயல்பட முடியும்... விந்துவும் வெளியேறும்... பெண் கர்ப்பமாவதில்லை... அவ்வளவுதான்!

இது பற்றிய சரியான, முறையான அறிவு இல்லாமல், பெண்களைக் குடும்பக் கட்டுப்பாடு செய்யச் சொல்லி அவர்களைக் கஷ்டப்படுத்தும் கொடுமை அதிகமாவதை நாமெல்லாம் தவிர்க்கலாமே.

இது ஒரு 30- 45 நிமிஷ வேலை!

விரைப்பையின் ஒரு பக்கத்தில் முதலில் மரத்துப்போகும் ஊசி போடப்பட்டு, ஒரு சிறிய துளை மூலம், இந்தக் குழாய் துண்டிக்கப்படுகிறது. துண்டிக்கப்பட்ட இருமுனைகளும் தைக்கப்பட்டு, விரைப்பையின் துளையும் தைக்கப்படுகிறது.

இதேபோல், இப்போது, அடுத்த பக்கத்திலும் இது செய்யப்படுகிறது.

இதை கத்தியில்லாமல் செய்யும் முறைகளும் இப்போது புழக்கத்தில் வந்துவிட்டது.

இதைச் செய்யும்போது ஒரு வலியும் இருக்காது. அடுத்து சில நாட்களுக்கு அந்த இடத்தில் சற்று லேஸான வலி இருக்கலாம்.

கேள்வி: இதனால், எந்தத் தொந்தரவுமே இருக்காதா?

கசடற: இல்லை எனச் சொல்ல முடியாது! எந்த ஒரு அறுவை சிகிச்சையிலும் வரக்கூடிய கோளாறுகள்[infection] இதிலும் வரலாம்..... கவனமில்லாமல் இருந்தால். சீழ் பிடித்தல், ஜுரம், ரத்தப்போக்கு போன்றவை ஒருசிலருக்கு வரலாம். ஆனால், இதன் சாத்தியக்கூறு இப்போதெல்லாம் அநேகமாக இல்லை என்றே சொல்லலாம்.

கேள்வி: இதைச் செய்த எத்தனை நாள் கழித்து ஒருவர் உடலுறவில் ஈடுபடலாம்?

கசடற: 4 வாரங்களுக்குப் பிறகு உடலுறவில் ஈடுபடமுடியும் என்றாலும், 8 முதல் 10 வாரம் அல்லது 15 முதல் 20 முறை விந்து வெளிப்படும் வரை, விந்தணு விந்துவில் இருக்கக்கூடிய சாத்தியக் கூறு இருப்பதால், மருத்துவ சோதனைகள் மூலம் இது இல்லை என உறுதிப்படுத்திய பின்னரே இதன் பயனை உணரமுடியும். அதுவரையில் "தன் செயலாகவோ" [masturbation]அல்லது ஆணுறை[condom] உபயோகித்தோ இதில் ஈடுபடுவது நல்லது.

கேள்வி: எனது செயல்பாட்டில் ஏதேனும் மாற்றம் இருக்குமா?

கசடற: குறி விறைப்பு, [erection]செயல்பாடு, [performance]விந்து வெளியேற்றம்[ejaculation] இந்த எதிலும் ஒரு மாற்றமும் இருக்க வாய்ப்பே இல்லை. அப்படி ஏதாவது வந்தால், நண்பர் சுல்தான் சொன்னது போல, செய்துகொண்டவரின் [அறியாமையால் வரும்] மனநிலை மாறுபாடு மட்டுமே இதற்குக் காரணம்.
பொதுவாக, இனி கரு உண்டாகாது என்னும் உணர்வு, ஒரு புதுவித உற்சாகத்தைக் கொடுத்து, பயமில்லாமல், உடலுறவில் ஈடுபட வழி வகுக்கிறது என்றே ஆய்வுகள் சொல்லுகின்றன.

விந்தணு இல்லாமல் செய்கிறது இந்த சிகிச்சை! ஆண்மை இழக்கச் செய்வதில்லை!

ஆண்மைத்தன்மையைக் காட்டுகின்ற தாடி மீசை போன்றவற்றுக்குக் காரணமான சுரப்பிகளும் இந்த விதை[ரை]யில்தான் சுரக்கின்றன. அவற்றுக்கு ஒரு பாதிப்பும் ஏற்படுவதில்லை. விந்துவின் அளவிலும் இதனால் பெரிய மாற்றம் ஏற்படுவதில்லை... விந்தணுக்களின் சதவிகிதம் 2 முதல் 5 வரையே, மொத்த விந்துவில்!

கேள்வி: இப்படிச் செய்துகொண்டபின் இதை திரும்பவும் பழையபடி மாற்றமுடியுமா?

கசடற: முடியும்! இப்போது இது அதிக அளவிலேயே செய்யமுடிகிறது! ஆனால், இதைச் செய்துகொள்வதால் விந்தணு மீண்டும் வரத் துவங்கும் என்ற உத்திரவாதம் இல்லை! மேலும், இதைச் செய்ய அதிகப் பணம் செலவாகும். கவனம்! கவனம்!

"பாலியல் கேள்விகளுக்கு "கசடற"வின் பதில்கள்!"

2008-07-05T16:50:00.000-07:00

"பாலியல் கேள்விகளுக்கு "கசடற"வின் பதில்கள்!"

என் இனிய நண்பர் கோவி. கண்ணன் பாலியல் பற்றிய கேள்விகளுக்கு நான் பதில் அளிக்க வேண்டுமெனக் கேட்டிருக்கிறார். அவரது வேண்டுகோளை ஏற்று, என்னால் முடிந்த அளவில் இங்கு பதிலிறுக்க முயற்சிக்கிறேன். அவருக்கு எனது நன்றி.

இங்கு சொல்லப்படுபவை எல்லாமும், மருத்துவக் குறிப்புகளும், ஆய்வுகளும் சொல்வதை வைத்தே நான் இடுகிறேன் என்பதையும், உங்கள் மருத்துவரைக் கலந்து ஆலோசிப்பது மிகவும் முக்கியம் என்பதையும் மனதில் கொள்ளவும். இவையெல்லாம் ஒரு தகவலுக்கு மட்டுமே! முடிந்தவரையில், உண்மைக்கு மாறாக எதையும் சொல்லவில்லை என்பதையும் வலியுறுத்துகிறேன்.

கேள்வி -1

டிபிசிடி கேட்ட, விஎஸ்கே ஐயாவிற்கு கேள்வி :

குடும்பக் கட்டுப்பாடு சிகிச்சை செய்தப் பிறகு தேவைப்பட்டால் பின்னாளில் மீள்பெற வழியுண்டா..(இருபாலர்க்கும்)...?

கசடற: இது ஒரு சிக்கலான கேள்வி!
ஏனென்றால் ஆண்களுக்கு செய்யப்படும் குடும்பக் கட்டுப்பாடு அறுவை சிகிச்சைக்கும், பெண்களுக்கு செய்யப்படுவதற்கும் நிறைய வேறுபாடு இருக்கிறது.

ஆண்களுக்குச் செய்யப்படும் அறுவை சிகிச்சை,[vasectomy] விந்தணு [sperm] வரும் குழாயை மட்டும் துண்டிப்பதால் நிகழ்கிறது. இதை அநேகமாக திருத்தி அமைக்க முடியும். ஏனென்றல், இது விரைப்பைக்குள்[scrotum] இருப்பதாலும், இந்தாக் குழாய் நீளம் அதிகம் இல்லாமல் இருப்பதாலும். நூற்றுக்கு தொண்ணூறு பேருக்கு இதை வெற்றிகரமாக திருத்தக் கூடிய முறைகள் இருக்கின்றன.

பெண்கள் விஷயத்தில் இது சற்று சிக்கலானது. கருமுட்டை[ovum] சினையிலையில்[ovaries] உருவாகி, ஒரு குழாய்[fallopian tubes] மூலம் சினைப்பைக்கு[uterus] வருகிறது. இந்தக் குழாய் இருபுறமிருந்தும் [வலது, இடது] வருகிறது. இவை சற்று நீளமான குழாய்கள் என்பதால், அறுவை சிகிச்சை முடிந்தபின், இவை சுருங்கி விடுவதால், மீண்டும் சேர்ப்பது கடினமாகிப் போகிறது. இங்கு 100க்கு 40 சதவிகிதமே பலனளிக்கிறது. அதுவும் உடனே செய்யப்படுபவர்க்கே!

ஒன்றைப் புரிந்து கொள்ளுங்கள்!
அறுத்துக் கொள்வதைவிட, மீண்டும் இணைப்பதற்கு அதிகச் செலவாகும்..... இரு முறைகளிலும்!

கேள்வி-2
குடும்பக் கட்டுப்பாடு செய்வதன் மூலம் உடலுறவில் ஏதேனும் வித்தியாசம் வர வாய்புள்ளதா..?

கசடற: இங்கு ஆண்களைப் பற்றியே கேட்பதாக நினைக்கிறேன்.
இருந்தாலும், இருபாலர்க்கும் பொதுவாகவே சொல்லுகிறேன்.
குடும்பக் கட்டுப்பாடு செய்து கொள்வதால், எந்த விதத்திலும்...... ஆமாம்..... எந்த விதத்திலும் உடலுறவு கொள்வதில் வேறுபாடே இருக்க வாய்ப்பில்லை.
ஆனாலும், இதைச் செய்து கொண்டவரின் மனநிலையைப் பொறுத்து இதில் சில வேறுபாடுகள் நிகழ்வதாக ஆய்வுகள் கூறுகின்றன.

இனி தன்னால், ஒரு பெண்ணைக் கருவாக்க முடியாது என்பதால், சிலரது மனநிலை தளர்ந்துபோய், குறி விரைப்பிலிருந்து [erection], முழு உறவு கொள்வது வரைக்கும், பல ஆண்கள் ஒரு தாழ்வு மனப்பான்மைக்கு உள்ளாகி, உடலுறவில் ஒரு உற்சாகமின்மையைக் கொள்ளுகிறார்களாம்!

பெண்கள் இந்த விஷயத்தில் இன்னமும் அதிகமாகப் பாதிக்கப் படுகிறார்கள் என ஆய்வு சொல்லுகிறது!

தன்னிடமிருந்து ஒரு பெரிய துருப்புச் சீட்டு.... கருத்தரிப்பு என்ற ஒன்று.... பறிபோனதாகக் குமைந்து அதிகமான மன உளைச்சலுக்கு ஆளாகி, உடலுறவில் ஈடுபாடில்லாமல் போகிறார்கள் என்பது மிகவும் வருந்தத் தக்கது.

இருபாலரும் ஒன்றை நன்றாக உணர்ந்து கொள்ள வேண்டும்.

இனிக் கருத்தரிக்க உதவமுடியாது என்ற ஒன்றைத் தவிர, வேறு எந்த விதத்திலும் இதனால் குறையே இல்லை.

விரும்பிச் செய்து கொண்ட பின்னர், இப்படி மன வருத்தம் கொள்ளாமல், உடலுறவை மகிழ்வோடு, பயமில்லாமல் அனுபவிக்க இருவரும் புரிந்து கொள்ள வேண்டும்!

கேள்வி - 3

கிரி :

கோவி.கண்ணன் கூறியபடி பார்த்தால், அவரருடைய நண்பர் விலைமாதிடம் சென்றதால் தான் ஆண்மை குறைவு ஏற்பட்டதா?

கசடற: முழுக்க முழுக்க தவறான கருத்து இது! விலைமாதிடம் செல்வதால், ஆண்மைக்குறைவு ஏற்பட வாய்ப்பே இல்லை. பாலியல்நோய் வரவே நிறைய வாய்ப்பிருக்கிறது!

கேள்வி -4
ஆமாம் என்றால். விலைமாதிடம் போவதற்கும் அவருக்கு ஆண்மை குறைவு ஏற்பட்டதிற்கும் என்ன சம்பந்தம்?

கசடற: ஒரு சம்பந்தமும் இல்லை!

கேள்வி -5
இல்லை அவருக்கு முன்பே ஆண்மை குறைவு இருந்ததா?

கசடற: எனக்குத் தெரியாது! அப்படி இருந்திருந்தால், எப்படி அடிக்கடி அவரால் அங்கு செல்ல முடிந்தது?!!

கேள்வி -6

அனானி : மருத்துவர் வீஎஸ்கே ஐயா,

கோவி.கண்ணன் பதிவில், யரோ ஒரு நண்பர் 'ஆண்கள் குடும்பக்கட்டுபாடு அறுவை சிகிச்சைக்கு பின் உறவில் ஈடுபடும் ஆண்களுக்கு காற்றுதான் வரும் என்று சொன்னதாகவும், அதைக் கேட்டு சிரித்ததாகவும் சொல்லி இருக்கிறார். அதற்கு பதிலை அவர் சொல்லவில்லை. தாங்கள் ஆண்களுக்கான குடும்பக் கட்டுப்பாடு அறுவை சிகிச்சை பற்றி விளக்க முடியுமா ?

கசடற: சுருக்கமாகச் சொல்லுகிறேன் இங்கு. ஏனென்றால், இதைப் பற்றி விரிவாக எனது அடுத்த பதிவு வரும்.

ஆண்களுக்குச் செய்யப்படும் குடும்பக் கட்டுப்பாடு அறுவை சிகிச்சை மூலம், கருத்தரிக்கச் செய்யும் விந்தணுக்கள்[sperms] உற்பத்தி ஆகும் குழாய்[vas deferans].... இது விரைப்பைக்குள் இருக்கும் விரைவிதைகளில்[testicles in the scrotum] இருந்து துவங்குகிகிறது....... மட்டும் துண்டிக்கப்பட்டு, உடலுறவின் இறுதியில் வெளியாகும் விந்துவுடன் கலக்காமல் இருக்கச் செய்யப் படுகிறது.

இதன் மூலம், விந்தணு கலக்காத விந்து நீர்[semen] மட்டுமே இறுதியில் பாய்கிறது.
எனவே, காற்று மட்டுமே வரும் என்பதெல்லாம் யாரோ விட்ட புருடா! நம்பாதீங்க!

ஆண்களுக்கான குடும்பக் கட்டுப்பாடு அறுவை சிகிச்சை எப்படி செய்யப் படுகிறது என்பதை விரிவாக விளக்கி பதிவிடுகிறேன்.

"எய்ட்ஸுக்கே உதவியா?!!" -- [9]

2008-04-21T19:12:00.000-07:00

"எய்ட்ஸுக்கே உதவியா?!!" -- [9]

8-ம் பதிவு இங்கே

"இந்த தடுப்பு சாதனம், தடுப்பு சாதனம்னு சொல்றியே! அதெல்லாம் என்ன? எப்படி உபயோகிப்பது?ன்னு கொஞ்சம் சொல்றியா?" என்றான் மூர்த்தி.

'உடலுறவு கொள்ளும் போது, ஆணுறுப்பு விரைத்தவுடன், உடனே ஒரு ஆணுறை அணிவது அவசியம். இதை 'லேடெக்ஸ் காண்டம்'னு [Latex Condom] சொல்லுவாங்க.

பெண்ணுறுப்பு, ஆசனவாய், அல்லது வாய்வழி எந்த வழியில் உறவு கொள்ளுவதுன்னாலும் இதை அணிய வேண்டியது மிகவும் அவசியம், இந்த கிருமி பரவாமல் இருக்க வேண்டுமானால்......... அதாவது இது இருக்குமோ என சந்தேகிக்கும் ஒருவரிடம் மட்டுமே!

இந்தக் காண்டம் [ஆணுறை] கிழிந்துவிட்டது எனத் தெரிந்தால் உடனே உடலுறவைத் தொடராமல், புது ஆணுறை [காண்டம்] அணிந்த பின்னரே மீண்டும் இதில் ஈடுபட வேண்டும். இதைக் கவனத்தில் கொள்ளவும்.

விந்து வெளியேறியதும், மேற்கொண்டு தொடராமல், உடனே வெளியில் எடுத்து, சுத்தம் செய்து கொள்ளவும்..... இருவரும்!

ஒரு முறை உபயோகித்த உறையை மீண்டும் உபயோகிக்க வேண்டாம்! '

"ஓரினச் சேர்க்கையாளர்கள்தான்[Homosexuals] இந்த நோயை அதிகம் பெறுகிறார்கள் என்ற கருத்து ரொம்பவே அதிகமா இருக்கே... ... அது பத்தி என்ன சொல்றே நீ?' என்றான் சுகுமார்.

'நானும் படிச்சேன்! அதனாலத்தான் இதைப் பத்தி எழுதணும்னே தோணிச்சு. இப்ப சொல்றதை நல்லாக் கேட்டுக்க!

ஹெச்.ஐ.வி. கிருமி [HIV virus] நீ யாரு என்னன்னு பிரிச்சுப் பார்க்கிறதே இல்லை!

நீ பொண்ணுங்களோட மட்டும்தான் உறவு வைச்சிருக்கியா, இல்லை... ஆண், பெண் இப்படி ரெண்டு பேரோடயும் உறவு வைச்சிருக்கியா, இல்லை நீ ஓரினச் சேர்க்கை மட்டுமே வைச்சிருக்கியான்னு பேதம் பாக்கறதில்லை.

நீ என்ன பண்றேங்கறதை மட்டுமே பாக்குது!

தகாத முறையில் உறவு கொண்டால் இது வந்தே தீரும்.

ஓரினச் சேர்க்கையாளர்கள் இந்த முறையில் சற்று கவனக்குறைவாக இருப்பதால், [ஆசனவழி, வாய்வழி உறவே ஆண்களிடம் அதிகம்; பெண்கள் தவறான சாதனங்களைப் பயன்படுத்துவதால்] இது அவர்களிடம் அதிகமாகக் காணப் படுகிறது என்பது மட்டுமே உண்மை!

ஆனா, இப்பல்லாம் அவங்க கூட இதுல ரொம்ப விழிப்பா இருக்காங்க!

இது வரணும்னு யார் விரும்புவாங்க சொல்லு!

அதனால, இவங்களை மட்டுமே இதுக்கு காரணம்னு குறை சொல்றதை இத்தோட விடு! சரியா?'

"எல்லாம் சரிதாம்ப்பா! எல்லாம் விளக்கமா சொல்லிட்டே! இப்ப சில சந்தேகம் கேக்கப் போறேன்! அதுக்கும் பதில் சொல்லிடு! நான் ஒரு தெளிவோட போயிருவேன்" என்று வெள்ளந்தியாகச் சிரித்தான் சுகுமார்!

'சரி கேளு!' என்றேன்!

"ஒரு ஆளைப் பார்த்தவுடனேயே இவருக்கு எய்ட்ஸ் வந்திருக்குன்னு சொல்ல முடியுமா?"

முடியாது! இந்தக் கிருமியால் தாக்கப்பட்டபின், சோதனை செய்து உறுதிப்படுத்திக்கொள்ளாத, சிகிச்சை எடுக்காத ஒருவருக்குக் கூட இது சில ஆண்டுகள் கழித்தே தெரியவரும். சிகிச்சையை உடனேயே தொடங்கியவர்கள் பல ஆண்டுகளுக்கு இதைத் தள்ளிப் போட முடியும்!

"போதை மருந்து ஊசிகள் மூலம் இது வரும்னு சொல்ல முடியுமா?"

'இல்லை. ஆனால், போதை அளிக்கக் கூடிய எந்த ஒரு விஷயமுமே ஒருவருடைய முடிவெடுக்கும் தன்மையை பாதிப்பதால், இதற்கு அடிமையானவர்கள் பெரும்பாலும் தவறான செயலில் ஈடுபட அதிக வாய்ப்பிருப்பதால், இது அவர்களைத் தாக்கவும் செய்கிறது எனச் சொல்லலாம்!

"இதுக்குத் தடுப்பு ஊசில்லாம் வந்திருக்காமே?"

'இதுக்கான ஆராய்ச்சி எல்லாம் நடந்துகிட்டு இருக்கு. ஆனல், இது வரைக்கும் இதைத் தடுக்க எந்தவொரு மருந்தும் கண்டுபிடிக்கப்படவில்லை. தடுப்பு சாதனங்களை உபயோகிப்பது ஒன்றே இதைத் தடுக்கும் வழி. இதைத் தவிர இன்னும் பல வழிகளிலும் பரிசோதனைகளும், ஆராய்ச்சிகளும் நடந்து கொண்டிருக்கின்றன. ஆனால், இவை எதுவும் முழுமையான பலன் அளிக்குதுன்னு இன்னும் உறுதியாச் சொல்ல முடியலை என்பதே உண்மை!'

"அப்போ இந்த மருந்து, மாத்திரையெல்லாம் ...... எதுக்காக சாப்பிடணும்? எப்படியும் வரத்தான் போகுதுன்ற! இதைச் சாப்பிடாட்டித்தான் என்ன ஆயிரும்?' கொஞ்சம் விரக்தியாகக் கேட்டான் மூர்த்தி

"இவ்ளோ நேரம் உங்கிட்ட சொன்னது எதுவுமே ஏறலியா உனக்கு! ஓ! நீ இப்பத்தான் வந்தே இல்ல? ஆரம்ப நிலையில் இந்த நோயைக் கண்டுபிடிச்சா, இந்த மருந்து மாத்திரைங்க மூலமா இதைக் கொஞ்சம் தள்ளிப் போட முடியும்னு சங்கர் சொன்னான். சரிதானேடா நான் சொல்றது!' என ஆர்வமாகக் கேட்டான் சுகுமார்!

'ரொம்பச் சரி! இன்னும் என்னல்லாம் தெரிஞ்சுகிட்டே சொல்லு பார்ப்போம்! ' என அவனைத் தூண்டினேன்!

"ரொம்பவே விளக்கமா சொல்லிட்டேப்பா! இனிமே யார் கேட்டாலும் இதைப் பத்தி நானும் உன்னைப் போலவே சொல்ல முடியும்!

முறையில்லாத உறவால இது வருது.

தடுப்பு சாதனங்களை உபயோகிச்சு இதைத் தடுக்க முடியும்.

வந்துருக்கான்னு தெரிஞ்சுக்க, ஒரு ரெண்டு மூணு தடவை சோதனை பண்ணிக்கணும்.

வந்திருச்சுன்னா, முறையா மருந்து மாத்திரை சாப்பிடணும்.

போதை மருந்தால இது வர்றதுக்கான வாய்ப்பு அதிகம்.

ஓரினச் சேர்க்கையாளர்கள்தான் இதுக்குக் காரணங்கிறது ரொம்பத் தப்பு!

ஒன்றுக்கும் மேற்பட்ட உறவு வைச்சுக்கிறதுல கவனமா இருக்கணும்! சரிதானா! இல்லை, எதுனாச்சும் விட்டுட்டேனா? " எனச் சொல்லிவிட்டு, என்னைப் பெருமையாகப் பார்த்தான் சுகுமார்!

'அவ்ளோதான்! இது தெரிஞ்சாலே போதும்!' என அவனைப் பாராட்டினேன்!

'சரி, வீட்டுல இன்னிக்கு என்ன சமையல்? ரொம்பப் பசிக்குது!" என்றான் சுகுமார்!

"சந்திரா! சாப்பாடு ரெடியா! கேள்வியெல்லாம் முடிச்சாச்சு!! என்றேன்!

"எல்லாம் எப்பவோ ரெடி! உபயோகமா பேசிக்கிட்டு இருக்கீங்களேன்னுதான் தொந்தரவு பண்ணலை! வந்து உட்காருங்க மூணு பேரும்." என உள்ளிருந்து குரல் வந்தது!

***********************************
[முற்றும்!]

"எய்ட்ஸுக்கே உதவியா?!!" [8]

2008-04-15T18:09:00.000-07:00

"எய்ட்ஸுக்கே உதவியா?!!" [8]

7-ம் பதிவு இங்கே!

"என்ன? பேசறதெல்லாம் பேசி முடிச்சாச்சா? இங்க பாருங்க யாரு வந்திருக்காங்கன்னு!" என எங்களை வரவேற்றார் என் மனைவி!

அங்கே மூர்த்தி ! எனது இன்னொரு உயிர் நண்பன்!

""அடடே! வாடா! எப்ப வந்தே! நல்ல வேளை நீ வந்து காப்பாத்தினே! ஒரே கேள்வியா கேட்டு அறுக்கறான் இந்த சுகு! காப்பாத்துறா என்னை" என அலறினேன்!

"என்னவாம்!" என அக்கறையாய் வினவினான் சிரித்த முகத்துடன் மூர்த்தி!

"அது ஒண்ணுமில்லேடா! இந்த எய்ட்ஸ் பத்தி சில கேள்விங்க கேட்டுகிட்டிருந்தேன்! சில வில்லங்கமான கேள்வியும் கேட்டேன்னு வைச்சுக்கோயேன்! அதுக்குத்தான் இப்படி சொல்றான்!" என்று வெள்ளந்தியாகச் சிரித்தான் சுகு!

"அட! இது நல்ல விஷயந்தானே! நீ கேள்றா!" எனத் தூண்டிவிட்டான் மூர்த்தி!

"அடப்பாவி! நீயுமாடா!" என மீண்டும் அலறினேன்!

"சரி! சரி! நீ கேளு சுகு! அப்பப்ப நானும் கேக்கறேன்!" என்றான் மூர்த்தி!

சுகுமார் தொடர்ந்தான்.

"இந்த நோய் வந்திருக்குன்னு எப்ப தெரியும்? உடனேவா?"

"இதுவரைக்கும் சொன்னதை சரியாக் கேட்டேதானே நீ? இந்தக் கிருமி ஒரு எதிர்ப்பு அணுவைப் போய் தாக்கி சிறை பிடிக்குது. அதுலேர்ந்து தன்னை பல மடங்கா பெருக்கி இன்னும் இது மாதிரியான அணுக்களை எல்லாம் தாக்குது. இப்ப இதோட ஆதிக்கம் அதிகமாகிப் போறதால, இது தன்னை வெளிக்காட்டிக்க முடியுது! இதுக்கெல்லாம் ஒரு 3 முதல் 6 மாதம் பிடிக்கும்! இதைத்தான் 'விண்டோ பீரியட்'னு மங்கை சொன்னாங்க! இது வந்திரிச்சோன்னு ஒரு பயம் வந்ததும் போய் சோதனை பண்ணி, இது இல்லைன்னு தெரிஞ்சாலும், உடனே சந்தோஷப்படாமல், ஒரு 3 மாசம் கழிச்சு மறுபடியும் சோதனை செஞ்சுக்கணும். அப்பவும் இல்லேன்னாத்தான் கொஞ்சம் நிம்மதி ஆகலாம். கொஞ்சம்தான்!

சந்தேகத்துக்கு சாம்பார் மாதிரி ஒரு 6 மாசத்துக்கு அப்புறமும் இன்னொரு சோதனை பண்ணிக்கறது நல்லது!
இன்னொண்ணு! இந்த சமயத்துல, வேறெந்த தப்புத்தண்டாவும் பண்ணாமலும் இருக்கனும்! இது ரொம்ப முக்கியம்!"

"சரி! இது வந்திரிச்சுன்னு தெரிஞ்சிருச்சு!தெரிஞ்சதும் முதல்ல என்ன செய்யணும்?" என்றான் மூர்த்தி பதட்டமாக!

"ம்ம்! நீயும் இதுல வந்திட்டியா! சரி கேளு!
உடனடியா இந்த நோயைப் பத்தி நல்லாத் தெரிஞ்ச, இதுலியே சிறப்புத்தகுதி பெற்ற ஒரு மருத்துவரை நாடி இதற்கான சிகிச்சையை மேற்கொள்வது மட்டுமே, 'எய்ட்ஸ்' வருவதைத் தள்ளிப்போட...ஆமாம்... தள்ளிப்போட மட்டுமே... உதவும். இது கொஞ்சம் பயமுறுத்தற மாதிரி இருந்தாலும், முறையான சிகிச்சை, தீய பழக்கங்களை [பலருடனும் முறையற்ற உறவு, புகை பிடித்தல், அதிகமாக மது அருந்துதல், போதை மருந்துகளை எடுத்துக் கொள்ளுதல்] விடுதல் போன்றவை ஒருவரது வாழ்நாளை நீட்டித்து, 'எய்ட்ஸ்' வராமலே வாழ்வை நல்லபடியா முடிக்கவும் வாய்ப்பிருக்கிறது!! எனவே, இதைக் கவனத்தில் கொள்ள வேண்டும்."

"தண்ணி அடிக்கலை. புகை பிடிக்கலை. போதை மருந்தே சாப்பிட்டதில்லை. ஓரினச்சேர்க்கை இல்லாம பொண்ணுங்களோட மட்டுமே உடலுறவு, இது மாதிரி ஆளுக்கு இந்த நோய் வராதுதானே!" என்றான் சுகுமார்.

"எல்லாம் சரிதான் சாமி! ஆனா, ஒரு விஷயம் மட்டும் உதைக்குதே! ஒரே பொண்ணோட மட்டுமில்லாம பல பொண்ணுங்களோட உறவு வைச்ச மாதிரி இருக்கே இந்த கேஸ்! இதுல எவருக்காவது இந்த நோய் இருந்தால் இது வர வாய்ப்பு இருக்கிறது. இன்னொண்ணும் சொல்றேன். ஒரே பொண்ணு அல்லது ஆண் கூட மட்டுமே ஒருத்தர் உறவு வைச்சிருந்தாலும் அந்த அடுத்த ஆளு சுத்தமா இல்லேன்னா, அவருக்கு இந்த நோய் வேறு எவர் மூலமாவது வந்திருந்தால், மற்றவருக்கும் இது வரக் கூடும்! ஹெச்.ஐ.வி. இதில் பாரபட்சமே காட்டுவதில்லை! இதுதான் உண்மை!!

"ரத்ததானம் மூலமா இது பரவும்தானே! ரத்தமும் ரத்தமும் கலக்குதே" என அப்பாவியாகக் கேட்டான் மூர்த்தி!

"நீ கேக்கறது சரிதான்! முன்னெல்லாம் இது இப்படியும் வந்ததா நிகழ்வெல்லாம் இருக்கு! ஆனா, இப்ப இது பற்றிய விழிப்புணர்ச்சி வந்திருப்பதாலும், ஒவ்வொரு முறை ரத்தம் எடுக்கும் போதும், ரத்தம் கொடுக்கும் போதும் சுத்திகரிக்கப்பட்ட ஊசிகளையே பயன்படுத்துவதாலும், இந்த நோய் வர வாய்ப்பே இல்லை! மேலும், இப்போதெல்லாம், இந்த நோய் இருக்கிறதா என முறையாகப் பரிசோதிக்கப்பட்ட பின்னரே ஒருவரின் ரத்தம் மற்றவருக்கு அளிக்கப்படுவதாலும், இது பெரும்பாலும் தவிர்க்கப்படுகிறது!

"கருத்தடை மாத்திரைகளை உபயோகிப்பதின் மூலம் இதைத் தவிர்க்கலாம் என ஒரு கருத்து இருக்கே!"

"தவறான கருத்து! கருத்தரிப்பதை மட்டுமே இது தவிர்க்கும்! திரும்பத் திரும்ப இதையே சொல்ல போரடிக்குது! பச்சப்புள்ள வேற திட்றாரு! இருந்தாலும் மீண்டும் ஒருமுறை சொல்றேன்! இந்த நோய் வராமல் தடுக்க, முறையற்ற உடலுறவைத் தவிர்ப்பது, இந்த நோயால் தாக்கப்படாத ஒருவருடன் மட்டுமே உறவு கொள்வது, ஊசிகளைப் பரிமாறிக் கொள்ளாமல் இருப்பது, இவை மட்டுமே! முறையான தடுப்பு சாதனங்கள் உபயோகித்து இதைத் தவிர்க்க முடியும்! அதில் இந்த கருத்தடை மாத்திரைகள் அடங்காது!:))" என்றேன்!

"என்ன கோல் போட்டாலும் தடுக்கிறியேடா!" எனச் சொல்லிச் சிரித்தான் சுகுமார்!

[தொடரும்!]

"எய்ட்ஸுக்கே உதவியா!! " -- [7]

2008-04-08T20:14:00.000-07:00

"எய்ட்ஸுக்கே உதவியா!! " -- [7]

"இந்த நோயால் பாதிக்கப்பட்ட ஒருவரைத் தொடுவதாலோ, அவருடன் கை குலுக்குவதாலோ, அவர் உபயோகிக்கும் கழிப்பறையைத் தானும் பயன்படுத்துவதாலோ, அவர் எச்சில் பண்ணி குடித்த கோப்பையை உபயோகிப்பதாலோ, அவரது தும்மல், இருமல் நம் மீது படுவதாலோ இது வரலாம் தானே! சரிதானே நான் சொல்றது!" என்றான் சுகுமார்!

'முற்றிலும் தவறு! ரொம்ப ரொம்ப தப்பு நீ சொல்றது! நீ சொல்லியிருக்கும் எந்த முறையாலும் ஹெச்.ஐ.வி பரவாது! காற்று மூலமாகவோ, உணவின் மூலமாகவோ பரவும் நோயல்ல இது. இது போன்ற சந்தர்ப்பங்களில், அவரது ரத்தம், உனது ரத்தத்தோடு எந்த வகையிலாவது கலந்தால் மட்டுமே இது தொற்றிக் கொள்ளும்! என்னடா, திருப்பித் திருப்பி இதையே சொல்கிறேனே என எண்ண வேண்டாம். இதை நன்றாக மனதில் உள் வாங்கிக் கொள்ளு!'

திடீரென சுகுமார் முகத்தில் ஒரு ஒளி தெரிந்தது!

" இவ்ளோ நேரம் நீ சொன்னதெல்லாம் சரி! இப்ப உன்னை மடக்கறேன் பாரு! கொசு ஒண்ணு இந்த நோய் இருக்கற ஆளைக் கடிக்குது. அப்பிடியே பறந்து போயி இன்னொரு ஆளைக் கடிக்குது. அவனுக்கு இந்த நோய் இல்லை! இப்ப ரத்தமும் ரத்தமும் கலக்குது! இந்த ஆளு ஒடம்புலியும் அது துளை போடுது. இவனுக்கும் அந்த நோய் வரும்தானே!" எனக் கேட்டு காலரைத் தூக்கிவிட்டுக்கொண்டு சிரித்தான்.

" ரொம்பவே புத்திசாலித்தனமான கேள்விதான் கேட்டிருக்கே! அதுக்காக உன்னைப் பாராட்டியே ஆகணும் சுகு! ஆனால் நான் சொல்லப் போறது உனக்கு அதிர்ச்சியாத்தான் .... இல்லை இல்லை!... மகிழ்ச்சியாத்தான் இருக்கும்!
கொசு கடிக்கறதால ஹெச்.ஐ.வி. வராது!

நீ சொல்ற மாதிரி, இந்த நோய் இருக்கற ஆளை ஒரு கடிச்சு, அந்தக் கிருமியை தன்னோட ரத்தத்துல எடுத்துக்குதுன்னு வைச்சுப்போம். ஹெச்.ஐ.வி. கிருமி ரொம்ப நேரம் உயிரோட இருக்கறதில்லை இங்கே! முன்னேயே சொன்ன மாதிரி ஒரு 20 நிமிஷம்தான்!

அத்தோட, கொசு உன்னைக் கடிக்கறப்ப, தன்னோட ரத்தத்தை அனுப்புறதில்லை! வாயில் இருந்து தன்னுடைய எச்சிலைத்தான் கடிக்கற இடத்துல துப்பி, ரத்தம் உறிஞ்ச ஒரு தோதான இடத்தை அமைக்குது! இதுல ஏற்கெனவே ரத்தத்தில் இருக்கிற கிருமி வர வாய்ப்பில்லை.

இன்னும் சொல்லப் போனா, ஹெச்.ஐ.வி. கிருமி, பூச்சிகளோட உடம்புல தன்னைப் பெருக்கிக் கொள்வதுமில்லை. அதிக நேரம் உயிர் வாழ்வதும் இல்லை! இதுக்கெல்லாம் மேல ஒரு பெரிய காரணம், ஒருத்தரைக் கடிச்சதும் கொசு உடனே அடுத்த ஆளை நோக்கிப் போறதில்லை! கொஞ்ச நேரம் ஒரு இடத்துல போய் உட்கார்ந்து, குடிச்ச ரத்தத்தை ஜீரணம் பண்ணிட்டு, அப்புறமாத்தான் அடுத்த ஆள்கிட்ட போகும். இதுக்கு கொஞ்ச நேரம் பிடிக்கும். அதுவரைக்கும் ஒரு கொசுவோட ரத்தத்தில் இந்தக் கிருமி உயிர் வாழாது! எனவே பயம் வேண்டாம்.... ஹெச். ஐ.வி. வருமோ என! ஆனா, மலேரியா,[MALARIA] மஞ்சள் ஜுரம்[JAUNDICE] போன்ற நோய்கள் பரவலாம்! ஏனெனில் இவை எச்சிலின் மூலம் வரும் நோய்கள்!

"சரிப்பா! ரொம்பவே சொல்லிட்டே! இப்ப இது வந்திருக்கா இல்லியான்னு எங்கே போய் தெரிஞ்சுக்க முடியும்!?"

'உன் குடும்ப டாக்டர்கிட்ட.... [அதான் என்கிட்ட!]... போய் கேளு! அவரே சொல்லுவார்! அவர்கிட்டேயே இதை டெஸ்ட் பண்ற வசதியும் இருக்கலாம். இல்லேன்னா எங்கே போய் பரிசோதிக்க முடியும்னு அவர் சொல்லுவார். அவர் கிட்ட போக வெக்கமா இருந்தா, எந்த ஒரு அரசு மருத்துவ மனையிலும் போய் டெஸ்ட் பண்ணிக்கலாம். ரொம்ப அவசரம்னா ஒரு 30 நிமிஷத்துலியே தெரிஞ்சுக்கலாம். நிச்சயமா தெரிஞ்சுக்கணும்னா முறையான சோதனை முடிவு தெரிய 1-2 வாரம் பிடிக்கும். "எலிசா"[ELISA], வெஸ்டெர்ன் ப்ளாட்"[WESTERN BLOT] என்கிற இரண்டு ரத்தப் பரிசோதனைகள் மூலம் இதை உறுதிப் படுத்த முடியும். இவை இரண்டையும் செய்த பின்னரே இந்த நோய் வந்திருக்கிறது எனச் சொல்ல முடியும்.

"தனக்கு இந்த நோய் இருக்கா இல்லியான்னு எத்தனை நாளுக்குள்ள இதை ஒரு ஆளு தெரிஞ்சுக்க முடியும்?"

'சாதாரணமா இந்தக் கிருமி ஒரு ஆளுக்குள்ள வந்தால், உடம்பு அதை எதிர்த்து போராட ஆரம்பிக்கும். இது பொதுவா எல்லா நோய்க்கு எதிராகவும் நடக்கறதுதான்!

ஹெச்.ஐ.வி.க்கு எதிரான தடுப்புசக்தி ஒன்று முதல் ஆறு மாதத்துக்குள்ள தெரிய ஆரம்பிக்கும். இந்த சமயத்துல இதை வைச்சு இந்த நோய் வந்திருக்கா இல்லையான்னு கண்டுபிடிக்க முடியும்.' என்றேன்

[தொடரும்]

"எய்ட்ஸுக்கே உதவியா!! " -- [6]

2008-04-06T20:18:00.000-07:00

"எய்ட்ஸுக்கே உதவியா!! " -- [6]

"சரி! வெளியே வந்தது தப்புன்னு நினைக்கிறேன்! வா! திரும்பி நடப்போம்!" எனச் சொல்லித் திரும்பினான் சுகுமார்.

"இன்னும் எதுனாச்சும் கேக்கணும்னா கேளு!' எனத் தூண்டினேன்!

"ஒரே ஒரு கேள்விதான்! ரத்தம் மூலமா, விந்து மூலமா இது பரவுதுன்னு சொன்னே!"

'ஆமாம்!'

"எவ்ளோ ரத்தம் அல்லது விந்து இன்னொருத்தர் உடல்ல கலக்கணும், இந்த நோய் வர்றதுக்கு? அப்படிக் கலந்தது எவ்ளோ நேரம் இது உயிரோட இருக்கும் ஒரு நோயா ஆகறதுக்கு! இதான் என் கேள்வி!"

'இந்த ஹெச்-ஐ.வி. நுண்கிருமி ஒரு துளி ரத்தத்தில் ஆயிரக்கணக்கில் இருக்கின்றன! இவை ரத்தத்தில் கலக்க ஒரு சில நொடிகளே போதும்! அப்படிக் கலந்த இந்தக் கிருமி ஒரு எதிர்ப்புகளைத் தடுக்கும் 'செல்'லை உடனே சென்றடையுது! அந்த நொடியில் இருந்தே இது தன்னைப் பல மடங்காக்கும் ஒரு தொழிற்சாலையாக இந்த 'செல்'லை மாற்ற ஆரம்பிக்கிறது. இதைத்தவிர, இன்னொரு பயமுறுத்தும் செய்தையையும் சொல்லிடறேன்! இந்தக் நுண்கிருமி 20 நிமிடங்களுக்கு மட்டுமே உயிரோடிருக்கும்! அதறகுள், இது அடுத்தவர் ரத்தத்துடன் கலக்க வேண்டும்! 20 நிமிடம் என்பது அதிக நேரம்... அதே சமயம் குறைந்த நேரமும் கூட!'

"என்னடா! கதி கலங்க வைக்கறே! அதே சமயம் ஒரு நல்ல சேதியும் சொல்றே! இன்னும் கொஞ்சம் விளக்கமாச் சொல்லேன்" எனக் கெஞ்சினான் சுகுமார்!

" பயப்பட ஒண்ணும் தேவையே இல்லை, உன் உடம்புல ஒரு கீறலும் இல்லேன்னா! ஒரு நோயாலியின் ரத்தம் உன் உடம்பில் பட்டுவிட்டதென்றால், உன் உடலில் ஒரு கீறலோடும் அது சம்பந்தப் படவில்லை என்றால், உடனே கழுவி விட்டால்.... ஒரு 20 நிமிடத்துக்குள் ... உனக்கு இந்த நோய் வரவே வராது! ஆனால், இதையே விந்து பற்றிச் சொல்ல முடியாது..... பாதுகாப்புச் சாதனக்கள் உபயோகிக்க வில்லைன்னா! அதனால, முறையான தடுப்பு சாதனங்கள் உபயோகிக்கலைன்னா, இதைத் த்டுப்பது ரொம்பவே கஷ்டம்னு மீண்டும் சொல்லிக்கறேன்! இதைப் புரிஞ்சு நடந்துகிட்டா எல்லாருக்கும் நல்லது! சரி வா! வீட்டுக்குப் போகலாம்' என்றேன்.

நடந்துகொண்டே பேசிக்கொண்டேயும் போனோம்!

"பச்சை குத்திக்கறதால கூட ஹெச்.ஐ.வி. வருமாடா" ?

'ஊசி மருந்துக்குச் சொன்ன அதே பதில்தான் இதுக்கும்! சரியாக சுத்திகரிக்கப்படாத, அல்லது முந்தைய ரத்தத்தில் தோய்க்கப்பட்ட உச்சிமுனைகளால் பச்சை குத்திக் கொண்டால், அப்படிப்பட்ட ஊசி இந்த நோய் இருந்த எவருக்காவது உபயோகப்படப்பட்டிருந்தால், ஹெச்.ஐ.வி. பரவ வாய்ப்பு இருக்கிறது. இதில் கவனமாயிருந்தால், பயப்படத் தேவையில்லை!'

"அப்படீன்னா, இது போன்ற எந்த தீய பழக்கங்களும் இல்லாமலே, மருத்துவத்துறையில் வேலை செய்யற சிலருக்கு இந்த நோய் வருகிறதே! என்ன காரணம்?"

'கவனக்குறைவுதான்! இங்கு அடிக்கடி வலியுறுத்தி வரும் ஒரே கருத்து இதுதான்! ஹெச்.ஐ.வி கிருமி பாதிக்கப்பட்டவரிடமிருந்து, ரத்தம், ஊசி, உடலில் சுரக்கும் நீர் இவற்றின் வழியாக மட்டுமே பரவும்..... எவராயிருந்தாலும்! சுத்திகரிக்கப்படாத இந்த முறைகளை ஒரு சிலர் அஜாக்கிரதையாக மருத்துவ மனைகளிலும் பயன்படுத்தும் போது, இவர்களுக்கு வரும் ஆபத்து இருக்கிறது. ஆனால், மற்றவர்களை விட, இவர்களுக்கு இது பற்றிய அறிவும், தடுப்பு முறைகளும் அதிகமாகவே இருப்பதால், இப்படி வரும் வாய்ப்பு மிகவும் அரிதே!'

"ஒருவரை ஒருவர் இடித்துக் கொண்டு விளையாடும் கபடி, கூடைப்பந்து போன்ற விளையாட்டில் ஈடுபடுபவர்களுக்கு?"

'பொதுவாக இதன் மூலம் ஹெச்-ஐ.வி- வர வாய்ப்பே இல்லை! எவருக்கவது அடிபட்டு, ரத்தம் வெளியாகும் நிலை இருந்தால், அவர் உடனடியாக அகற்றப்பட்டு, சிகிச்சை அளிக்கப்பட்டு, ரத்தப்போக்கு நின்றவுடன் மீண்டும் விளையாட்டில் கலந்து கொள்ளலாம். அவருக்கு ரத்தம் வருவதோடு கூட, கூட விளையாடுபவருக்கும் ஏதெனும் வெளிக்காயங்கள் இருந்து, அந்த ரத்தம் இதன் வழியே கலந்தால் மட்டுமே இது பரவலாம்! அப்படி இல்லேன்னா பயப்படத் தேவையில்லை!'

[தொடரும்]

"எய்ட்ஸுக்கே உதவியா!! " -- [5]

2008-04-03T19:46:00.000-07:00

"எய்ட்ஸுக்கே உதவியா!!" -- [5]

தோள் மீது கை போட்டுக் கொண்டே இருவரும் நடந்தோம்.

"இப்படி உட்கார்ந்து பேசலாமா? மறந்துட்டேன்னு நினைக்காதே! இன்னும் சில கேள்விகள் இருக்கு. அண்ணி காதுபடப் பேச கூச்சமா இருந்தது. அதான் வெளியே போகலாமான்னு கேட்டேன்!" என்றான் சுகுமார்.

'எனக்குத் தெரியுண்டா! என்னாலியும் மனம்விட்டு சொல்ல முடியுமேன்னுதான் நானும் சட்டுன்னு கிளம்பிட்டேன். ம்ம்ம்... கேளு!' என்றேன்.

"அப்படீன்னா, இதோ முதல் கேள்வி! பாதுகாப்பு உறை அணிந்து உடலுறவு கொண்டால் இது வரவே வராது எனச் சொல்லலாமா?"

'இல்லை! இதுவும் ஒரு தவறான கருத்து. இது முழுக்க முழுக்க 100% பாதுகாப்பானது எனச் சொல்ல முடியாது. கிழிந்து போதல், கசிவு, சரியான முறையில் பயன்படுத்தாமல் போதல் போன்ற பல காரணங்களால், இது கொடுக்க வேண்டிய பாதுகாப்பைக் கொடுக்காமல் போக வாய்ப்பிருக்கிறது. பொதுவாக 98% பாதுகாப்பை இதை முறையாக, சரியாகப் பயன்படுத்துவதன் மூலம், பெறலாம். உணர்ச்சி வேகத்தில், சில சமயம் இது கிழிந்து போனது கூட தெரியாமல், அல்லது அலட்சியம் காரணமாக, உடலுறவு தொடர்ந்து, இந்த நோயைப் பெற வாய்ப்பிருக்கிறது.

ஆணுறுப்பும், பெண்ணுறுப்பும் இணைந்து செய்கின்ற முறையான உடலுறவை, பாதுகாப்பு சாதனங்கள் துணையுடன், இந்த நோய் இல்லாத இருவர் தங்களுக்குள் மட்டுமே, வேறெந்த முறையற்ற வழிகளின் மூலம் அல்லாது, உடலுறவு கொள்வதே, இந்த நோய் வராமல் தடுக்கக் கூடிய ஒரே வழி என்பதைப் புரிந்து கொள்ளு!
!
பொது இடங்களில் கிடைக்கும் அறிமுகமில்லாதவரிடம் உடலுறவு கொள்வதையும், பாலியல் தொழிலாளரிடம் செல்வதையும் தவிர்க்கவும். அப்படிச் செல்வதாயிருந்தால், கண்டிப்பாக ஆணுறை,அல்லது காண்டம் அணியாமல் உடலுறவு கொள்ளக் கூடாது!

"சரி! ரொம்ப உணர்ச்சிவசப்படாதே! இந்த போதை மருந்துகளை உபயோகப்படுத்தறவங்க பத்தி சில கேள்விகள்!" என ஆரம்பித்தவனை உடனே நிறுத்தி,

'போதை மருந்துக்கு அடிமையானவர்கள், அடுத்தவர் உபயோகித்த ஒரே ஊசியைப் பயன் படுத்தக் கூடாது. இதில் எவருக்கு இந்த நோய் இருக்கிறது எனத் தெரியாத நிலையில்! ஒரு சில போலிகள், ஏற்கெனவே மற்றவர் உபயோகித்த ஊசிகளையே புதிது போல விற்றுவிடுவார்கள். எனவே நம்பிக்கையான கடையில் இருந்து ஊசியைப் பெறுதல் மிகவும் அவசியம். ஒரு முறைக்கு மேல் ஒரு ஊசியை உபயோகிக்க வேண்டாம்! முனையை வளைச்சு தூர எறிஞ்சிடணும்! ' என்றவன் அவன் முகம் ஒரு மாதிரியாய்ப் போவதைப் பார்த்ததும்,

'டேய்! என்னடா அப்படிப் பாக்கறே! என்னடா இவன் போதை மருந்து கொள்வதை ஊக்குவிக்கிறானோன்னு நினைக்காதே! இந்தப் பதிலின் நோக்கமெல்லாம், அப்படிப்பட்ட பழக்கத்திற்கு அடிமையானவர் இந்நோய் வராமல் தடுக்க என்ன செய்ய வேண்டும் என்பது குறித்து மட்டுமே! உனக்கு அப்படி ஒண்ணும் பிரச்சினை எல்லாம் இல்லைதானே! இருந்தா சொல்லிடுப்பா! எதுனாச்சும் செஞ்சுறலாம்!' என நக்கல் அடித்தேன்!

"அடப்பாவி! நீ ஒரு டாக்டராச்சே! உங்கிட்ட கேட்டா ஒழுங்கான பதில் கிடைக்குமேன்னு இதையெல்லாம் கேட்டுகிட்டு இருக்கேன்! உடனே என்னை சந்தேகப் படறியே! நான் வரேம்ப்பா!" எனத் திரும்பிக்கொண்டான் சுகுமார்!

'தெரியுண்டா! ச்சும்மா உன்னைக் கலாய்ச்சா உடனே கோவிச்சுக்கிறியே! என்னோட நண்பன் நீ! நீ தப்பா நடப்பியா! நீ கேக்கறது சுவையாத்தான் இருக்கு! கேளு! கேளு ராசா!' என்றவுடன் சிரித்துக் கொண்டே திரும்பவும் என் தோள் மீது கை போட்டான் சுகுமார்!

"அப்படீன்னா, இந்த போதை மருந்துகளை பயன்படுத்தறவங்களைப் பத்தி உன் கருத்துதான் என்ன?" என்றான்.

'போதை மருந்துப் பழக்கம் கொடியதொரு ஆட்கொல்லி, உடனடியாக இப்பழக்கத்திலிருந்து வெளியேற வேண்டியது அவசியம் என்பதில் எந்தவித மாற்றுக் கருத்தும் இல்லை! இப்பல்லாம் ரொம்பப் பேர் இதுல விழறதைப் பத்தி படிக்கிறேன். ரொம்பவே வேதனையான விஷயம் இது. உடனடியா, இதுலேருந்து வெளிவருவதற்கான பாதுகாப்பு மையங்களை அணுகி, வேண்டிய உதவி பெறணும் என்பதே என் ஆசை! உன்னோட நண்பர்கள் யாராவது இதுல ஈடுபட்டிருக்காங்கன்னு தெரிஞ்சா, நீயே அவங்களை அங்கே கூட்டிகிட்டுப் போகணும்! இதை எல்லாருக்கும் சொல்லு!' என மௌனமானேன்! '

[தொடரும்]

"எய்ட்ஸுக்கே உதவியா!" -- [4]

2008-03-30T20:07:00.000-07:00

"எய்ட்ஸுக்கே உதவியா!" -- [4]

'அண்ணி' உள்ளே போகும்வரை காத்திருந்த சுகுமார், குரலைச் சற்றுத் தாழ்த்தியபடியே,

"இந்த....ஆசனவழியில் சிலர் உறவு கொள்வதாகப்[anal sex] படித்திருக்கிறேன். இதன் மூலமும் இந்த நோய் பரவுமா?" என்றான்!

'நல்ல கேள்விடா! மற்ற எல்லா வழிகளையும் விட எளிதில் ஜவ்வுத்தோல் கிழிந்துபோகக்கூடிய அபாயம் இந்த இடத்தில் அதிகமாக இருப்பதால், இதன் மூலம் இந்த நோய் பரவும் வாய்ப்பும் மிகவுமே அதிகமாகிறது. செலுத்துபவரை விட, வா[தா]ங்கிக் கொள்பவர்க்கே இது அதிகமாகப் பரவும் என இதுவரையில் கிடைத்திருக்கிற கணக்கைக் கொண்டு சொல்லலாம்.

இதில் கவனத்தில் கொள்ள வேண்டிய விஷயங்கள் என்னன்னா,
இந்த முறையில், ஆண், பெண் இரு பாலருமே ஓரினமாகவோ, அல்லது மாற்றினத்தோடோ ஈடுபடுகிறார்கள்.

இருவரில் யாராவது ஒருவருக்காவது இந்த நோய்க் கிருமிகள் உடலில் இருக்க வேண்டும், இது பரவ.

இந்த முறை, அந்த முறை என்றில்லாமல், எந்த முறையில் செய்யப்படுகிறது என்பதை விட, இந்த நோய் ஏற்கெனவே இருப்பவரால் மட்டுமே இது அடுத்தவருக்குக் கொடுக்கப்பட முடியும் என்பதை முக்கியமாக மனதில் கொள்ள வேண்டும். '

" சரி! இப்போ ஒரு முக்கியமான கேள்வி கேட்கப்போறேன்! இந்த ஓரினச் சேர்க்கையாளர்கள்... அதாம்ப்பா, 'ஹோமோ'ன்னு[] சொல்றோமே, அவங்கதான்.... இவங்களாலதான் இந்த நோய் அதிகமா பரவுதுன்னு சொல்றாங்களே, அதைப் பத்தி உங்க மருத்துவத்துறை என்ன சொல்லுது? என்றான் சுகுமார்.

"இதைப் பத்தி சொல்லியே ஆகணும்! மிக மிகத் தவறான கருத்து இது!
ஓரினச் சேர்க்கையாளர்கள் தான் இந்த நோய் பரவ வெகுவான காரணம் என்ற தவறான ஒரு குற்றச்சாட்டு பொதுவாக இருந்து வருகிறது.
இது துளிக்கூட உண்மையல்ல!

இவர்களில் பலர், தவறான உடலுறவு, போதை மருந்துக்கு அடிமையாதல், ஒன்றுக்கும் மேற்பட்டவரோடு உறவு கொள்ளுதல் போன்ற செயல்களின் மூலம், இந்த நோயால் ஏற்கெனவே பாதிக்கப்பட்ட யாரவது ஒருவரிடமிருந்து, ஹெச்.ஐ.வி. கிருமியைப் பெற அதிக வாய்ப்பிருக்கிறது என்பது தான் உண்மை.

ஆனால், இதையே இருபாலர் உறவு கொள்வோருக்கும் கூடச் சொல்ல முடியும்! அவர்களுக்கும் இந்தக் குற்றசாட்டு பொருந்தும்.... அவர்களும் இது போன்ற தீய பழக்கங்களுக்கு அடிமையானால், நிச்சயம் இந்த நோயால் தாக்கப்படக் கூடும்!

எது எப்படி இருப்பினும், பாதுகாப்பான உடலுறவின் மூலம், பெற வேண்டிய இன்பத்தைப் பெறலாம்;

பெற வேண்டாத நோய்களைத் தவிர்க்கலாம்.

இதை அனைவரும் கவனத்தில் கொள்ள வேண்டும்!

ஆணுறை, காண்டம் போன்றவை சீக்கிரமே கிழிந்து போகும் சாத்தியக்கூறுகள் இந்த ஆசனவழி உறவில் மிக அதிகம். இதையும் கவனத்தில் கொள்ளவும்.
பொதுவாக, இந்த ஆசனவழி உறவு, உடலுறவு கொள்ள ஏற்றதொரு வழி அல்ல! ஆபத்துகள் அதிகம்! கவனம்! கவனம்!!' என்றேன்.

"சரிடா! வா கொஞ்சம் காலாற நடந்துகிட்டே பேசலாம்" என்று கிளம்பினான் சுகுமார்.

' ஏண்டா? என்ன சமாசாரம்?" என்று சிரித்தேன்!'

" சில விஷயம் இருக்கு! தனியாக் கேக்கணும்! அதான்!" என வெள்ளையாகச் சிரித்தான் சுகுமார்!

"நாங்க ஒரு 'வாக்' போயிட்டு இதோ வந்திடறோம்' எனக் குரல் கொடுத்துவிட்டு வாசல் பக்கம் நடந்தேன்!

*************************

"எய்ட்ஸுக்கே உதவியா!!" - [3]

2008-03-28T23:15:00.000-07:00

"எய்ட்ஸுக்கே உதவியா!!" - [3]

"அப்போ, இந்த [AIDS} எப்படித்தான் ஒருத்தருக்கு வருதுன்னு சொல்லலாமில்ல?" பக்கோடாவை மென்றுகொண்டே கேட்டான் சுகுமார்.

"அப்படிக்கேளு!

முறைப்படி பாதுகாப்பில்லாத உடலுறவின் மூலமே இது பெரிதும் பரவுகிறது.

அடுத்து, ஒரே ஊசியை பலர் உபயோகிப்பதின் மூலம்[இதில் எவருக்காவது முன்னமேயே இந்த நோய் இருந்தால் மட்டுமே],

அல்லது நோய்க்கிருமி உள்ள ரத்தப் பரிமாற்றத்தால்[HIV infected blood transfusion] இது நிகழலாம்.

இந்த நோயால் பாதிக்கப்பட்ட ஒரு தாய் கருவிலிருக்கும் தன் குழந்தைக்கோ, அல்லது தாய்ப்பால் மூலமாகவோ இந்த நோயைக் கொடுக்க முடியும். மற்றபடி, சாதாரணமாக அடுத்தவருடன் பழகுவதின் மூலம் இந்த நோய் பரவ வாய்ப்பில்லை!

"அப்போ,...... முத்தம் கொடுத்தா எய்ட்ஸ் வராதா?"

ஒரு எய்ட்ஸ் நோயாளி உன்னைக் கன்னத்தில் முத்தமிடுவதால் உனக்கு எய்ட்ஸ் வராது.... உன் கன்னத்தில் ஏதும் வெளிக்காயங்கள் இல்லாத பட்சத்தில்! அவருடன் கை குலுக்குவதாலோ, உன்னைக் கட்டிப் பிடிப்பதாலோ இது வரவே வராது! தாராளமா இதெல்லாம் நீ அவரோட செய்யலாம்!

"வாய்க்கும் வாய்க்குமான முத்தம்... அதுவும் ஆழ்ந்த முத்தம்[deep kiss] ... இந்த, நாக்கெல்லாம் ஒட்டிகிட்டு செய்வாங்களே அதுமாரி கொடுத்தா..??"

ரொம்பத்தான் விவரமா கேக்கறே!

பொதுவாக இதன் மூலமும் பரவாது என்றாலும், இது போன்ற முத்தங்களில், உதடுகளோ, அல்லது வாயின் உட்பகுதியோ சற்று காயப்படும் வாய்ப்புகள் இருப்பதால், கிருமிகள் கலக்கும் வாய்ப்பு இருப்பதால், இதைத் தவிர்ப்பது நலம்..... அவரோடு மட்டும்!!

"கேக்கறேனேன்னு தப்பா நினைச்சுக்காகாதே! இந்த வாய் வழி உறவு[oral sex] பற்றி கொஞ்சம் சொல்ல முடியுமா? இதன் மூலம் இந்த நோய் வர வாய்ப்பிருக்கிறதா?" என்று தயங்கியபடியே கேட்டான் சுகுமார்!

கண்டிப்பாக! இவ்ளோ கேட்டுட்டே! இதைக் கேக்கலைன்னா எப்படி! சொல்றேன் கேளு!

எப்படி வருதுன்னு தெரியலைன்னாலும், வாய் வழி உறவு மூலமா, ஹெச்.ஐ.வி. நோய் பரவ முடியும்னு ஆதாரபூர்வமா சொல்லலாம். வாய்க்குள் இருக்கும் மெல்லிய ஜவ்வுத் தோல் வழியே ஹெச்.ஐ.வி. கிருமிகள் ரத்தத்தில் பரவும் அபாயம் இருக்கிறது. இதையும் மீறி இதைச் செய்துதான் ஆகணும்னா, தடுப்பு முறைகளைக் கையாளுவது நலம். காண்டம், ஆணுறை போன்றவற்றை உபயோகித்து இதைச் செய்யலாம். தவிர்ப்பது மிகவும் நல்லது!

"அப்போ, நேர்வழி உறவு.. அதாவது, வழக்கமான முறையில் உடலுறவு கொள்வதால் என்ன ஆகும்?"

என்ன ஆகும்? நிச்சயமா இந்த நோய் வரும்... அதாவது.....இப்படி உறவு கொள்ளும் இருவரில் எவர் ஒருவருக்காவது இந்த நோய் இருந்தால்! சொல்லப்போனால், இந்த நோய் வருவதற்கு இதுதான் முதன்மையான காரணம் எனச் சொல்லலாம். பாதுகாப்பில்லாத உறவு இவர்களோடு கொண்டால், இந்தக் கிருமிகள் அடுத்தவருக்கு வந்தே தீரும்! ஆணுறை, காண்டம் இல்லாமல் இவர்கள், அல்லது, இவர்களுடன் உறவு கொள்ளவே கூடாது.

"இந்தக் கிருமி, கிருமின்னு சொல்லியே பயமுறுத்திறியே, படவா! இது எவ்ளோ நேரம் உயிரோட இருக்கும்னு சொல்லுடா!" என்றான் சுகுமார்!

இவ்ளோ நேரம் இதைக் கேக்கலியேன்னு நினைச்சேன்! கேட்டுட்டே! இதுவரைக்கும் சொன்ன எது மூலமா வெளியே வந்தாலும், இந்த நுண்கிருமி [வைரஸ்] ஒரு 20 நிமிஷத்துக்குத்தான் உயிரோட இருக்கும்! அதுக்குள்ள இது அடுத்தவரோட ரத்தத்துல கலக்கலைன்னா, செத்திரும்! உன்னோட கையில ஒரு கீறலும் இல்லைன்னா உள்ளங்கையில இதை 20 நிமிஷம் வைச்சுக்கிட்டு இருந்தேன்னாக்கூட ஒண்ணும் ஆகாது! கிருமி செத்துப் போயிரும்! புரிஞ்சுதா!" என்றேன் நான்!

"சும்மா பயமுறுத்தாம, விஷயத்தை மட்டும் சொல்லுங்க!" என்று சொல்லியபடியே, கரண்டியுடன் வெளிவந்து ஒரு முறை முறைத்தார் என் மனைவி!

"சரி, சரி! நீ போய் சமையலைக் கவனி!" எனச் சமாளித்தேன்!

[தொடரும்]

"எய்ட்ஸுக்கே உதவியா-2."

2008-03-26T16:49:00.000-07:00

"எய்ட்ஸுக்கே உதவியா-2."

அவ்ளோதானா? ரத்தம், இல்லாட்டி உடலுறவு, இப்படித்தான் இது பரவுமா? என்றான் சுகுமார்.

பொதுவா, இதுதான் சரின்னாலும், ரத்தம், விந்து[sperm], பெண்வழியில் சுரக்கும் நீர்[vaginal fluids], மார்பில் சுரக்கும் பால், மற்றைய உடலில் இருந்து ரத்தத்துடன் கலந்த நீர்[bodily fluids] இவற்றின் வழியே இந்த நோய் பரவலாம்.

"சரி! இந்த -ஹெச்.ஐ.வி. எப்படி 'எய்ட்ஸ்' ஆக மாறுகிறது? "

'இந்த வைரஸ் நம் உடலில் ஒரு தடுப்புச் சக்தியாக இருந்து, வரும் நோய்களை எதிர்க்கும் CD4 என்கின்ற 'உதவி செய்யும் செல்களை [Helper Cells] நேரடியாகத் தாக்கத் தொடங்குகிறது! இந்த செல்களின் அளவு குறைந்து வருவதை வைத்து, இந்த எய்ட்ஸ் என்னும் நோய் வந்து கொண்டிருக்கிறது என நாம் அறிய முடியும்.
இந்த வைரஸ் உடலில் கலந்து, பல ஆண்டுகளுக்குப் பின்னே இது நிகழத் தொடங்குகிறது. எனவே, இந்த வைரஸ்களின் அளவைக் குறைப்பதன் மூலம், எய்ட்ஸ் வருவதை தள்ளிப் போட முடியும்... அதற்குத்தான் மருந்துகள் உதவுகின்றன!

"இந்த ஹெச்.ஐ.வி எப்போத்தான் ஆரம்பிச்சுதுன்னு சொல்லுங்களேன்! அதை விட்டுட்டு.....!!" உள்ளிருந்து ஒரு குரல் ஓங்கி ஒலித்தது

'சொல்றேன், சொல்றேன்! நீ ஏன் கத்தறே!' என ஒரு பம்மிய குரலில் சொல்லிவிட்டு, சுகுமாரைப் பார்த்து, 'எப்போ வந்துது, எப்படி வந்துதுன்னு யாருக்கும் தெரியாது! ஆனா, 1959ல காங்கோ நாட்டுல கின்ஷாஸா நகரில் கொடுக்கப்பட்ட ஒரு ரத்தத்தில் இந்த வைரஸ் இருந்தது கண்டுபிடிக்கப்பட்டது. இதை இன்னும் பரிசோதித்த போது, இந்த வைரஸ் 1950-களில் தொடங்கியிருக்கலாம் என ஆராய்ச்சியாளர்கள் கருதுகிறார்கள்.
இருப்பினும், 1979-1981-ல் அமெரிக்காவில் ஒரு சில நோயாளிகள் எந்தவொரு காரணமுமில்லாமல், எதிர்ப்பு சக்தியைக் கொடுக்கும் செல்களின் அளவுகள் குறைந்திருப்பதைக் கண்டபோது, இதை ஆராயத் தொடங்கியதின் விளைவாக இந்த எய்ட்ஸ் என்னும் நோய் இருப்பது ஒப்புக் கொள்ளப் பட்டது!

1983-ல் தான் ஹெச்.ஐ.வி. வைரஸுக்கும் எய்ட்ஸ் என்னும் நோய்க்கும் இருக்கும் தொடர்பு உறுதிப்படுத்தப் பட்டது.

"அப்படீன்னா, ஹெச்.ஐ.வி. வந்தா நிச்சயம் எய்ட்ஸ் வந்தேதான் தீருமா? " சற்று பயந்த குரலில் கேட்டான் சுகுமார்!

'இல்லை! இந்த வைரஸ் கிருமியால் பாதிக்கப்பட்டவர்களில் பாதிப் பேர்தான் இந்த நிலைக்குச் செல்கிறார்கள். அதற்கும் ஒரு 10 வருஷம் பிடிக்கும். வாழ்க்கை முறைகள், உடல்நலக் கோளாறுகள் இந்த கால அளவைக் கூட்டவோ குறைக்கவோ செய்யும்.
இன்று இருக்கும் மருத்துவக் கண்டுபிடிப்புகளால், இதன் தீவிரத்தை வெகுவாகக் குறைக்க முடியும் என்பது ஒரு நல்ல சேதி.'

"சரி! இது எனக்கு இருக்கா இல்லியான்னு எப்படி தெரிஞ்சுக்கறதுன்னு சொல்லேன்!"

'என்னடா! இப்படி ஒரு குண்டைத் தூக்கிப் போடறே! அதான் முதல்லியே கேட்டேன்ல! சொல்லக்கூடாது!' என நான் அலற,

உள்ளிருந்து வெளிவந்த என் மனைவி,

"ஏங்க! உங்களுக்கு எதுனாச்சும் இருக்கா! அவர்தான் ஆரம்பத்துலியே எனக்கு இல்லை, ஒரு தகவலுக்காகத்தான் கேக்கறேன்னு சொல்லித்தானே இதை ஆரம்பிச்சீங்க! பேசாம அவர் கேக்கற கேள்விக்கு மளமளன்னு பதில் சொல்லுங்க!' என அதட்டினார்!

'ஒரு எளிய ரத்தப் பரிசோதனை மூலம் மட்டுமே இதை உறுதிப் படுத்த முடியும்! ஒரு சில அறிகுறிகள் இந்த நோய்க்கென இருந்தாலும், அவற்றை மட்டும் வைத்தே இதுதான்னு சொல்ல முடியாது. அப்படி என்ன அறிகுறிகள்னு தானே கேக்கறே!

காரணமில்லாத திடீர் எடைக் குறைவு
வறட்டு இருமல்
அடிக்கடி வரும் காய்ச்சலும், இரவில் வரும் அதிகப்படியான வியர்வையும்
அதீதமான உடல் சோர்வு
அக்குள், தொடை, கழுத்து இவைகளில் நெறி கட்டுதல்,
தொடர்ந்து ஒரு வாரத்துக்கும் மேல் இருக்கும் வயிற்றுப்போக்கு
வாய், நாக்கு, தொண்டை போன்ற இடங்களில் வரும் வெள்ளைத் திட்டுகள்
ந்யுமோனியா போன்ற நுரையீரல் காய்ச்சல்
உடலின் பல இடங்களில் திடீரெனத் தெரியும் சிவப்பு, பழுப்பு திட்டுகள்
நினைவாற்றல் குறைவு, மனவழுத்தம், மற்றும் சில நரம்பு சம்பந்தமான நோய்கள்.

ஆனால், முன்னரே சொன்னது போல, இவற்றில் ஏதாவது இருந்தாலே, தனக்கு இந்த நோய் என எவரும் பயப்படத் தேவையில்லை. ரத்தப் பரிசோதனை ஒன்று மட்டுமே இதை உறுதிப்படுத்தும் ஒரே வழி!
இந்த அறிகுறிகள் வர வேறு பல மருத்துவக் காரணங்கள் இருக்கின்றன.' என்றேன்.

ஒரு தட்டில் சூடான பக்கோடாவும், இரண்டு கோப்பைகளில் தேநீரும் கொண்டுவந்து வைத்தார் என் மனைவி!

'இதைச் சாப்பிட்டுகிட்டே பேசுங்க' என்று சிரித்தார்.

[தொடரும்]

" எய்ட்ஸுக்கே உதவியா"? [1]

2008-03-24T10:52:00.000-07:00

" எய்ட்ஸுக்கே உதவியா"? [1]

அன்று 'வலென்ட்டைன்' தினம்! அதாங்க! காதலர் தினம்னு அவங்கவங்க சொல்லிகிட்டு இருக்காங்களே... அதேதாங்க... !

எனது ஒரு சில பதிவுகளில் நான் எழுதிய என் கவிதைகளையும்[???] கருத்துகளையும் படித்த என் மனைவி என்னிடம் சொன்னார்!

'ஏங்க! உங்களுக்கு வேற வேலை இல்லியா? நீங்க ஒரு டாக்டர்தானே! அது சம்பந்தமா எதுனாச்சும் எழுதக் கூடாதா?'

'என்ன? இப்ப பாலியல் கல்வி - பெற்றோருக்கு' ன்னு ஒண்ணு எழுதினேனே! போறாதா?' என அப்பாவியாய்க் கேட்டேன்!

'ம்க்கும்! நீங்கதான் மெச்சிக்கணும்!அதை எழுதி கிட்டத்தட்ட ஒன்பது மாசம் ஆகப் போகுது! "நான் தான் அதைப் பெத்தாச்சே, எதுக்குப் படிக்கணும்"னு யாரும் அங்கே வர்றதில்லை! நீங்க வேற ஏதாவது எழுதுங்க! இந்த 'ஹோமோஸெக்ஷுவாலிடி'.. ஓ.. இங்கே தமிழ்ல தான் பேசணும்ல!... ஓரினச் சேர்க்கையாலத்தான் எய்ட்ஸ் அதிகமா பரவுதுன்னு சொல்றாங்களே! அதைப் பத்தி எழுதுங்க. புரிஞ்சுக்கறவங்க புரிஞ்சுக்கட்டும்!"

என் ஞானக்கண்[!!!] திறந்தது!

இதோ, உங்களை எல்லாம் அடுத்த சில நாட்களுக்கு தொல்லை பண்ண முடிவு செய்து................எப்படி இதைத் தொடங்கலாம் என !யோசித்துக் கொண்டிருந்தேன்!

அப்பத்தான் வந்தான் என் நண்பன் சுகுமார்!

"டேய்! எய்ட்ஸுன்னா என்ன? எப்படி வருது? இதுக்கு என்ன அறிகுறிங்க? எப்படி கண்டுபிடிப்பது? இதுக்கு என்ன சிகிச்சை செய்வது? இதுனால என்ன ஆகும்? இதைப் பத்தி ஆளாளுக்கு என்னமோ சொல்றாங்களே அதெல்லாம் உண்மையா பொய்யா? நீதான் டாக்டராச்சே! எனக்கு இப்ப இந்த உண்மை தெரிஞ்சாகணும்" என ஓடி வந்தான்!

"ஏண்டா! எதுனாச்சும் ஏடாகூடமா செஞ்சுட்டியா? சொல்லுடா" என அதட்டினேன்!

"அதெல்லாம் இல்லைடா! இதையெல்லாம் பத்தி தெரிஞ்சுக்கணும்னு ரொம்ப நாளா ஆசை. தப்புத்தண்டா பண்ணாம இருக்கறதுக்காகத்தான்! அதான் கேட்டேன்," என சிரித்தான்!

"சரி! அப்போ, நீ கேள்விகளாக் கேளு. நான் சொல்றேன்" என்றேன், ஒரு வழி கிடைத்த நிம்மதியுடன்!!

இதோ! அவன் கேள்விகளும், என் பதிலும்!

"எய்ட்ஸ்"ன்னா என்ன?

அக்வைர்ட் இம்யோனோ டிஃபிஷியென்ஸி ஸிண்ட்ரோம் [Acquired Immuno Deficiciency Syndrome]] இதுதாங்க எய்ட்ஸ்[AIDS] அப்பிடீன்னு சொல்லப் படுவது! அதாவது, 'தானே வரவழைத்துக் கொண்ட தன்னெதிர்ப்புக் குறைவை விளைவிக்கும் அறிகுறிகளைக் கொண்ட ஒரு நோய்' என தமிழில் விளக்கலாம்!
இந்தப் பெயர், ஒரு மருத்துவரால் ஒரு சில அறிகுறிகளாலுமோ, அல்லது சில பரிசோதனைகள் மூலமோ அறியப்படுவதுன்னு மட்டும் இப்போதைக்குப் புரிஞ்சுக்கோ!

'இது எப்படித்தான் வருது?'

ஹெச்.ஐ.வி. வைரஸ்[HIV Virus], அதாவது, ஹ்யூமோஇம்யூனோ டிஃபிஷியென்ஸி வைரஸ் [Human Immuno Deficiency Virus] என்னும் ஒன்றால் இந்த நோய் வருகிறது.

'வாங்க சுகுமார்! வீட்ல எல்லாரும் நலமா?" எனச் சொல்லியபடி தேநீருடன் சுகுமாரை வரவேற்றவர், என்னருகில் வந்து, 'ஐயோ! இது எல்லாருக்கும் தெரியுங்க! இது எப்படி பரவுகிறதுன்னு சொல்லுங்க சாமி!' என முறைத்தார்!

'சொல்லத்தானே போறேன்! அதுக்குள்ள ஏன் இப்படி தொணதொணக்கற? சுகுமார் இன்னும் கொஞ்ச நேரம் இங்கதான் இருப்பான்.நீ போய் சமையலைக் கவனி' என அவரை ஒருமாதிரியா சமாளிச்சேன்!

"நீ கேளு சுகுமார்! இதனால் பாதிக்கப்பட்டவர்கள், இந்த நோயை, ரத்தமும் ரத்தமும் கலப்பதின் மூலமாகவோ, அல்லது பாலியல் மூலமாகவோ.... அதாவது, உடலுறவின் மூலமாகவோதான் பெறுகிறார்கள்! ஒரு தாய் தனது குழந்தைக்கும் இதைத் தர முடியும்.... கருவுற்றிருக்கும் போதோ அல்லது தாய்ப்பாலைத் தரும்போதோ! இந்த நோயைப் பெற்றவர்கள் சிறிது காலத்தில் எய்ட்ஸ் என்னு நிலையை அடைகிறார்கள் என்பதே நடப்பு!' என்றேன்.

[தொடரும்]
*************************************

ஒரு முக்கிய அறிவிப்பு!!

2007-06-17T09:41:00.000-07:00

ஒரு முக்கிய அறிவிப்பு!!

அனானி அன்பர் ஒருவர் என்னையும் பொருட்டாக மதித்து, என் பெயரில்[VSK] ஒரு தனிப் பூ ஒன்று தொடங்கி என்னைப் பெருமைப் படுத்தி இருக்கிறார்!

ஆத்திகம், கசடற[aaththigam, kasadara] என்ற இரு பூக்கள் வழியாக மட்டுமே நான் பின்னூட்டம் இடுகிறேன்!

பதிவுலக நண்பர்கள் என் பெயரில் [VSK] வரும் பின்னூட்டங்களை தயவு செய்து இவ்விரு பூ விலாசத்திலிருந்து வருகிறதா எனச் சோதனை செய்து, பின்னர் வெளியிடுமாறு அன்புடன் வேண்டிக் கொள்கிறேன்.

சிரமத்திற்கு மன்னிக்கவும்.

உங்கள் வசதிக்காக, சிலகாலம் பின்னூட்டம் எதுவும் இடுவதில்லை எனவும் முடிவு செய்திருக்கிறேன்.

நன்றி!! [இதனை எனக்குத் தெரியப்படுத்திய அன்பு உள்ளத்திற்கும்!]

"லப்-டப்" -- 24 "நல்லிதயம் கொண்டு நானிலம் வாழ்க"

2007-06-06T09:28:00.000-07:00

"லப்-டப்" -- 24 "நல்லிதயம் கொண்டு நானிலம் வாழ்க"

"சென்ற பதிவில்" குழந்தைகளுக்கு பிறப்பிலேயே வரக்கூடிய பலவிதமான இதயக்கோளாறுகள் [Heart defects] பற்றிப் பார்த்தோம்.

இப்படி ஒரு கோளாறு இருக்கிறது என்பது, பிறந்தவுடனேயே, ஒரு சில அறிகுறிகளை [symptoms & signs] வைத்து, மருத்துவர்களால் சில சமயங்களில் கண்டுபிடிக்கப்படும்;

அல்லது,

பெற்றவர்களாலோ, மற்றவர்களாலோ வீட்டில் கண்டுபிடிக்கப்படலாம்.

இவற்றின் அறிகுறிகள் என்னென்ன?

பொதுவாக குறைபாடின் அளவைப் பொருத்தே இதன் அறிகுறிகளும் அமையும்.

சின்னச் சின்ன குறைபாடுகளால் [Small defects] பெரிய அளவிலான அறிகுறிகள் இல்லாமலும் போகலாம்.

சற்று வளர்ந்த பின்னர், எப்போதாவது, வேறு ஏதோ நோய்க்காக, மருத்துவரிடம் எடுத்துச் செல்கையில், தற்செயலாக இவை கண்டுபிடிக்கப் படலாம்!

ஆனால், சில வகையிலான குறைபாடுகள்[ஏ.எஸ்.டி.[ASD], வி.எஸ்.டி.[VSD], ஃபால்லட்'ஸ் டெட்ராலஜி[Fallot's Tetrology] போன்ற சில] சிசு பிறந்து, முதல் மூச்சு விடும் போதே அறிகுறிகளை வெளிப்படுத்தும்.

1. வழக்கத்தை விட வேகமாக மூச்சு விடுதல்: [Rapid Breathing]

பெரியவர்களை விட,[18-20] அதிகமான எண்ணிக்கையில் குழந்தைகள் [24-26] . மூச்சு விடும்.... ஒவ்வொரு நிமிடமும்.
இதையும் விட அதிகமான அளவில் மூச்சு வாங்கும் இக்குழந்தைகளுக்கு.

2. ஸையனோஸிஸ் எனும் நீல நிறம் படர்தல்: [Cyanosis]

குறைபாடின் தீவிரத்தைப் பொறுத்து இது அமையும்.
தோல், உதடுகள், கை,கால் நகங்கள் இவற்றில் ஒரு சிறு வெளிர் நீலம் தொடங்கி, உடல் முழுதுமே நீல நிறமாகும் வரை இது நிகழலாம்..
சுத்த, அசுத்த ரத்தங்கள் கலந்து போவதால் இது நிகழ்கிறது.
பசி, அல்லது மற்ற காரணங்களால் குழந்தை வீறிட்டு அழுகையில், இது மேலும் நன்றாக வெளிப்படும்.

3.களைப்பாதல்:[Fatigue]

குழந்தைகள் என்றாலே, விளையாட்டுதானே!
ஆனால், இக்குழந்தைகள் பொதுவாக சீக்கிரமாகவே களைப்படைந்து விடும், அல்லது, தூங்கிக் கொண்டே இருக்கும்...... தேவையான அளவில் சுத்த ரத்தம் கிடைக்காததால்.

4. ரத்த ஓட்டம் தடைப்படுதல்:[Poor Circulation]

வளர வேண்டிய வயதில், சத்துகளை எடுத்துச் செல்லும் சுத்த ரத்தம் கிடைக்காததால், வளர்ச்சி குன்றி காணப்படும்.

பெரியவர்களுக்கு வரும் நெஞ்சுவலி போன்றவை வருவதில்லை, பொதுவாக. இதனால்!

5. லர்ர்ர்ர்ப்- டர்ர்ர்ர்ர்ர்ர்ர்ப்!![Irregular Heart Sounds]

ரத்த ஓட்டம் தடைப்படுவதாலும், இதயக் குறைபாடாலும், இதயம் எழுப்பும் 'லப்-டப்' ஒலி மாறுபடுகிறது. பொதுவாக மருத்துவர்களால் கண்டுபிடிக்கப்படும் இது.

குறைபாடே இல்லாத குழந்தைகளுக்கும் கூட இந்த ஒலி வேறுபாடு நிகழலாம் என்பதால், இதை மட்டும் வைத்தே, சொல்லமுடியாது.

எதனால் வருகிறது?:

இப்படி ஒரு குறைபாடு இருக்கு எனச் சொன்னதும், உடனே தன்னை நொந்து கொள்வது, பெரும்பாலும் தாய்மார்களே!

ஆனால், இது உண்மையல்ல!!!

பெரும்பாலான குறைபாடுகளுக்குக் காரணமே இல்லாமல்தான் இன்னமும் மருத்துவ உலகம் விழிக்கிறது என்பதே உண்மை!

பரம்பரை[hereditory], மரபணுக் [ஜெனெடிக்] குறைபாடுகள்[Genetic defects] போன்றவை முக்கியக் காரணங்களாகக் கருதப்படுகின்றன.

இதற்கான ஆராய்ச்சிகள் இன்னமும் நடந்துகொண்டிருக்கின்றன.

கருத்தரித்த முதல் மூன்று மாதங்களில் வருகின்ற ஒரு சில நோய்களால், கருவில் குறைபாடு உண்டாக வாய்ப்புள்ளது.
எனவே, தாய்மார்கள், இக்காலத்தில் முறையாக ஒரு மருத்துவரைக் காண்பது மிக, மிக முக்கியம்!

எப்படிக் கண்டுபிடிக்கப்படுகின்றன?:

ஒருசில மோசமான குறைபாடுகள்,[Complex defects] கருவிலேயே கண்டுபிடிக்கப்படுகின்றன,...... இப்போதிருக்கும் மருத்துவ வசதிகளால்!
அல்லது, பிறந்த சில மணி நேரங்களிலேயே!

சாதாரணக் குறைபாடுகள்,[Minor defects] பொதுவாக, ஏதேனும் அறிகுறிகள் தென்படும்போதோ அல்லது தற்செயலாகவோ கண்டுபிடிக்கப்படுகின்றன.
மருத்துவப்பரிசோதனை[medical exam], எக்கோகார்டியோகிராம்[Echo], ஈ.ஸி.ஜி.[ECG]. கார்டியாக் கதீட்டெரைஸேஷன்[Cardiac Catheterization], மார்பு எக்ஸ்-ரே[], கைவிரல் நுனியிலிருந்து ஒரு சொட்டு ரத்தத்தை எடுத்து அதில் இருக்கும் பிராணவாயுவின் அளவை நிர்ணயிக்கும் பல்ஸ் ஆக்ஸிமெட்ரி[pulse oxymetry], போன்ற சோதனைகள் செய்யப்படும்.
[தொடர்ந்து படித்து வருபவர்களுக்கு இதெல்லாம் ஏற்கெனவே படித்தவைதான்! முந்தையப் பதிவுகளில் இது பற்றி இருக்கு!]

என்ன சிகிச்சை?:

சிறிய, சாதாரண குறைபாடுகளுக்கு சிகிச்சை அநேகமாகத் தேவைப்படுவதில்லை.

மற்ற குறைபாடுகள், அறுவை சிகிச்சை மூலம் சரிசெய்யப்படுகின்றன.

தொடையில் இருக்கும் நாளம் வழியாக ஒரு குழாயைச்[Catheter] செலுத்தி, இதயத்திற்குள் நுழைந்து சிலவற்றை [ஏ.எஸ்.டி., பல்மோனரி வால்வ் ஸ்டினோஸிஸ், [ASD, Pulmonary Valve]] சரிசெய்யலாம்.

ஒரு சில குறைபாடுகளை இதயத்தை நேரடியாகத் திறந்துதான் சரிசெய்ய முடியும்.
[பொன்ஸ் குறிப்பிட்டிருந்த "நீலக் குழந்தை"[Blue Baby Syndrome] போல]
உள்ளிருக்கும் ஓட்டைகள்[holes], வால்வுகள்[Valves], ஃபால்லட்ஸ் டெட்ராலஜி[நீலக் குழந்தை].

இன்னும் சில குறைபாடுகள் சரிசெய்யப்படமுடியாத அளவில் இருக்க்கும்.
இவற்றுக்கு மாற்று இதயம் [Heart Transplant] தான் வழி!

சரி செய்யப்பட்டபின் என்ன செய்ய வேண்டும்?

பெரியவர்களுக்குச் சொன்னது போலவே, இக்குழந்தைகளுக்கும், வாழ்வு முறை மாற்றங்கள் [Life Style Changes] தேவைப்படுகிறது.

முறையான செக்-அப், உணவுக்கட்டுப்பாடு, மருத்துவ ஆலோசனைக்குப் பிறகே ஈடுபடக்கூடிய பயிற்சிகள் எல்லாமே இவர்களும் செய்துகொள்ள வேண்டும்.

இவர்கள் குழந்தைகள் என்பதால், நிலைமையின் தீவிரம்[Seriousness] தெரியாமல் போக அதிக வாய்ப்பிருக்கிறது.
[அடப் போங்கப்பா! பெரியவங்களுக்கே இது கிடையாது என கொத்ஸ் முணுமுணுப்பது காதில் விழுகிறது! :))]

எனவே, இதில் பெற்றவர்களின் பங்கு அதிகம்!

எல்லா வசதிகளும் இருக்கும் இக்காலகட்டத்தில், முறையான தகவல் இவர்களுக்குப் பெற்றோரிடமிருந்து கிட்டாவிட்டால், இணையம், நட்பு போன்ற இடங்களிருந்து தவறான தகவல் பெறப்பட்டு, நிலைமை மோசமாகலாம்.

கவனமாக இருக்கவும்.

அதற்காக, ரொம்பவும் பயமுறுத்த வேண்டாம்!!

உங்கள் மருத்துவரின் உதவியை நாடவும்.
[உங்க ஃபீஸைக் கறக்குறதுல குறியா இருங்க எனக் கோவியார் கிண்டலடிக்கிறார்! :)) ]

முறையாகச் செய்தால், மற்றவர்கள் செய்யக்கூடிய எதையும் இவர்களும் செய்யலாம்.

எவ்வளவு செய்யலாம் என்பதில்தான் கவனமாக இருக்கணும்.

எனவே பயப்படத் தேவையில்லை.

பிறப்பிலேயே வரும் குறைபாடுகளைப் பற்றி இதுவரை பார்த்தோம்.

இவை தவிர, பெரியவர்களுக்குச் சொன்ன இன்னபிற குறைபாடுகளும் நோய்களும் இவர்களுக்கும் வரலாம்..... அவர்களுக்குச் சொன்ன அதே காரணங்களால்!

இதில் முக்கியமானவை,

ருமாடிக் இதய நோய் [Rheumatic heart disease]
கார்டியோமையோபதி [Cardiomyopathy]
சிக்கிள் ஸெல் நோய் [Sickle Cell Disease]
ரத்த அழுத்த நோய் [Hypertensive heart disease]

மற்ற உறுப்புகளில்[Kidney. Liver, Brain, Lungs] ஏற்படும் கோளாறுகளால் இவை வருவதால், சிறு குழந்தைகளுக்கும் இக்கோளாறுகள் உண்டானால் இவை வரலாம்.

அறிகுறிகளும், சிகிச்சை

முறைகளும் பெரியவர்களுக்குச் சொன்னது போலத்தான்.

இதயத்தைப் பற்றி, அதில் ஏற்படக்கூடிய கோளாறுகள், குறைபாடுகள், நோய்கள் பற்றியும், அவற்றை எப்படி எதிர்கொள்ளலாம் என்பதைப் பற்றியும், எனக்குத் தெரிந்த அளவில் சொல்ல முயன்றிருக்கிறேன்.

எல்லாவற்றையும் சொல்லிவிட்டேன் எனச் சொல்ல முடியாது.

[குறிப்பாக, மனவியல் ரீதியாக இதயத்தில் ஏற்படும் கோளாறுகள்!! அதற்கு டாக்டர் மாத்ருபூதம் நிறையச் சொல்லியிருக்காருங்கோ என வடுவூர் குமார் சிங்கையிலிருந்து கூவுகிறார்! :)) ]

இன்னும் எத்தனையோ நுட்பமான தகவல்கள் சொல்லாமல் விடப்பட்டிருக்கின்றன.

ஆனால், பொதுவாக எல்லாருக்கும் தேவையான தகவல்களைச் சொல்லியிருக்கிறேன் எனவே நம்புகிறேன்.

குணமிருந்தால் கொண்டு, குற்றமிருந்தால் தள்ள வேண்டுகிறேன்.

இது குறித்து, ஏதேனும் மேலும் அறிய வேண்டுமெனில், உங்கள் மருத்துவரை நாடுங்கள். [கோவியார் அகெய்ன்!!]

வேண்டுமெனில், எனக்குத் தனிமடலிட்டுக் கேட்கவும்.
தெரிந்தவரையில் சொல்ல முயல்கிறேன்.

பொறுமையாக இதனைப் படித்து, பின்னூட்டமிட்டு, கேள்விகள் கேட்டு, ஊக்கமளித்த அனைவருக்கும் எனது மனமார்ந்த நன்றிகளைத் தெரிவித்துக் கொள்கிறேன்.

இதனை எழுத என்னைத் தூண்டிய பொன்ஸுக்கு மீண்டும் ஒருமுறை நன்றி தெரிவித்துக்கொண்டு,

எல்லாரும் எல்லா நலனும் பெற்று, நல்லிதயம் கொண்டோராய் வாழ,

"எல்லாம் வல்ல முருகனருள் முன்னிற்கும்"!!

எனக்கூறி, இந்த "லப்-டப்" தொடரை நிறைவு செய்கிறேன்.

வணக்கம்! வாழ்க!

"லப்-டப்" -- 23 "பொன்ஸை விரும்பும் பூமியிலே!"

2007-05-31T18:40:00.000-07:00

"லப்-டப்" -- 23 "பொன்ஸை விரும்பும் பூமியிலே!"

எனது இனிய நண்பர் பொன்ஸ் சொன்னதைத் தொடர்ந்து இந்த "லப்-டப்" தொடரை ஆரம்பித்து, அநேகமாக முடியும் இடத்திற்கு வந்திருக்கிறது!

எனக்குத் தெரிந்த அளவில் சாதாரணமாக நமக்கு வரக்கூடிய இதய நோய்களைப் பற்றி, இதுவரை ஓரளவு சொல்லியிருக்கிறேன்.

இன்னும் ஒன்றே ஒன்று மீதமிருக்கிறது.

குழந்தைகளுக்கு வரக்கூடிய இதய நோய்களைப் பற்றி, சுருக்கமாகச் சொல்லி, இந்தத் தொடரை முடிக்க எண்ணுகிறேன்.

குழந்தைகளுக்கு வரும் இதயநோய், இருவகைப்படும்.

பிறப்பிலேயே வருவது[congenital]; பின்னர் வருவது[acquired] என.

எனவே, இதனை ஒன்றொன்றாகப் பார்ப்போம்.

பிறப்பிலேயே வருவன:[congenital]

எதெது எப்படி நிகழ வேண்டும் என்ற ஒழுங்கில்லாமல், அதது, அல்லது, ஒரு சிலது மாறுபடுவதால் ஏற்படுவன இவை!

இதயத்தின் ரத்த ஓட்டம் எப்படி நிகழ வேண்டுமோ, அப்படி நிகழாமல், கருவில் குழந்தை வளருகையில் ஏற்படும் குறைபாடுகளால் சில கோளாறுகள் நிகழ்கின்றன.

ஒரு சிறு ஓட்டையில் தொடங்கி, மொத்த இதய அமைப்பே மாறுபடும் வரை இது நிகழலாம்.

இதை இரு வகையாகப் பிரிக்கலாம்.

1. ஓட்டைகள்: [holes]

இதயத்தின் வலது, இடது பக்கங்களைப் பிரிக்கும் தடுப்புச் சுவரில் உண்டாகும் குறைபாடால், ஒரு ஓட்டை ஏற்பட்டு, சுத்த, அசுத்த ரத்தங்கள் கலக்கும் அபாயம் நிகழ்கிறது.

ஏ.எஸ்.டி.[Atrial Septal Defect]

வலது, இடது ஆரிக்கிள்களுக்கிடையே உண்டாகும் ஓட்டை இது.
பிராணவாயு[Oxygen] நிரம்பிய வலது ஆரிக்கிள், இது குறைந்த இடது ஆரிக்கிளுடன் கலக்கிறது.

பாதிக்கும்[50%] மேற்பட்ட இந்தவகை ஓட்டைகள் தானே மூடிக் கொளுகின்றன; சிகிச்சை ஏதும் இல்லாமலேயே, ஓட்டையின் அளவு சிறிதாக இருக்கையில்!

பெரிய ஓட்டைகள் அறுவை சிகிச்சையின் மூலம் சரி செய்யப்படும்.

வி.எஸ்.டி.[Ventricular Septal Defect]

வலது, இடது வெண்ட்ரிக்கிளுக்கிடையில் உண்டாகும் ஓட்டை இது.

மேலே சொன்னதற்கு எதிர்மாறாய், சுத்த ரத்தம் இப்போது இடத்திலிருந்து, வலதுக்குச் செல்லுகிறது.

சிறிய ஓட்டைகள் பெரிதான விளைவுகளை ஏற்படுத்துவதில்லை.
ஆனால், பெரிய ஓட்டையால், இரு பகுதி ரத்தங்களும் கலப்பதால், ரத்த அழுத்தம் அதிகமாகி, நுரையீரலும் இதனால் பாதிக்கப்பட்டு, மோசமான விளைவுகள் ஏற்படுகின்றன.

2. வால்வுகளினால் ஏற்படும் பாதிப்புகள்: [Valvular disease]

ஆரிக்கிளில் இருந்து வெண்ட்ரிக்கிளுக்குச் செல்லும் வழியில் இருக்கும் வால்வுகளில் ஏற்படும் குறைபாடுகளால், நிகழ்வன.

ஸ்டினோஸிஸ்:[Stenosis] முழு அடைப்பு:

முழுதுமாக திறக்காமல் போதல். வழக்கத்தை விடவும் அதிக வேகத்துடன் இதயம் செயல்பட்டு இந்த வால்வைத் திறக்க செயல்படுகிறது.

அட்ரீஸியா[Atresia] குறையான வால்வ் :

பிறப்புக் குறைபாடால்[Birth defects], வால்வின் அளவு குறைந்து உருவாகிறது.
ரத்தம் செல்ல வழியில்லை இப்போது!

ரீகர்ஜிடேஷன்:[Regurgitation] மேலும், கீழும் செல்லுதல்:

வால்வ் சரியாகச் செயல்படாமல், ரத்தம் இருவழியாகவும், மேலும், கீழுமாக,இருபக்கமும் செல்லுகிறது.

இது எல்லா வால்வுகளும் நிகழலாமென்றாலும், பல்மோனரி வால்வில்[] நிகழுகையில், விளைவுகள் அதிகமாயிருக்கும்.

இப்போது மிகவும் அதிகமாய் நிகழும் ஒரு குறைபாடைப் பார்க்கலாம்.

டெட்ராலஜி ஆஃப் ஃபால்லட்[Tetrology of Fallot]

4 வித குறைபாடுகள் இதில் நிகழ்கின்றன.

பல்மோனரி வால்வ் அடைப்பு[Pulmonary valve Stenosis ]

அளவில் பெரிய வி.எஸ்.டி.[VSD]

இடது பக்கமே இருக்க வேண்டிய அயோர்ட்டா எனும் மஹாதமனி, வலது, இடது வெண்ட்ரிக்கிளின் மேல் அமைவது.[Over riding of the Aorta]

வலது வெண்ட்ரிக்கிள் வீக்கம்[Right Ventricular Hypertrophy]

இவற்றால், தேவையான அளவு ரத்தம், நுரையீரலில் இருந்து பிராணவாயுவை எடுக்க முடியாமல் போகிறது; இதனால் சக்தி குறைந்த ரத்தம் தொடர்ந்து உடலின் பல பாகங்களுக்கும் அனுப்பப்படுகிறது.

குழந்தை நீல நிறமாகிறது!

நீலக்குழந்தை[Blue Baby Syndrome] என்பது இதுவே!

இது உடனடியாக அறுவைசிகிச்சை மூலம் சரி செய்யப்பட வேண்டிய ஒன்று.

நிலைமையின் தீவிரத்தைப் பொருத்து, பிறந்த உடனேயேவோ, அல்லது சிறிது நாட்கள் கழித்தோ இது செய்யப்படாவிடில், உயிருக்கு ஆபத்து ஏற்படும்.

அறுவை சிகிச்சைக்குப் பின்னும், வாழ்நாள் முழுதும் மருந்து, மாத்திரைகள் சாப்பிடவும் வேண்டும்.

பெற்றோர்கள் இதற்கு தாமே பொறுப்பு என மனக்கவலை அடையக்கூடும்!

இவர்கள் செய்ய வேண்டியதென்ன?

இதை எப்படி கண்டு பிடிக்கலாம்?

இறுதிப் பதிவில் பார்க்கலாம்.

"லப்-டப்" -- 22 "ரத்தமிங்கு உறையட்டும்"

2007-05-16T18:38:00.000-07:00

"லப்-டப்" -- 22 "ரத்தமிங்கு உறையட்டும்"

ஆதிகாரணி[Primary Factor] ஒன்று, உறைகாரணிகள்[Clotting Factors] 12, எனச் சொன்னேன் முன் பதிவில்!

வான் வில்லி ப்ராண்ட் காரணி[Von Willi Brandt Factor] என ஒன்று ரத்தத்தில் இருக்கிரது.

கொல்லாஜென்[collagen] ப்ளேட்லெட்டுகளோடு சேர்ந்து ரத்தம் உறைய இந்த வான் வில்லி ப்ராண்ட் காரணி[vwbF] உதவுகிறது.

ப்ளேட்டுகளின் மேல் இருக்கும் க்ளைகோ ப்ரொடீன்களோடு[Glycoproteins], கொல்லாஜென் இழைகள் சேர்ந்து ரத்தம் உறைய இந்த வா.வி.ப். காரணி ஒரு பாலமாக உதவுகிறது.

இந்தக் காரணியின் அளவு ரத்தத்தில் குறையும் போது வா.வி.ப். நோய்[V W B Disease] என்றழைக்கப்படுகிறது.

இப்போது உறைகாரணிகளைப்[Clotting Factors] பார்க்கலாம்.

இவை மொத்தம் 12 வகைப்படும், ஒன்று முதல் 12 வரை இதற்கு எண்கள் கொடுத்திருக்கிறார்கள்.

இது தவிர, தனித்தனியே சிலவாயில் நுழையாத பெயர்களும் இவற்றுக்கு உண்டு.

உள்வழிப்பாதைக்கு[Intrinsic Pathway] 8, 9, 10, 11, மற்றும் 12 உதவுகிறது.

மற்றவை வெளிவழிப்பாதைக்கு.[Extrinsic Pathway]

இவற்றில் ஏற்படும் குறைபாடுகளால் ரத்தம் உறைவதில் தடுமாற்றம் வரும்.

இங்கு நான் மிகவும் பொதுப்படையாகச் சொல்லி வருகிறேன்.

குறிப்பிட்ட குறைபாடுகளால் வரும் நோய்கள் மிகவும் அரிது, அபூர்வம் என்பதால் இப்படி!!

இப்போது சில முக்கியமான நோய்களைப் பார்ப்போம்!

ஹீமோஃபீலியா A: [Hemophilia A]

இது ஒரு பரம்பரை நோய்.

உறைகாரணி 8 -ன் குறைபாட்டினால் வருவது இது.

பொதுவாக மூட்டுகளில் ரத்தப்போக்கு ஏற்பட்டு, இது உறைய தாமதமாகும்.

ஒரு சின்ன காயம் பட்டாலும், ரத்தப்போக்கு சீக்கிரமாக நில்லாது போகும் இக்குறைபாடு உள்ளவர்களுக்கு.

உறைகாரணி 8 செயற்கையாக உடலுள்ளே செலுத்தப்பட்டு, இக் குறைபாடைத் தவிர்க்க முடியும்.

ஹீமோஃபீலியா B: [Hemophilia B]

காரணி 9-ன் குறைபாட்டால் இது நிகழ்கிறது.

ரத்தம் உறைய அதிக நேரம் ஆகிறது இப்போது.

வா.வி.ப். குறைபாடு:[V W B Deficiency/Disease]

ப்ளேட்லெட்டுகள் ஒன்று சேர்வது தடைப்பட்டு, காரணி 8-ன் வேலையைத் தடுக்கிறது இது.

பொதுவாக, வார்ஃபேரின்[Warfarin], ஹெபாரின்[Heparin] என்னும் மருந்துகள் இந்த வகை நோய்களுக்கு உதவுகின்றன.

நாம் சாதாரணமாக, தலைவலி போன்றவற்றிற்கு உபயோகிக்கும் ஆஸ்பிரின்[Aspirin] மாத்திரையைப் பற்றி ஒரு வார்த்தை.

ப்ளேட்லெட்டுகள் ரத்தம் உறைவதற்கு மிகவும் தேவையான ஒன்று.

ஒரு காயம் ஏற்பட்டு ரத்தப்போக்கு தொடங்கும் போது, இந்தப் ப்ளேட்லெட்டுகள் அதிகமாகி, ரத்தம் உறைய உதவுகிறது.

ஆஸ்பிரின் இந்த செயலைத் தடுக்கிறது.

இது இருவகைகளில் செயல்படுகிறது!

ரத்தம் உறையக்கூடாத நிலையில் இருக்க வேண்டிய இதய நோயாளிகளுக்கு இது ஒரு வரப்பிரசாதம்!

ஆனால், உறைகாரணிக் குறைபாடு இருப்பவர்களுக்கு இது ஒரு ஆட்கொல்லி!

இதில், எல்லாவற்றையும் நான் சொல்லவில்லை.....

மேற்கொண்டு அதிக விவரம் வேண்டுவோர், பின்னூட்டத்தில் கேட்கவும்.

"லப்-டப்" -- 21 "ரத்தம் உறையும் நேரம்"

2007-05-08T20:32:00.000-07:00

"லப்-டப்" -- 21 "ரத்தம் உறையும் நேரம்"

"டாக்டர்! என் பையனுக்கு அடிபட்டுதுன்னா ரத்தம் கொட்டிகிட்டே இருக்கு. நிக்கவே மாட்டேங்குது. இது எதனாலே?" என கவலையுடன் கேட்டார் பாஸ்கர்.

இதற்கு விளக்கம் சொல்ல ஆரம்பித்தேன்.

"ஒரு அடி படுது.

ரத்தம் வருது.

இது அப்படியே வந்துகிட்டு இருந்தா என்ன ஆகும்?

எல்லா ரத்தமும் வெளியேறிடும்.

ஆனா, பொதுவா என்ன நடக்குது?

கொஞ்சம் ரத்தம் ஊத்துது.

பிறகு நின்று போகிறது.

இதற்கு ரத்தம் உறைந்து போகுதல்[Hemostasis] எனப் பெயர்.

இது நான்கு நிலைகளில் நிகழ்கிறது.

1. பாதிக்கப்பட்ட ரத்தக்குழாயின் வழியே வரும் ரத்தஓட்டம், நாளம் சுருங்குவதால் குறைகிறது.

2. ப்ளேட்லெட்டுகள்[Platelets] என முன்னம் பார்த்தோமே, அவை "த்ராம்பின்"[Thrombin] என்னுமொரு பொருளால், அடிபட்ட இடத்தில் குவிய ஆரம்பிக்கிறது.

ஒரு தாற்காலிக அடைப்பானாக[Plug] இது செயல்பட்டு ரத்த ஓட்டத்தை இன்னும் கட்டுப்படுத்துகிறது.

இந்தத் அடைப்பான்[Plug] இன்னும் பல ப்ளேட்லெட்டுகளை இந்தக் கட்டுக்குள் நிறுத்தி, இன்னும் இறுக்கமாகிறது.

இவற்றிலிருந்து சுரக்கும் சில புரதப்பொருள்கள் இந்தத் தடுப்பானை ஒரு கெட்டியான அடைப்பானாக மாற்றுகிறது.

3. இது சற்று நேரத்தில், ஒரு தடுப்பானாக[Blood clot]] மாறி ஒரு கட்டிப்பொருளாக ஆகிறது.

4. ரத்த ஓட்டம் இவ்வாறு தடைப்பட்டதின் செயல் முடிந்ததும், இது கரைய வேண்டும்!

இதற்கு ரத்தத்தில் இருக்கும் ப்ளாஸ்மின்[Plasmin] என்னும் ஒரு பொருள் உதவுகிறது.

இது மாதிரியான ரத்தக்கட்டி உருவாக, இரு வகையில் செயல்பாடு நடக்கிறது.

ஒன்று, உள்ளிருந்து உள்வழியாக[Intrinsic Pathway]; அடுத்தது, வெளிவழியாக[Extrinsic Pathway].

தனித்தனியே இவை இரண்டும் நிகழ்ந்தாலும், ஒரு இடத்தில் ஒன்று சேர்கின்றன, ரத்தக்கட்டியாகும் போது!

எதற்காக இப்படி இருவழிகள் என்க் கேட்கிறீர்களா?

இயற்கைக்குத் தெரியும் இது தேவையென!

உள்ளேயே சில சமயங்களில், அடிபடாமலேயே, பல காரணங்களால், [புகை பிடிப்பதால் நாளம் நொறுங்கிப் போய், ரத்த அழுத்தம் அதிகமாகி நாளம் நெளிந்து, இப்படி பல] ரத்த நாளம் உடைந்து உள்ரத்தப் போக்கு[Internal bleeding] நிகழலாம்.

இப்போது, சிவப்பு அணுக்களாலேயே[RBC's] ரத்தக்கட்டி உருவாகி,ரத்தப்போக்கு கட்டுப்படுத்தப்படும்.

இதற்கு "உள்வழி"[Intrinsic pathway] மட்டுமே போதும்.

வெளிக்காயம் மூலம் ஏற்படும் ரத்தப்போக்கைக் கட்டுப்படுத்த, "வெளிவழி"[Extrinsic Pathway] உதவும்.

இந்த இருவழிகளும் நிகழ்வதற்கு ரத்தத்தில் இருக்கும் சில புரதப்பொருள்கள்[Protein substances] துணை புரிகின்றன.

இவற்றிற்கு, "உறை காரணங்கள்"[Clotting Factors] எனப் பெயர் சொல்லலாம்.

ஆனால், இவற்றிற்கெல்லாம் ஒரு ஆதிகாரணம் இருக்கிறது!

அது பற்றியும், இந்த "உறை காரணங்களைப்" பற்றியும்......

அடுத்த பதிவில்!!

இங்கு சொல்லியிருப்பதெல்லாம் ஒரு தகவலுக்காகவே!
உங்கள் மருத்துவரைக் கலந்து ஆலோசிப்பதே சிறப்பான வழி!

"லப்-டப்" -- 20 "நெஞ்சு பொறுக்குதில்லையே!"

2007-04-25T20:53:00.001-07:00

"லப்-டப்" -- 20 "நெஞ்சு பொறுக்குதில்லையே!"

இதயத்தைப் பாதிக்கும் இன்னும் சில நோய்களைப் பற்றிச் சுருக்கமாக இப்பதிவில் பார்ப்போம்.

1. ஹைப்பர்ட்ரோஃபிக் கார்டியோமையோபதி [Hypertrophic Cardiomyopathy]:

இதயம் என்பது முழுக்க, முழுக்க சதையால் ஆன ஒரு உறுப்பு என முதலில் சொல்லியிருந்தேன்.

மற்ற தசை உறுப்புகள் போலவே, இதுவும் தடிமனாக[thickening] முடியும்!

நிமிடத்திற்கு 72 முறை சுருங்கி விரியும் தன்மை கொண்ட இதயம், தடிமனானால் இந்த வேலை தடைப்படுகிறது.

பொதுவாக வலது, இடது பகங்களைப் பிரிக்கும் தடுப்புச்சுவரே[[septum] அதிகமாக தடிமனாகும் வாய்ப்பு உள்ளது.

இப்படி ஆகும் போது, இடது வெண்ட்ரிக்கிளில் இருந்து அயோர்ட்டாவுக்கு அனுப்பப்படும் ரத்தத்தின் அளவு குறைய நேருகிறது.

இதற்கு, "வெளிச்செல்லும் ரத்த ஓட்டத் தடை"[Outflow tract obstruction] எனப் பெயர்.

பல்வேறு மாற்றங்கள் இதயத்துக்குள் இதனால் நிகழ்கிறது.

1. இதயத்தின் கொள்ளளவு குறைகிறது.

2. ஆனால், இதயத்திற்கு வரும் ரத்தத்தின் அளவு அப்படியே இருப்பதால், அதிக அளவில் ரத்தம் உள்ளே செல்ல முயல்கிறது.

3. இதனால், உட்செல்ல முடியாத ரத்தம் பின்தங்குகிறது.

4. இடது வெண்ட்ரிக்கிள் அயோர்ட்டாவிற்கு வழக்கத்தை விடக் குறைவாக ரத்தத்தைச் செலுத்துகிறது.

5. இதனால் அதிகப்படியான ரத்தம் இ.வெண்ட்ரிக்கிளில் தங்கி, இதன் அளவு பெரிதாகிறது.

6. அதிகப்படியான ரத்தம் இ.வெண்ட்ரிக்கிளில் தங்குவதால், இதன் சுருங்கி விரியும் தன்மை தடைப்படுகிறது.

500 பேருக்கு ஒருவர் என்ற கணக்கில் இது நிகழ்வதாக, புள்ளிவிவரம் சொல்லுகிறது!

பரம்பரையாகவோ, அல்லது அதிக ரத்த அழுத்தத்தின் காரணமாகவோ, அல்லது, காரணம் ஏதுமின்றியோ, இது வரலாம்.

இதன் அறிகுறிகள்:

நெஞ்சுவலி,

மார்புப் பகுதியில் ஒரு அழுத்தம்,

மூச்சு வாங்குதல்,

திடீரென மயக்கம் வருதல்,

மார் படபடப்பு,

திடீர் மரணம்

இதன் அறிகுறிகள் ஏதேனும் தோன்றியவுடனேயே உங்கள் மருத்துவரைப் போய்ப் பார்ப்பது மிகவும் முக்கியம்.

ஒரு எளிய எக்கோகார்டியோகிராம்[echocardiogram] மூலம் இதனைக் கண்டுபிடித்து சிகிச்சையை உடனே தொடங்க முடியும்.

தள்ளிப் போடாதீர்கள்.

Excercise Stress Test எனப்படும் ட்ரெட்மில்[treadmill] சோதனை, மார்பு எக்ஸ்-ரே[Chest X-ray], ECG, கார்டியாக் கதீடெரைஸெஷன்[Cardiac Catheterization] போன்ற சில சோதனைகளும் செய்யப்படலாம்,... இதயத்தின் வேலைத்திறனைக் கண்டறிய.

நோயின் தீவிரத்தைப் பொறுத்து,மருந்து, மாத்திரைகள் மட்டுமோ அல்லது அறுவைச் சிகிச்சையோ செய்யும் நிலை வரும்.

தடுப்புச் சுவரின் தடிமனை நீக்கும் அறுவை சிகிச்சை[Septal Myomectomy], அல்லது இந்தச் சுவருக்கு ரத்தமளிக்கும் நாளத்தை செயலிழக்கச் செய்யும் அறுவை சிகிச்சை[Ethanol Ablation] போன்றவை தேவைப்படலாம்.

இது தவிர, இதயத்தின் வேலைத்திறனை அதிகரிக்கச் செய்யும் ஒரு கருவியை பொருத்துவதும்[Implantable Cardioverter Defibrillator] நிகழலாம்.

கூடவே, மற்ற சிகிச்சை முறைகளில் சொல்லியபடியே, வாழ்வுமுறை மாற்றங்களும்[Life stule changes] அவசியம்.

உணவுக் கட்டுப்பாடு, உடற்பயிற்சி, போன்றவற்றை உங்கள் மருத்துவர் உங்களுக்குச் சொல்லுவார்.

2. "பெரிகார்டைடிஸ்" [Pericarditis]எனும் இதயதைச் சுற்றி படர்ந்திருக்கும் ஒரு ஜவ்வுத் தோலில்[Fibrous membrane] ஏற்படும் நோய்.

இந்தத் தோல் வெளி, நடு உள்[Outer, middle, inner] என மூன்று படிமங்களில் ஆனது.இவற்றுக்கு இடையே உராய்வைத்[Friction] தடுப்பதற்காக ஒரு திரவம் சுரக்கிறது.

உடலின் மற்றப் பாகங்களில் ஏற்படும் நோய்களின்[Infections] காரணமாக இதுவும் பாதிக்கப்படலாம்.

உடனடியாகவோ, [அ] கொஞ்சம் கொஞ்சமாகவோ இது வரக்கூடும்.

நெஞ்சுவலி, ஜுரம், இதயத்தின் அளவு பெரிதாதல்[Hypertrophy] போன்றவை இதன் அறிகுறிகள்.

ஈ.சி.ஜி., எக்ஸ்-ரே மூலம் இது கண்டுபிடிக்கப்படும்.

மருந்து மாத்திரைகள் மூலம் இதை குணப்படுத்த முடியும்.

அபூர்வமாக, இந்தத் தோலையே அறுவை சிகிச்சை மூலம் அகற்ற வேண்டிய நிலையும் ஏற்படலாம்.

3. "இதய வால்வுகளைத் தாக்கும் நோய்"[Valvulitis, Valve disease]:

மைட்ரல், ட்ரைகஸ்பிட், அயோர்டிக், பல்மோனிக் என 4 வால்வுகள் இதயத்திற்குள் இருப்பதாக முன்னொரு பதிவில் சொல்லியிருந்தது நினைவிருக்கலாம்!{??}

ஒரு குறிப்பிட்ட வழியாக ரத்தத்தை அனுப்பும் பணியை இவைகள் செய்கின்றன.

இவை சரியாக வேலை செய்யாத போது ரத்த ஓட்டம் சீர்குலைகிறது.

வால்வுகள் குறுகிப் போவதாலோ[narrowing], [அ] சரியாக மூடித் திறக்காததாலோ[incomplete closing] இந்த நிலை வருகிறது.

பிறப்பிலேயே சில குறைபாடுகளால் இது பெரும்பாலும் நிகழ்கிறது.

சிறுவயதில் குழந்தைகளுக்கு வரும் ருமாட்டிக் காய்ச்சல்[Rheumatic Fever] இன்னுமொரு காரணம்.

இவை தவிர வேறு பல காரணங்களும் உண்டு.

அவை பெரும்பாலும் முக்கியமானவை அல்ல என்பதால் தவிர்க்கிறேன்.

அறுவை சிகிச்சை மூலமே பெரும்பாலும் இதை சரி செய்ய முடியும்.

படபடப்பு, அதிகம் வேலை செய்ய முடியாமை, சுத்த, அசுத்த ரத்தங்கள் கலந்து போகும் அபாயம் இருப்பதால் வரும் உடல் நீலமாதல் போன்றவை இதன் அறிகுறிகள்.

அநேகமாக இதயத்தைப் பற்றிய எல்லாவற்றையும் தொட்டிருக்கிறேன் என நினைக்கிறேன்.

இன்னும் சொல்ல வேண்டிய இரு பதிவுகள்:

1. ரத்தம் ஏன், எப்படி, எதனால் உறைகிறது?

2. குழந்தைகளுக்கு வரும் இதய நோய்கள்.

இவை பற்றி, அடுத்து வரும் பதிவுகளில் பார்ப்போம்.

"லப்-டப்" 19 "அனுஷா அனுஷா அனுஷா!"

2007-04-12T07:01:00.000-07:00

"அனுஷா அனுஷா அனுஷா!"

"IT'S NOT HOW GOOD WE ARE, BUT WHAT GOOD THINGS WE DO!!

[எவ்வளவு நல்லவன் நீ என்பதல்ல; எத்தனை நல்லவை செய்தாய் என்பதே!]

"லப்-டப்" -- 19 "நெஞ்சமொன்று கடனாகத் தருவாயா?"

கந்தசாமியை செந்தில்நாதன் பார்த்துக் கொள்ளட்டும்!

நாம் இதய பலவீனம் {heart failure] சம்பந்தமான சில சிகிச்சை முறைகளைப் பார்க்கலாம்.

4 நிலைகளாகப் வகைப்படுத்தலாம் இதயப் பலவீனத்தை எனப் பார்த்தோம்.

ஒவ்வொரு நிலைக்கும் தக்க மாதிரி சிகிச்சை முறைகளும் அமையும் எனவும் கண்டோம்.

அதில் சில முறைகளைச் சுருக்கமாக இப்போது கவனிப்போம்.

இதயத் துடிப்பை ஒழுங்குபடுத்தல்[Cardiac Resynchronization Therapy; CRT]

1. பேஸ்-மேக்கர்[Cardiac Pace Maker]:

வலது ஆரிக்கிளில் இருக்கும் எஸ்.ஏ. நோட்[SA node] எனும் இடத்திலிருந்துதான் இதயத் துடிப்பின் அளவு நிர்ணயிக்கப்படுகிறது என முன்னொரு பதிவில் சொல்லியிருந்தேன்.
இதயம் சோர்வடையும் போது இந்த நோடின்[node] மூலம் மின்சார அதிர்வுகள் குறைய ஆரம்பித்து, இதயத் துடிப்பு சீராக அடிக்க மறுக்கிறது.
இதை ஒழுங்குபடுத்த பேட்டரியால் இயங்கக்கூடிய ஒரு மின்சாரக்கருவி நம் உடலில் பொருத்தப் படுகிறது.
இதற்கு "பை-வெண்ட்ரிகுலர் பேஸ் மேக்கர்"[Bi-Ventricular Pace-Maker] எனப் பெயர். இடது பக்க மார்பில் [அ] வயிற்றுப்பகுதியில்[abdomen] தோலுக்குக் கீழே இக்கருவி பொருத்தப்பட்டு, அங்கிருந்து சில ஒயர்கள்[wires] வல்து ஆரிக்கிள், வலது, இடது வெண்ட்ரிக்கிள்களுக்குள் செலுத்தப்பட்டு, இப்பகுதிகளின் இயக்கம் ஒழுங்கு படுத்தப் படுகிறது.
முன்கூட்டியே அளவை செய்யப்பட்ட [Pre-set]இலக்குக்குக் கீழே இதயத் துடிப்பு இறங்கும் போது, இந்தக் கருவி செயல் படத் துவங்கி, துடிப்பைச் சீராக்க உதவுகிறது.
அதே போல், அளவுக்கு மேலாகத் துடிக்கும் நேரங்களிலும் இந்தக் கருவி செயல்பட்டு சரியான அளவுக்குக் கொண்டு வரும்.

ஒரு தொலைபேசி இணைப்பின் மூலம், இந்த அளவைகள் உங்கள் மருத்துவரின் கணினிக்கு மாற்றப்பட்டு, அவரால் இதை கண்காணிக்க முடியும்.
2,3 நிலைகளில் இருப்பவர்களுக்கு இக்கருவி மூலம் பயன் கிடைக்கும்.

2. கார்டியாக் டீ-ஃபிப்ரிலேடர்[Cardiac De-Fibrillator]:

இது அற்புதமான கணினிக் கருவி. இதயத்தின் துடிப்பை உள்ளிருந்தே சரிசெய்யும் கருவி.

இதுவும் பேஸ்-மேக்கர் போலவே பொருத்தப்படும்

நோயின் தீவிரத்தைப் பொறுத்து மேற்கூறிய இரு கருவிகளுமே ஒருவருக்குப் பொருத்தப்படலாம்.

3. VAD

இவையெல்லாம் பலனளிக்காமல், இதய பலவீனம் 3 [அ] 4-ம் நிலையில் இருக்கையில் இதய மாற்று அறுவை சிகிச்சை தேவையென ஆகும் போது, மாற்று இதயம் கிடைக்கும் வரை,ஒரு தற்காலிக ஏற்பாடாக VAD[Ventricular Assist Device] "வெண்ட்ரிக்கிளுக்கு உதவி செய்யும் கருவி" பொருத்தபடலாம்.
பழுதான வெண்ட்ரிக்கிளை மட்டும் வெளியிலிருந்து இயக்கும் இக்கருவியைப் பற்றிய மேல் விவரங்கள் வேண்டுவோர் உங்கள் மருத்துவரை அணுகினால், விவரமாகக் கூறுவார்.

4."டோர் சிகிச்சை"[DOR Procedure]:

பழுதடைந்த இதயத் திசுக்களை அறுவ சிகிச்சை மூலம் அகற்றும் ஒரு முறை இது. சாதாரணமாக இது செய்யப்படுவதில்லை. வேறு மாற்று வழிகள் பயனளிக்கா நிலையின் போதே இது செய்யப்படுகிறது.

5. பழுதடைந்த வால்வுகளையும், கரோனரி நாளங்களையும் அறுவைச்சிகிச்சை மூலம் சரி செய்வது இன்னொரு வகை. இவை பற்றி, "இதயத் தாக்குதல்"[Heart attack] பதிவுகளில் முன்னரே பார்த்தோம்.

6. "இதய மாற்று அறுவை சிகிச்சை" [Heart Transplant]:

இறந்து போன ஒருவரின் இதயம் அவரது குடும்பத்தினரின் ஒப்புதலின் பேரில் தானமாக அளிக்கப்பட்டு, மற்றொருவருக்குப் பொருத்தப் படலாம். மூளை இயக்கம் நின்று போனதால்[Brain dead] இறந்ததாக முடிவு செய்யப்பட்ட ஒருவரின் இதயம் இன்னும் சற்று நேரத்திற்கு இயங்கிக் கொண்டுதான் இருக்கும்.
டோபமின்[Dopamine] என்னும் மருந்தின் உதவியோடும், நுரையீரலை வெளியிலிருந்து இயக்குவதன் மூலமாகவும் மேலும் சில மணி நேரங்களுக்கு இதயத்தை இயக்கத்தில் வைத்திருக்க முடியும்.
இந்த நேரத்திற்குள், மாற்று இதயம் தேவைப்படும் சரியான , பொருத்தமான நோயாளிக்கு இது பொருத்தப்பட வேண்டும்.

[இந்தப் பதிவு எழுதும் இந்நேரத்தில், நேற்றைய தினம் பள்ளிக்குச் செல்லும் போது ஒரு கார் மோதி, மரணமடைந்த என் தமிழ்நண்பரின் 12 வயதுக் குழந்தை அனுஷாவின் இதயம் யாரோ ஒருவருக்குப் பொருத்தப்படுகிறது என்னும் செய்தியை உங்களுடன் பகிர்ந்து கொண்டு, அந்தக் குழந்தைக்காகவும், அவர் குடும்பத்தினர்க்காகவும் ஒரு நொடி பிரார்த்தியுங்கள் என வேண்டிக் கேட்டுக் கொள்கிறேன்]

இதற்கு மேல் தொடர மனமில்லை.

[அனுஷாவின்]இதயம் மீண்டும் தொடரும்!

இதைக் கேளுங்கள்!

[இதில் சொல்லப்பட்டிருப்பவை உங்கள் தகவலுக்கு மட்டுமே.
முறையான சிகிச்சைக்கு உங்கள் மருத்துவரை அணுகவும்.]

"லப்-டப்" -18 " கவிதை வாங்கி வந்தேன்"

2007-03-31T21:19:00.000-07:00

"லப்-டப்" -18 " கவிதை வாங்கி வந்தேன்! "

{இதற்கு முந்தைய பதிவை[17] பக்கத்தில் திறந்து வைத்துக் கொள்ளவும். இது இன்னும் சற்று நன்கு புரியலாம்!}

வீட்டுக்குள் நுழைந்ததும் முதல் வேலையாக தெய்வநாயகி அம்மாள் தன் தம்பி செந்தில்நாதனுக்கு ஒரு ஃபோன் போட்டார்.

"தம்பி! மாமாவுக்கு உடம்பு சரியில்லை. டாக்டர் என்னமோ டெஸ்டுல்லாம்[test] எடுத்துக்கணும்னு சொல்றாரு. நீ உடனே வள்ளியம்மையைக் கூட்டிகிட்டு உடனே புறப்ப்பட்டு வா. நீ கூடமாட இருந்தா எங்களுக்கும் ஒரு தெம்பா இருக்கும்"

சரிக்கா! மாமாவை தெகிரியமா இருக்கச் சொல்லு. நாங்க ஒடனே புறப்படறோம்" என்றார் செந்தில்நாதன்.

சொன்னபடியே மறுநாள் வள்ளியம்மையுடன் வந்து சேர்ந்தார் செந்தில்நாதன்.

"நான் டாக்டருகிட்ட பேசிட்டேன். ஒண்ணும் பயமில்லைன்னு சொல்றாரு. நாளைக்கு போய் பார்ப்போம். எல்லாம் சரியாயிடும். அதான் நான் வந்துட்டேன்ல" என்று சிரித்துக்கொண்டே சொன்னார்.

மறுநாள் இருவருமாக [க.சா+செ.நா] டாக்டரைப் போய்ப் பார்த்தனர்.

எடுக்கப்பட வேண்டிய எல்லா டெஸ்டுகளும் எடுக்கப்பட்டன.

எல்லாவற்றையும் கவனமாகப் பார்த்துவிட்டு டாக்டர் சொல்ல ஆரம்பித்தார்.

"இந்த இதய பலவீனம் [Heart Failure] என்பது ஒரு தலைவலி, ஜுரம் மாதிரி டக்குன்னு வர்றதில்லை.
படிப்படியாத்தான் வரும்.
நான் அன்னிக்கு சொன்ன மாதிரி, மூச்சு வாங்குதல்ல ஆரம்பிச்சு, கொஞ்சம் கொஞ்சமா அதிகரிக்கும்.
சில பேரு தள்ளிப் போட்டுருவாங்க சில பேரு, உங்களைப் போல, உடனே டாக்டர்கிட்ட வந்திருவாங்க.
இதுல நாலு நிலை இருக்கு, மருத்துவ ரீதியா.

முதல் நிலை[Stage I]:
இதய பலஹீனம்[Heart Failure] வர்றதுக்கான காரணங்கள்[Risk Factors] அதிகமா இருக்கறவங்களை இதுல வைப்போம்.

ரத்தக்கொதிப்பு[Blood Pressure], நீரிழிவு[Diabetes], கரோனரி நாள நோய்[CAD], மது அதிகமாய் அருந்துபவர்கள், இதற்கு முன், முடக்கு ஜுரம்[Rheumatic Fever] வந்தவர்கள், குடும்பத்தில் எவருக்கேனும் இதய பலவீனம் வந்திருப்பவர்கள் இருந்தால்[Family history of Hear failure] இவர்களுக்கெல்லாம் இந்த நோய் வர அதிகம் சான்ஸ்[chance] இருக்கு.

இவங்க உங்களைப் போல மூச்சு வாங்குது டாக்டர்னு வந்தா, அவங்களை "முதல் நிலை" எனச் சொல்லுவோம்.

இரண்டாம் நிலை[Stage II]:
ஸிஸ்டாலிக் ஹார்ட் ஃபெயிலியர்[Systolic Heart Failure] சோதனையில் கண்டுபிடிக்கப்பட்டு, ஆனால், இதய பலவீனத்தீற்கான அறிகுறிகள் இதுவரை வராதவர்கள்[ no symptoms] இதில் அடங்குவர்.

ஈ.எஃப்[EF] 40%க்கு கீழ் இருப்பவர்கள் இவர்கள்.

மூன்றாம் நிலை[Stage III]:
அறிகுறிகள் வெளிப்படையாக[நிர்தர்ஸனமாக] தெரிய வரும் போது அவர்களை இந்த நிலையில் சேர்க்கலாம்.

அதிகமாக மூச்சு வாங்குதல்[Shortness of breath], அசதி[Fatigue] , வேலை செய்ய முடியாமல் போதல்[Excercise intolerance] இதெல்லாம் நன்றாகவே புலப்படும்.

நான்காம் நிலை[Stage IV]:
முறைப்படி கண்டுபிடிக்கப்பட்டு, சிகிச்சையும் தொடங்கப்பட்டு, அது பலனளிக்காமல் போனவர்கள் இருக்கும் நிலை இது!

"அதெல்லாம் சரி டாக்டர்! இப்ப எங்க மாமாவுக்கு எந்த ஸ்டேஜ்? அதைச் சொல்லுங்க. அத்தோட அந்தந்த ஸ்டேஜுக்கு என்ன ட்ரீட்மெண்ட் கொடுப்பீங்க. அதையும் சேர்த்தே சொல்லுங்க" என்றார் செந்தில்நாதன்.

மருத்துவர் தொடர்ந்தார்.

முதல் நிலைல இருக்கறவங்களைப் பத்தி அதிகமா கவலைப்பட வேண்டாம். ஒழுங்கா ரெகுலரா எக்ஸெர்ஸைஸ் பண்ணிகிட்டு, புகை பிடிக்கறதை விட்டுட்டு, மது, மாத்திரை இது மாதிரி பழக்கம் இருந்தா, அதுக்கெல்லாம் ஒரு டாட்டா பெர்மெனன்டா சொல்லிட்டு, ரத்தக்கொதிப்பு, நீரிழிவு நோயை முறையா கட்டுப்படுத்தினா போதும். இவங்க நார்மலுக்கு வந்திடுவாங்க.

இரண்டாம் நிலைக்காரங்களுக்கு, மேலே சொன்ன எல்லாத்துடன் கூட, ஏஸ்-1, பீட்டா ப்ளாக்கர் என்கிற மாத்திரை[ACE-1, Beta Blockers] கூட சேர்த்துக்கணும்.
தேவைப்பட்டா, அறுவைச் சிகிச்சையும் [Caronary artery revascularization, valve repair/ replacement] நடக்கலாம்.

மூன்றாம் நிலை: முதல் இரண்டு நிலைகளில் சொன்னதுடன் கூட, வேறு சில உபரி மாத்திரைகளும் சேர்க்கப்படும்.
அறுவை சிகிச்சையும் நிகழலாம்.
உணவு, எடை இவற்றில் கடுமையாகக் கவனம் செலுத்த வேண்டும்.

நான்காம் நிலையில் இருப்பவர்கள் பாடுதான் கொஞ்சம் கடினம்.
இதய மாற்ற அறுவை சிகிச்சை[Heart transplantation],
வெண்ட்ரிகிளை இயங்க வைக்கும் உபகரணங்கள் பொருத்துதல்[Ventricle assist devices],
வேறு சில அறுவை சிகிச்சைகள்[other surgical options],
ஆய்வுக்காக வந்திருக்கும் புது மாத்திரைகளைப் பரிசோதனைக்காக ஒரு 'கினி பிக்'[Guinea Pig] போல சோதனைக்கு உட்படுதல்[Research Therapirs], இவையெல்லாமும் பலனளிக்காத போது, இருக்கும் கொஞ்ச நாட்களையாவது அதிக கஷ்டம் இல்லாமல் செய்யும் வழிமுறைகள்[End of Life care] இதற்கு ஆளாக வேண்டியிருக்கும்."

"என்னங்க பயமுறுத்தறீங்க, மாமாவுக்கு இப்ப ...." என பதட்டமாகக் கேட்டார் மைத்துனர்!

"எல்லா டெஸ்டும் பண்ணியாச்சு. கந்தசாமி சாருக்கு வந்திருப்பது இப்ப இரண்டாம் நிலைன்னு சொல்லலாம். கொஞ்சம் சர்க்கரை நோய் இருக்கு. பி.பி.யும்[] கொஞ்சம் அதிகமாத்தான் இருக்கு.
இதையெல்லாம் கட்டுப்படுத்தணும்.
உப்பு, எண்னை இதையெல்லாம் குறைக்கணும்.
நேரத்துக்கு சாப்பிடணும்.
இந்த நொறுக்குத்தீனியெல்லாம் விட்டுறணும்.
சும்மா டேஸ்டுக்கு வேணுமின்னா சாப்பிடலாம்.
கூடவே மருந்து மாத்திரை சிலது எழுதித் தரேன்.
அதை வேளை தவறாம எடுத்துக்கணும்.
வாக்கிங் ரெகுலரா போயிட்டு வாங்க.
ரொம்ப தூரம் போக வேணாம்.
லேஸா மூச்சு வாங்க ஆர்மிச்சதுன்னா, பக்கத்துல நிழலல ஒரு இடத்துல ரெஸ்டு எடுத்துக்கங்க.
வெயில் வேளையில் நடக்க வேண்டாம்.
3 மாசத்துக்கு ஒரு தடவை செக்-அப்புக்கு வரணும்.
நடுவில் ஏதேனும் நோயின் அறிகுறிகள் அதிகமாகிற மாதிரி இருந்தா, உடனே எனக்கு ஒரு ஃபோன் போடுங்க.
இதெல்லாம் ஒழுங்கா செஞ்சுகிட்டு வந்தா, இதைப் பெருமளவில் கட்டுப்படுத்தலாம்.
பயப்பட வேண்டாம்" என்று சிரித்துக் கொண்டே சொன்னார் மருத்துவர்.

"என்கிட்ட சொல்லிட்டீங்கள்ல! கவலையை விடுங்க! நான் பார்த்துக்கறேன்." என்று சொல்லி செந்தில்நாதன் கந்தசாமியைக் கூட்டிக்கொண்டு வீடு திரும்பினார்.

நுழைந்ததுமே, கையில் ஒரு தட்டு நிறைய முறுக்கு, மசால் வடை, மைசூர்பாக்கு ஐட்டங்களோடு வள்ளியம்மை வரவேற்றார்!

"இதையெல்லாம் உள்ளே கொண்டு போயிடு. இதெல்லாம் மாமா கண்ணுல இனிமே காட்டவே கூடாது! இதெல்லாம் அவருக்கு ஆவாதாம் இனிமே!" என்று கண்டிப்புடன் சொன்னார் செந்தில்நாதன்.

"ஏங்க! என்ன சொன்னாரு டாக்டரு? மாமாவுக்கு ஒண்ணும் இல்லேத்தானே? "எனக் கவலையுடன் கேட்டார் வள்ளியம்மை.

டாக்டர் சொன்ன விஷயங்களை எல்லாம் ஆதியோடு அந்தமாகச் சொல்லி முடித்தார் செந்தில்.

"நாம ஒரு ஒரு மாசம் இங்கே தங்கி எல்லாத்தையும் சரியா ஒழுங்கு பண்ணிட்டுதான் ஊருக்கு போவப் போறோம். மாமாவுக்கு ஒண்ணும் பெருசா வந்துறலை. கவனமா இருந்தா எல்லாம் சரியாயிடும்" எனச் சொன்னதும் பெண்கள் இருவரும் சற்று மன நிம்மதி அடைந்தனர்.

இது தொடர்பான சில மேல்விவரங்களை அடுத்த பதிவில் காணலாம்.

[இங்கு சொல்லப்பட்டவை உங்கள் தகவலுக்காகவே!
மருத்துவரைக் கலந்து ஆலோசிக்கத் தவறாதீர்கள்!]

"லப்-டப்" -- 17 "காற்று வாங்கப் போனேன்!"

2007-03-20T20:35:00.000-07:00

"லப்-டப்" -- 17 "காற்று வாங்கப் போனேன்!"

"வர வர இப்பல்லாம் முன்ன மாரி வாக்கிங் போக முடியலை! கொஞ்ச தூரம் நடந்தாவே மேல்மூச்சு வாங்குது!" என்று சொன்னவாறே உள்ளே நுழைந்தார் கந்தசாமி.

"நானே சொல்லணும்னு இருந்தேன். அந்த காஸ் ஸிலிண்டரை கொஞ்சம் நகத்தி வையுங்கன்னு சொன்னதுக்கு, உங்களாலே முடியலியே அன்னிக்கு. அநாயசமா இதெல்லாம் பண்ணுவீங்க முன்னெல்லாம். நா சொல்லப்போவ நீங்க எங்கியாவது கோவப்படப் போறீங்களோன்னு விட்டுட்டேன்.எதுக்கும் நாளைக்கு நம்ம டாக்டரைப் போயி பார்த்துருவோம்." என்றார் அவர் மனைவி தெய்வானை.

மறுநாள் டாக்டரைப் போய் பார்த்தார். ஒருசில டெஸ்டுகள் செய்துவிட்டு, கந்தசாமியைப் பார்த்துச் சொன்னார்,
" உங்க இதயம் கொஞ்சம் பலஹீனமா இருக்கு. இனிமே நீங்க கொஞ்சம் உங்களைக் கட்டுப்படுத்திக்கணும். நான் எழுதிக் கொடுக்கற மாத்திரைகளைச் சாப்பிடுங்க. இன்னும் கொஞ்ச நாள் கழிச்சு மேலும் சில சோதனைகள் செய்யணும். எவ்வளவு தூரம் பாதிப்பு இருக்குன்னு பார்க்கணும்" என்றார்.

"என்ன டாக்டர்! கல்லுக்குண்டாட்டம் இருக்கேன். எனக்குப் போயி பலஹீனம் அது இதுன்னு சொல்லுறீங்களே! " என்று சிரித்தார் கந்தசாமி.

"இதையெல்லாம் அப்படி சாதாரணமா எடுத்துக்க வேணாங்க. சரியா ட்ரீட்மெண்ட் எடுத்துக்கலேன்னா, உயிருக்கே ஆபத்தாயிடும். " என டாக்டர் சற்று சீரியஸாகவே சொல்ல, கந்தசாமிக்கு பயம் பிடித்துக் கொண்டது.

"இதய பலஹீனம்னா என்னங்க. கொஞ்ச விவரமாச் சொல்லுங்க டாக்டர்" எனப் பரிதாபமாகக் கேட்டார்.

விவரமாகச் சொல்ல ஆரம்பித்தார் டாக்டர்.

"இதயம்தான் நம்ம உடல் முழுக்கவும் ரத்தத்தை அனுப்புற வேலையைச் செய்யுது. ஒரு நிமிஷத்துக்கு குறைஞ்சது ஒரு 72 தடவை சுருங்கி விரிஞ்சு ரத்தம் உடல் பூரா போவுது.
இந்த 'லப்-டப்' சரியான முறையிலே நடக்கலைன்னா, அதாவது, இதயத்தால ஒழுங்கா "பம்ப்" பண்ண முடியலைன்னா இதயம் பழுதாயிருக்குன்னு[Heart Failure] பொருள்.

பழுது ஆனதைச் சரி பண்ணினாத்தான், .....மருந்து, மாத்திரை மூலமாவோ, இல்லை,......
எந்தெந்த பார்ட்ஸெல்லாம் மாத்தணுமோ, அதையெல்லாம் மாத்தினா சரியா ஆயிடும்.
அதுலியும் சரியாகலைன்னா, புதுசாவே இதயம் மாத்துற அளவுக்குக் கூட போயிடலாம்."

"நெசமாவா? இது எதுனால எப்படி ஆவுது?" எனக் கவலையுடன் கேட்டார் கந்தசாமி.

"ரத்தத்தை பம்ப் செய்ய முடியாத போது, இதயத்தோட சுவர்கள்[Heart walls], அதாங்க நாலு பக்க சதையும், நீளமாகி[stretch]], தங்கியிருக்கிற ரத்தத்தை வைத்துக் கொள்ள ஆரம்பிக்குது.
அதேசமயம், இந்த சுவர்கள் கொஞ்சம் தடிமனாகி[thickening], இன்னும் கொஞ்சம் அழுத்தமா பம்ப் பண்ண முயற்சிக்குது.
நம்ம உடல்ல இருக்கிற சிறுநீரகம் இப்போ கொஞ்ச அதிகமா நீரையும்[fluids], உப்புச்சத்தையும்[sodium] வைச்சுக்க ஆரம்பிக்குது.
இப்போ நம்ம உடல் இன்னும் அதிகமா ஹார்மோன்களை சுரந்து, இதயத்துக்கு உதவியா அதை பழையபடி பம்ப் செய்ய முயற்சிக்குது.
முதலில், இது நல்ல பலனளித்தாலும், நாளாவட்டத்தில், இதன் வலிமையும் குன்ற ஆரம்பிக்கவே இதயம் பலவீனமாகுது.

இத்தோட இல்லை விஷயம்.

இதயத்துக்கு உதவி செய்யறதுக்காக இப்ப உடம்போட மற்ற பாகங்களான கால், கை, வயிற்றுப்பகுதி[abdomen], ஈரல்[Liver], நுரையீரல்[Lungs] இவையெல்லாம் நீரை இதயத்துக்கு அனுப்பாம, தங்க கிட்டயே வெச்சுகிட்டு, கெட்ட பொருளை[Waste products] மட்டும் அனுப்ப ஆரம்பிக்கின்றன.
இது எல்லாமா சேர்ந்து, உடம்பு கொஞ்சம் கனத்துப் போகுது. [congested]இதை "கனத்துப் போனதால வந்த இதய பலஹீனம்"[Congestive Cardiac[heart]Failure, CCF] அப்படீன்னு சொல்லலாம்."

"இதுக்கு என்ன காரணம்?" மீண்டும் அப்பாவியாய்க் கேட்டார் கந்தசாமி.

"முக்கியமான காரணம் நான் முன்னே சொன்னேனே, அந்த 'ஹார்ட் அட்டாக்'தான்.
கரோனரி நாள நோய்[Caronary Artery Disease] ஒருத்தருக்கு வந்துச்சுன்னா, அதனால இதயத்துக்கு வர்ற ரத்த ஓட்டம் தடைப்படுதுன்னு முன்னே பார்த்தோம்.
இந்த அட்டாக் சரியானாலும் வந்த இடத்துல ஒரு தழும்பை [scar]விட்டுட்டு போகும்.
அந்த இடத்தைச் சுத்தி, இருக்கற சதையெல்லாம் சரியா வேலை செய்யாமப் போயிடுது.
இது ஒரு முக்கிய காரனம்.

இதைத் தவிர, வேற மத்தக் காரணங்களும் இருக்கு.

கார்டியோமையோபதி[Cardiomyopathy] எனச் சொல்லப்படும் ஒரு நிலைமை இதயத்துக்கு வரலாம்.
மது அதிகமா அருந்துபவர்கள்[Excesive drinking], போதை மாத்திரை சாப்பிடுபவர்கள்[Illicit drugs], பிரசவகாலத்தில்[Pregnancy], அல்லது ஏதாவது கிருமிகளால் ஏற்படும் நோய்[Infectious diseases], அல்லது எந்தக் காரணமுமின்றியே இது வரலாம்!
அடுத்து, அதிகமான ரத்த அழுத்தம்[High Blood Pressure, இதய வால்வுகளில் ஏற்படும் குறைபாடுகள்[Cardiac valve defects], தைராய்டு சுரப்பியில் வரும் நோய், சிறுநீரக நோய், நீரிழிவு நோய், மற்றும் பிறவியிலேயே இருக்கும் இதயக் குறைபாடுகள்[Congenital Heart disease] இவற்றாலும் இந்த CCF ஏற்படலாம்."

"ஒண்ணு விடாம அத்தனையும் சொல்லிட்டிங்களே டாக்டர்! இந்த நோயெல்லாம் இருக்கறவங்க அத்தனை பேருக்கும் இது வந்தே தீருமா?" என்றார்.

"அப்படி நான் சொல்லவில்லையே, கந்தசாமி சார்! இவங்களுக்கெல்லாம் இது வர்றதுக்கு சான்ஸ் அதிகம்னு சொல்ல வரேன். இதெல்லாம் இல்லாமக் கூட வரலாம்னும் சொல்லியிருக்கேனே!" -- என்றார் டாக்டர்!

"இது வந்திருக்கான்னு எப்படித் தெரிஞ்சுக்கறது? இதுக்கான அறிகுறிகள் என்னென்ன?" -- கந்தசாமி.

டாக்டர்: " உங்களுக்கு வந்ததே, அதான் முதல் அறிகுறி! மூச்சு வாங்குதல் [Shortness of breath].
இதுவரைக்கும் சர்வ சாதாரணமா செஞ்சுகிட்டு இருந்த காரியமெல்லாம் இப்ப கொஞ்சம் கொஞ்சமா கடினமானதாத் தெரிய ஆரம்பிக்கும். பழைய படியே செய்ய முயற்சி பண்னினா மூச்சு வாங்கத் துவங்கும்.

நுரையீரலில் நீர் தங்குவதாலும் இது அதிகமாகலாம். அப்போது ஒரு கமறலான இருமலும் கூடவே வரும்.

ரத்த ஓட்டம் தடைப்படுவதால், மூளைக்கு ரத்தம் சரியாகப் போகாமல், தலைச்சுற்றல்[giddiness], மயக்கம்[fainting spell] இவை வரலாம்.

இதே காரணத்தால், உடலின் மற்ற பகுதிகளும் வலுவிழக்க ஆரம்பித்து, அசதி[weakness, tiredness] தோன்றும்.

இதயம் படபடவென[palpitations] அடிக்கத் துவங்கும். [இது அந்த இருபதில் வரும் படபடப்பு இல்லை!:)]

கால்வீக்கம், வயிற்றுப்பகுதி[abdomen] வீக்கம், இதனால் சற்று எடை அதிகரித்தல்.

நடு இரவில் திடீரென மூச்சுத் திணறல் ஏற்பட்டு விழித்துக் கொள்ளல்.

இவையெல்லாம் ஏற்படலாம்.

இதெல்லாம் மொத்தமா வராது!

படிப்படியாகத்தான் வரும்.

இப்ப நீங்க வந்த மாதிரி, முதல் அறிகுறி தெரிய ஆரம்பிச்ச உடனேயே மருத்துவரைப் போய் பார்த்தா, இதன் கடுமையை ஆரம்பத்திலேயே கண்டுபிடிச்சு, சரி செய்ய, அல்லது கட்டுப்படுத்த முடியும்."

க: " இதை எப்படிக் கண்டுபிடிப்பீங்க டாக்டர்?"

டா: இதற்கான சோதனைகள் கொஞ்சம் பெருசுதான்!
1.வழக்கம் போல உங்களிடமிருந்து உங்க வாயால என்ன நடக்குதுன்னு கேட்டதுக்கப்புறம்[history], ஒரு முழு உடற்பரிசோதனை [full check-up]செய்வோம்.

2. நாடித்துடிப்பு, ரத்த அழுத்தம், பின்னர் ரத்தப் பரிசோதனை, சோடியம், பொட்டாஷியம், குளோரைடு, யூரியா, கொலெஸ்ட்ரால் இன்னும் பல ரசாயனப் பொருள்களின் அளவுகள் ரத்தத்தில் எவ்வளவு என்பதைக் கண்டறிவோம்.

3. BNP என்னும் [B-type Natriuretic Peptide] ஒரு ரஸாயனப்பொருள் வெண்ட்ரிக்கிளில் சுரக்கிறது.
இதய பலவீனம்[CCF] அதிகமாக, அதிகமாக இதன் அளவும் அதிகமாகிறது.
இது ஒரு நல்ல குறியீடு[marker] இதற்கு.
ஏனெனில், CCF கட்டுப்படுத்தப்பட்ட ஒருவருக்குக் கூட, நல்லமுறையில் இதயம் இயங்கும் ஒருவருக்கு இருப்பதை விட அதிகமாகவே இந்த BNP இருக்கும்.

4. மார்பு எக்ஸ்-ரே[Chest X-Ray]: இதயத்தின் அளவையும், இதயம், நுரையீரலைச் சுற்றி இருக்கும் அதிகப்படியான நீரின் அளவையும் இது காட்ட உதவும்.

5. எக்கோ கார்டியோக்ராம்[Echocardiogram or Echo]: இதயம் இயங்குவதையும், அது பம்ப் செய்யும் அளவையும், ஆரிக்கிள், வெண்ட்ரிக்கிள்களின் அளவையும் இயங்கும் போதே அளவிட உதவும் ஒரு சோதனை இது. அல்ட்ரா சவுண்ட்[Ultrasound] மூலம் இது செய்யப்படும்.

6. ஈ.எஃப்.[]: ஒவ்வொரு முறை இதயம் ரத்தத்தை பம்ப் செய்து அனுப்பும் அளவைக் குறிக்கும் சொல் இது. எக்கோ மூலமும், பின்னால் சொல்லப்போகிற கார்டியாக் கதீடெரைசேஷன் மூலமாகவும் இதைக் கணிக்க முடியும்.
சாதாரணமாக ஒருவருக்கு இதன் அளவு 50%க்கு மேலாக இருக்கும். அதாவது குறைந்த பக்ஷம் இருப்பில் பாதிக்கு மேல் இதயத்திலிருந்து வெளியேற்றப் படுகிறது என்பதைக் குறிக்கிறது இது.
இந்த ஈ.எஃப். 405க்கு கீழே போனால், ஸிஸ்டாலிக் ஹார்ட் ஃபெயிலியர்[Systolic Heart Failure] எனக் கொள்ளலாம்.
40%க்கு மேலானால், இது டையஸ்டாலிக் HF[Diastolic Heart Failure] அல்லது வேறு காரணங்களால் வரும்.

க: "ஸிஸ்டாலிக், டையஸ்டாலிக்குன்னா என்ன் டாக்டர்?"

டா: இதயத்தால நல்லா அழுத்தி பம்ப் பண்ணி ரத்தத்தை வெளியே அனுப்ப முடியாத அளவுக்கு அதன் சுவர்கள்[wallas] பலஹீனமா இருந்தா அது ஸிஸ்டாலிக் கோளாறு.
ஆனா, இதயத்தோட சுவர்கள் சாதாரணமா சுருங்கினாலும், வெண்ட்ரிக்கிள்கள் சரியா விரிஞ்சு கொடுக்கலைன்னாகுறைந்த அளவு ரத்தமே மறுபடியும் இதயத்துக்குள்ளே வரமுடியும். அது டையஸ்டாலிக் கோளாறுனால வர்றது.

க: ஆக மொத்தம் எப்படியும் ஏதோ ஒரு விதத்துல பலஹீனம் வருது இல்லையா டாக்டர்? எதுவா இருந்தா என்ன?

டா: ஆமாம். ஆனால், இதைக் கண்டுபிடிக்கறது எதுக்குன்னா, சரியான சிகிச்சை கொடுக்கறதுக்காகத்தான்!

மேலே கேளுங்க!
7. அடுத்த டெஸ்ட் ஈ.ஸி.ஜி. [E.C.G or Electrocardiogram] இதை ஈ.கே.ஜி.ன்னும் சொல்லுவாங்க. இதயத்துக்கு மின்சார அதிர்வுகள்[Electrical Impulses] இருக்குன்னு முன்னே சொன்னேனே, நினைவு இருக்கா? அந்த மின்சார அதிர்வுகளை ஒரு க்ராஃப்பேப்பர்ல[Graph Paper] கோடு போட்டுக் காட்டற சோதனை இது. உடம்புல சில மின்சார இணைப்புகள் மூலமா [ஷாக்கெல்லாம் அடிக்காதுங்க!] இது செய்யப்படும்.

"இதெல்லாம் எப்பங்க செய்யப் போறீங்க இவருக்கு? சீக்கிரமா கண்டுபிடிச்சு எந்த அளவுல இவரோட நோய் இருக்குன்னு சொல்லுங்க டாக்டர்" என இவ்வளவு நேரம் எல்லாவற்றையும் கூட இருந்து கேட்டுக்கொண்டிருந்த தெய்வானை வாய் திறந்தார்.

"செய்யத்தானே போறோம். கொஞ்சம் பொறுங்க. இன்னும் ரெண்டு, மூணு நாள்ல இதையெல்லாம் செய்திடலாம்.
ஒரு விஷயம் உங்க ரெண்டு பேரையும் நான் பாராட்டணும். நீங்களும் கூட இவரோட வந்தீங்க பாருங்க. அது ரொம்ப சிறப்பான விஷயம். உங்க துணைக்கும் இது தெரியணும் என்பது மிகவும் முக்கியம். அப்போதான் சிகிச்சையை சரியா கண்காணிக்க முடியும்.

சரிங்க, நிறைய நேரம் பேசிட்டோம் இன்னிக்கு. மீதியை டெஸ்டெல்லாம் முடிஞ்சதுக்கு அப்புறமா பர்க்கலாம்.
இன்னும் உங்களுக்கு சிகிச்சை ஆரம்பிக்கப்படலை. அதனால, அதுவரைக்கும், இன்னும் ரெண்டு, மூணு நாளைக்கு நல்லா ரெஸ்ட் எடுங்க. அதிகமா அலட்டிக்கதீங்க. நடுவுல எதுனாச்சும் சிராமமா இருந்தா உடனே ஒரு தகவல் கொடுங்க. தைரியமா இருங்க" என்றபடி விடை கொடுத்தார் டாக்டர்.

நாமும், கந்தசாமி-தெய்வானை தம்பதிகளை கொஞ்சம் ஓய்வெடுக்க விடுவோம்!!
அது வரைக்கும் சென்ற பதிவுகளை அப்பப்போ மறுபடியும் படிங்க!

[இங்கு கூறியிருப்பவை ஒரு தகவலுக்கு மட்டுமே!
உங்கள் மருத்துவரைக் கலந்து ஆலோசிப்பது அவசியம்!!]

"லப்-டப்" - 16 "ஆ! நெஞ்சு வலிக்குதே!" [ "நெஞ்சில் ஜில்ஜில்!"-5]

2007-03-11T20:55:00.000-07:00

"லப்-டப்" - 16 "ஆ! நெஞ்சு

வலிக்குதே!" [பகுதி-5]

"நெஞ்சில் ஜில்ஜில்!"

[தலைப்பு கொடுத்த ஷைலஜாவுக்கு நன்றி!]

கடந்த 4 பதிவுகளில் நெஞ்சுவலி பற்றி விளக்கமாகப் பார்த்தோம்.
இதயம் பற்றிய இத்தொடருக்குள் ஒரு மினி தொடராக இது அமைந்துவிட்டது!
இன்றைய பதிவில் இதை முடித்து விடலாம்!

மையோகார்டியல் இன்ஃபார்க்ஷன் [Myocardial Infarction, MI] என்றால் என்ன?
அப்படி என்றால் என்ன?
எப்படி நிகழ்கிறது?
எதனால் வருகிறது?
இதன் அறிகுறிகள் என்னென்ன?
என்ன சிகிச்சை இதற்கு?

சிகிச்சைக்குப் பின் என்ன செய்ய வேண்டும்?
எப்படி இதைத் தவிர்க்க முடியும்?

மேலே இருக்கும் இரு கேள்விகளுக்கும் கிட்டத்தட்ட விடை ஒன்றுதான். எனவே தனிதனியாகச் சொல்லாமல் சேர்த்தே சொல்லுகிறேன்.

மூன்று முக்கியமான விஷயங்களை மனதில் கொள்ள வேண்டும்.

ஒரு தாக்குதல்[Heart Attack] நடந்த பிறகு,

1. இதயத்தை ஆரோக்கியமாக வைத்துக் கொள்ள வேண்டும்.
2. இது வருவதற்கான காரணங்களைத் தவிர்க்க முயல வேண்டும்.
3. மீண்டும் வராமல் பார்த்துக் கொள்ள வேண்டும்.

இதற்கு செய்ய வேண்டியன என்னென்ன?

மறுபடியும் 3!

1. மருந்து மாத்திரைகளைத் தவறாமல் ஒழுங்காக எடுத்துக் கொள்ள வேண்டும்.
2. வாழ்க்கை முறையை[Life Style] கொஞ்சம் மாற்றி அமைத்துக் கொள்ள வேண்டும்.
3. மருத்துவர் சொல்படி ஒழுங்காக செக்-அப் [Check-up] செய்து கொள்ள வேண்டும்.ரத்தக்கட்டிகள்[Clots] அதிகம் உருவாகாமல் இருக்கவும், இதயத்தின் வேலைப்பளுவை சீராக வைக்கவும், கொழுப்புச் சத்தை அளவோடு வைத்திருக்கவும், இதயத் துடிப்பை சீராக வைக்கவும், அதிகப்படியான ரத்த அழுத்தத்தைக் குறைக்கவும், நெஞ்சுவலியைக் குறைக்கவும் மாத்திரைகள் பயன்படும்.

பயப்பட வேண்டாம்!
இவை எல்லாமுமே எல்லாருக்கும் தேவைப்படும் என்றில்லை!
இதில் எது தேவையோ அவற்றை உங்கள் மருத்துவர் உங்களுக்கு எழுதிக் கொடுப்பார்.

எழுதிக்கொடுக்கும் மாத்திரைகளைப் பற்றிய குறைந்த பட்ச விவரங்களாவது உங்களுக்குத் தெரிந்திருக்க வேண்டும்.

மாத்திரையின் பெயர், எதற்கு அது தேவை[Indications], எத்தனை அளவு[Dosage], எப்போது சாப்பிட வேண்டும்[Frequency], இதன் பக்கவிளைவுகள்[Side effects] என்னென்ன என்பதைப் பற்றிமருத்துவரிடம் தயங்காமல் கேட்டுத் தெரிந்து கொள்ளுங்கள்.

இணையத்திலும் இது பற்றிய குறிப்புகள் கிடைக்கும்.

ஆனால், சில சமயம் இதில் தவறான தகவல்கள் வரவும் வாய்ப்பிருக்கிறது!

எனவே மருத்துவரிடம் இது பற்றித் தெளிவாகத் தெரிந்து கொள்வது மிக, மிக முக்கியம்!

வாழ்க்கை முறை மாற்றங்கள்![Life style changes]

கரோனரி நாள நோய்க்கு[Caronary Artery Disease] தீர்வு கிடையாது!

வாழ்க்கை முறை மாற்றங்கள்[Life-style] மூலமே இதனைக் கட்டுப்படுத்த முடியும்!

நான் எப்போதும் என்னிடம் வருபவர்க்குச் சொல்லுவேன்!
"உங்களுக்காக, நீங்க எதை அனுப்பினாலும், என்ன செஞ்சாலும் மறுக்காம ஏத்துகிட்டு, எல்லாத்துக்கும் கூட நின்னிருக்கு உங்க உடம்பு! அது இப்போ கொஞ்சம் உங்களை மாத்திக்கிட்டு, நீங்க வாழறதுக்கு நான் உதவ எனக்கு உதவ முடியுமான்னு[:))] அது கேக்குது! நீங்கதான் முடிவு பண்ணனும்"

என்ன மாற்றங்கள் செய்யணும்!

புகை பிடிப்பதை அறவே நிறுத்தணும்.
இதுல காம்ப்ரொமைஸே கிடையாது.ஒரு தாக்குதலுக்கு அப்புறம் நீங்க பிடிக்கற ஒவ்வொரு ஸிகரெட்டும், அடுத்த தாக்குதல்ல் நிகழ ஒரு ஆயுதம்! மறக்காதீங்க!

கொழுப்பைக் குறைக்கணும்!
குறைந்த அளவே கொழுப்புச் சத்து உள்ள உணவுமுறையைக் கைகொள்ள வேண்டும்.இதிலும் பயன் இல்லையென்றால், மாத்திரைகளின் உதவியை நாட வேண்டும்.

ரத்த அழுத்தத்தைக் கட்டுப்படுத்தணும்.
உப்பைக் குறைத்து, முறையாக உடற்பயிற்சி[] செய்து, உணவில் அளவோடு இருந்து ரத்த அழுத்தத்தை குறிப்பிட்ட அளவிற்குள் வைத்துக் கொள்ளணும். இல்லையேல், மருந்து, மாத்திரைகளாலும் பயன் இருக்காது.

சர்க்கரை நோய் இருப்பவர்களுக்கு இந்நோய் அதிக அளவில் பாதிக்கும் என்பதால், இவர்கள் கட்டுப்பாடோடு இருப்பது மிகவும் முக்கியம்.

முறையான உடற்பயிற்சிகள்[Exercise] மருத்துவரின் ஆலோசனையோடு செய்யப் பழகணும். இதன் மஹிமை அளவிட முடியாதது! சர்க்கரை நோய்[Diabetes], ரத்த அழுத்தம்[High blood pressure], எடை[Weight], மன அயர்வு[Stress] இவை எல்லாவற்றிற்கும் இதுவே கைகண்ட மருந்து!

உடல் எடையை [Body weight] சரியான அளவில் வைத்திருக்கணும்!உயரத்திற்கும், வயதுக்கும் தகுந்த எடையை வைத்துக் கொள்வது அவசியம்.

மன அயர்வையும்[Stress] கோபத்தையும்[Anger] தவிர்க்கணும்.
கோபப்படுவது, உணர்ச்சிவசப்படுவது அதிகமாய் வருத்தப்படுவது இவையெல்லாம் இதயத்தை மேலும் பாதிக்கும் விஷயங்கள்.இவற்றைக் கட்டுப்படுத்த தனி வகுப்புகள் இருக்கின்றன. அவற்றில் சேர்ந்து முறையாகப் பயிற்சி செய்தால் இவை குறையும் வாய்ப்பிருக்கிறது.யோகா ஒரு நல்ல பயிற்சி இதற்கு!

இதய மறுமலர்ச்சி வகுப்பில்[Cardiac Rehabilitation] சேர்ந்து மருத்துவரின் உதவியுடன் முறையாக இதயத்தை வலுப்படுத்தும் முறையைத் தெரிந்து கொள்ள வேண்டும்.

மருத்துவரை முறையாக அவர் சொல்லும் கால அளவில் பார்த்து சோதனைகள் செய்து கொள்ளுவது மிகவும் முக்கியமானது.

இதற்கு இடையில், உங்கள் உடல்நிலையில் ஏதேனும் மாற்றங்கள் தெரிந்தால், அல்லது உணர்ந்தால், உடனே மருத்துவ உதவியை நாடுவது மிகவும் முக்கியம்!

*** சரி, ஒருவருக்கு நெஞ்சுவலி [Angina] வந்தால் அவர் என்ன செய்ய வேண்டும்!? ***

நெஞ்சுவலியின் அறிகுறிகளான, வலி, அயர்வு, வியர்த்துக் கொட்டல், இதயப்பகுதியில் ஒரு அழுத்தம் ஏற்படுதல், கை, தோள்பட்டை, முதுகு போன்ற இடங்களில் வலி பரவுதல், போன்றவை தோன்றுமாயின்[இது ஒருவருக்கொருவர் மாறுபடும்]செய்ய வேண்டியது என்ன?

* என்ன வேலை செய்து கொண்டிருந்தாலும், அப்படியே அதை விட்டுவிட்டு, உடனடியாக ஓய்வு எடுக்க வேண்டும். [Take complete rest]

* நைட்ரோக்ளிஸரின்[Nitroglycerin] மாத்திரை உங்களுக்கு எழுதிக் கொடுக்கப்பட்டு, கைவசம் இருந்தால் உடனே ஒரு மாத்திரையை எடுத்து, நாக்கின் அடியில் வைத்துக் கொள்ளவும்.

* அடுத்த ஐந்து நிமிடங்களில் வலி குறையாவிடில், இன்னொரு மாத்திரை எடுத்துக் கொள்ளவும்.

* இது போல 3 முறை செய்யலாம்.

* இப்படி செய்தும்,15 நிமிடங்களில் வலி குறையவில்லையெனில், உடனடியாக அவசர மருத்துவ உதவியை நாடவும்.

* ஆஸ்பிரின்[Aspirin] மாத்திரையும் ஏற்கெனவே எழுதிக் கொடுக்கப் பட்டிருந்தால் அதுவும் ஒன்று எடுத்துக் கொள்ளலாம். [ரத்தம் கட்டிதட்டிப் போவதை இது தவிர்க்கும்.

* மோஹன் செய்தது போல, உடனடியாக உங்கள் உதவிக்கு வரக்கூடியவரை உடனே அழைக்கவும். நானே போய்விடுவேன் என ஸ்கூட்டரை உதைக்க வேண்டாம்! அல்லது, காரை ஸ்டார்ட் செய்ய வேண்டாம்! இதுவே உங்களுக்கு எமனாக அமையக்கூடும்!

* நைட்ரோக்ளிஸரின் மாத்திரை நாள் கடந்ததா[Expiry date] எனக் கவனிக்கவும். ஒருமுறை மருந்து பாட்டில் திறக்கப் பட்டிருந்தால், ஆறு மாதங்களுக்கு ஒருமுறை மருந்துச் சீட்டைப் புதுப்பித்து புது மாத்திரைகள் வாங்கிக் கொள்ளவும்!

அவ்வளவுதாங்க!
நிறையப் பேசியாச்சு!
ஐந்து பதிவுகளையும் மீண்டும் ஒருமுறை தொடர்ச்சியாக நேரம் கிடைக்கும் போது படித்து, நீங்கள் அனைவரும் வாழ்வாங்கு வாழ எல்லாம் வல்ல முருகப்பெருமான் உங்களுக்கு உறுதுணையாய் இருக்க வேண்டி, இந்த மினி தொடரை நிறைவு செய்கிறேன்.

அடுத்து, 'இதயம்' பற்றி இன்னும் சில விஷயங்களைப் பார்க்கலாம்.

கூடவே இருந்து உதவிய மோஹன் - ராதா தம்பதியினர்க்கும், குமாருக்கும் எனது நன்றிகள்!

[இதில் கூறப்பட்டவை அனைத்தும் ஒரு தகவலுக்கு மட்டுமே!
உங்கள் மருத்துவர்தான் முறையான சிகிச்சை அளிக்க முடியும்!]

"லப்-டப்" - 16 "ஆ! நெஞ்சு வலிக்குதே!"[ "நெஞ்சில் ஜில்ஜில்!"-5]

2007-03-11T19:31:00.000-07:00

"லப்-டப்" - 16 "ஆ! நெஞ்சு வலிக்குதே!" [பகுதி-5]

"நெஞ்சில் ஜில்ஜில்!"
[தலைப்பு கொடுத்த ஷைலஜாவுக்கு நன்றி!]

கடந்த 4 பதிவுகளில் நெஞ்சுவலி பற்றி விளக்கமாகப் பார்த்தோம். இதயம் பற்றிய இத்தொடருக்குள் ஒரு மினி தொடராக இது அமைந்துவிட்டது! இன்றைய பதிவில் இதை முடித்து விடலாம்!

மையோகார்டியல் இன்ஃபார்க்ஷன் [Myocardial Infarction, MI] என்றால் என்ன?

அப்படி என்றால் என்ன?
எப்படி நிகழ்கிறது?
எதனால் வருகிறது?
இதன் அறிகுறிகள் என்னென்ன?
என்ன சிகிச்சை இதற்கு?

சிகிச்சைக்குப் பின் என்ன செய்ய வேண்டும்?
எப்படி இதைத் தவிர்க்க முடியும்?

மேலே இருக்கும் இரு கேள்விகளுக்கும் கிட்டத்தட்ட விடை ஒன்றுதான். எனவே தனிதனியாகச் சொல்லாமல் சேர்த்தே சொல்லுகிறேன்.

மூன்று முக்கியமான விஷயங்களை மனதில் கொள்ள வேண்டும்.

ஒரு தாக்குதல்[Heart Attack] நடந்த பிறகு,

1. இதயத்தை ஆரோக்கியமாக வைத்துக் கொள்ள வேண்டும்.
2. இது வருவதற்கான காரணங்களைத் தவிர்க்க முயல வேண்டும்.
3. மீண்டும் வராமல் பார்த்துக் கொள்ள வேண்டும்.

இதற்கு செய்ய வேண்டியன என்னென்ன?

மறுபடியும் 3!

1. மருந்து மாத்திரைகளைத் தவறாமல் ஒழுங்காக எடுத்துக் கொள்ள வேண்டும்.
2. வாழ்க்கை முறையை[Life Style] கொஞ்சம் மாற்றி அமைத்துக் கொள்ள வேண்டும்.
3. மருத்துவர் சொல்படி ஒழுங்காக செக்-அப் [Check-up] செய்து கொள்ள வேண்டும்.

ரத்தக்கட்டிகள்[Clots] அதிகம் உருவாகாமல் இருக்கவும், இதயத்தின் வேலைப்பளுவை சீராக வைக்கவும், கொழுப்புச் சத்தை அளவோடு வைத்திருக்கவும், இதயத் துடிப்பை சீராக வைக்கவும், அதிகப்படியான ரத்த அழுத்தத்தைக் குறைக்கவும், நெஞ்சுவலியைக் குறைக்கவும் மாத்திரைகள் பயன்படும்.

பயப்பட வேண்டாம்! இவை எல்லாமுமே எல்லாருக்கும் தேவைப்படும் என்றில்லை! இதில் எது தேவையோ அவற்றை உங்கள் மருத்துவர் உங்களுக்கு எழுதிக் கொடுப்பார்.

எழுதிக்கொடுக்கும் மாத்திரைகளைப் பற்றிய குறைந்த பட்ச விவரங்களாவது உங்களுக்குத் தெரிந்திருக்க வேண்டும்.

மாத்திரையின் பெயர், எதற்கு அது தேவை[Indications], எத்தனை அளவு[Dosage], எப்போது சாப்பிட வேண்டும்[Frequency], இதன் பக்கவிளைவுகள்[Side effects] என்னென்ன என்பதைப் பற்றி மருத்துவரிடம் தயங்காமல் கேட்டுத் தெரிந்து கொள்ளுங்கள்.

இணையத்திலும் இது பற்றிய குறிப்புகள் கிடைக்கும். ஆனால், சில சமயம் இதில் தவறான தகவல்கள் வரவும் வாய்ப்பிருக்கிறது! எனவே மருத்துவரிடம் இது பற்றித் தெளிவாகத் தெரிந்து கொள்வது மிக, மிக முக்கியம்!

வாழ்க்கை முறை மாற்றங்கள்![]

கரோனரி நாள நோய்க்கு[Caronary Artery Disease] தீர்வு கிடையாது!
வாழ்க்கை முறை மாற்றங்கள்[Life-style] மூலமே இதனைக் கட்டுப்படுத்த முடியும்!

நான் எப்போதும் என்னிடம் வருபவர்க்குச் சொல்லுவேன்!
"உங்களுக்காக, நீங்க எதை அனுப்பினாலும், என்ன செஞ்சாலும் மறுக்காம ஏத்துகிட்டு, எல்லாத்துக்கும் கூட நின்னிருக்கு உங்க உடம்பு! அது இப்போ கொஞ்சம் உங்களை மாத்திக்கிட்டு, நீங்க வாழறதுக்கு நான் உதவ எனக்கு உதவ முடியுமான்னு[:))] அது கேக்குது! நீங்கதான் முடிவு பண்ணனும்"

என்ன மாற்றங்கள் செய்யணும்!

புகை பிடிப்பதை அறவே நிறுத்தணும்.
இதுல காம்ப்ரொமைஸே கிடையாது.
ஒரு தாக்குதலுக்கு அப்புறம் நீங்க பிடிக்கற ஒவ்வொரு ஸிகரெட்டும், அடுத்த தாக்குதல்ல் நிகழ ஒரு ஆயுதம்! மறக்காதீங்க!

கொழுப்பைக் குறைக்கணும்!
குறைந்த அளவே கொழுப்புச் சத்து உள்ள உணவுமுறையைக் கைகொள்ள வேண்டும்.
இதிலும் பயன் இல்லையென்றால், மாத்திரைகளின் உதவியை நாட வேண்டும்.

ரத்த அழுத்தத்தைக் கட்டுப்படுத்தணும்.
உப்பைக் குறைத்து, முறையாக உடற்பயிற்சி[] செய்து, உணவில் அளவோடு இருந்து ரத்த அழுத்தத்தை குறிப்பிட்ட அளவிற்குள் வைத்துக் கொள்ளணும். இல்லையேல், மருந்து, மாத்திரைகளாலும் பயன் இருக்காது.

சர்க்கரை நோய் இருப்பவர்களுக்கு இந்நோய் அதிக அளவில் பாதிக்கும் என்பதால், இவர்கள் கட்டுப்பாடோடு இருப்பது மிகவும் முக்கியம்.

முறையான உடற்பயிற்சிகள்[Exercise] மருத்துவரின் ஆலோசனையோடு செய்யப் பழகணும். இதன் மஹிமை அளவிட முடியாதது! சர்க்கரை நோய்[Diabetes], ரத்த அழுத்தம்[High blood pressure], எடை[Weight], மன அயர்வு[Stress] இவை எல்லாவற்றிற்கும் இதுவே கைகண்ட மருந்து!

உடல் எடையை [Body weight] சரியான அளவில் வைத்திருக்கணும்!
உயரத்திற்கும், வயதுக்கும் தகுந்த எடையை வைத்துக் கொள்வது அவசிய்யம்.

மன அயர்வையும்[Stress] கோபத்தையும்[Anger] தவிர்க்கணும்.
கோபப்படுவது, உணர்ச்சிவசப்படுவது அதிகமாய் வருத்தப்படுவ்வது இவையெல்லாம் இதயத்தை மேலும் பாதிக்கும் விஷயங்கள்.
இவற்றைக் கட்டுப்படுத்த தனி வகுப்புகள் இருக்கின்றன. அவற்றில் சேர்ந்து முறையாகப் பயிற்சி செய்தால் இவை குறையும் வாய்ப்பிருக்கிறது.
யோகா ஒரு நல்ல பயிற்சி இதற்கு!

இதய மறுமலர்ச்சி வகுப்பில்[Cardiac Rehabilitation] சேர்ந்து மருத்துவரின் உதவியுடன் முறையாக இதயத்தை வலுப்படுத்தும் முறையைத் தெரிந்து கொள்ள வேண்டும்.

மருத்துவரை முறையாக அவர் சொல்லும் கால அளவில் பார்த்து சோதனைகள் செய்து கொள்ளுவது மிகவும் முக்கியமானது.
இதற்கு இடையில், உங்கள் உடல்நிலையில் ஏதேனும் மாற்றங்கள் தெரிந்தால், அல்லது உணர்ந்தால், உடனே மருத்துவ உதவியை நாடுவது மிகவும் முக்கியம்!

*** சரி, ஒருவருக்கு நெஞ்சுவலி [Angina] வந்தால் அவர் என்ன செய்ய வேண்டும்!? ***

நெஞ்சுவலியின் அறிகுறிகளான, வலி, அயர்வு, வியர்த்துக் கொட்டல், இதயப்பகுதியில் ஒரு அழுத்தம் ஏற்படுதல், கை, தோள்பட்டை, முதுகு போன்ற இடங்களில் வலி பரவுதல், போன்றவை தோன்றுமாயின்[இது ஒருவருக்கொருவர் மாறுபடும்]
செய்ய வேண்டியது என்ன?

* என்ன வேலை செய்து கொண்டிருந்தாலும், அப்படியே அதை விட்டுவிட்டு, உடனடியாக ஓய்வு எடுக்க வேண்டும். [Take complete rest]

* நைட்ரோக்ளிஸரின்[Nitroglycerin] மாத்திரை உங்களுக்கு எழுதிக் கொடுக்கப்பட்டு, கைவசம் இருந்தால் உடனே ஒரு மாத்திரையை எடுத்து, நாக்கின் அடியில் வைத்துக் கொள்ளவும்.

* அடுத்த ஐந்து நிமிடங்களில் வலி குறையாவிடில், இன்னொரு மாத்திரை எடுத்துக் கொள்ளவும்.

* இது போல 3 முறை செய்யலாம்.

* இப்படி செய்தும்,15 நிமிடங்களில் வலி குறையவில்லையெனில், உடனடியாக அவசர மருத்துவ உதவியை நாடவும்.

* ஆஸ்பிரின்[Aspirin] மாத்திரையும் ஏற்கெனவே எழுதிக் கொடுக்கப் பட்டிருந்தால் அதுவும் ஒன்று எடுத்துக் கொள்ளலாம். [ரத்தம் கட்டிதட்டிப் போவதை இது தவிர்க்கும்.

* மோஹன் செய்தது போல, உடனடியாக உங்கள் உதவிக்கு வரக்கூடியவரை உடனே அழைக்கவும். நானே போய்விடுவேன் என ஸ்கூட்டரை உதைக்க வேண்டாம்! அல்லது, காரை ஸ்டார்ட் செய்ய வேண்டாம்! இதுவே உங்களுக்கு எமனாக அமையக்கூடும்!

* நைட்ரோக்ளிஸரின் மாத்திரை நாள் கடந்ததா[Expiry date] எனக் கவனிக்கவும். ஒருமுறை மருந்து பாட்டில் திறக்கப் பட்டிருந்தால், ஆறு மாதங்களுக்கு ஒருமுறை மருந்துச் சீட்டைப் புதுப்பித்து புது மாத்திரைகள் வாங்கிக் கொள்ளவும்!

அவ்வளவுதாங்க!
நிறையப் பேசியாச்சு!
ஐந்து பதிவுகளையும் மீண்டும் ஒருமுறை தொடர்ச்சியாக நேரம் கிடைக்கும் போது படித்து, நீங்கள் அனைவரும் வாழ்வாங்கு வாழ எல்லாம் வல்ல முருகப்பெருமான் உங்களுக்கு உறுதுணையாய் இருக்க வேண்டி,, இந்த மினி தொடரை நிறைவு செய்கிறேன்.

அடுத்து, 'இதயம்' பற்றி இன்னும் சில விஷயங்களைப் பார்க்கலாம்.
கூடவே இருந்து உதவிய மோஹன் - ராதா தம்பதியினர்க்கும், குமாருக்கும் எனது நன்றிகள்!

[இதில் கூறப்பட்டவை அனைத்தும் ஒரு தகவலுக்கு மட்டுமே!
உங்கள் மருத்துவர்தன் முறையான சிகிச்சை அளிக்க முடியும்!]

"லப்-டப்" -15 "ஆ! நெஞ்சு வலிக்குதே" [4-ம் பகுதி]

2007-03-04T13:35:00.000-08:00

"லப்-டப்" -15 "ஆ! நெஞ்சு வலிக்குதே" [4-ம் பகுதி]

"சோதனை மேல் சோதனை போதுமடா சாமி!"

இதயத் தாக்குதல் எவ்வாறு நிகழ்கிறது, அதன் அறிகுறிகள் என்னென்ன என்பதைச் சென்ற பதிவில் பார்த்தோம்.

மையோகார்டியல் இன்ஃபார்க்ஷன் [Myocardial Infarction, MI] என்றால் என்ன?

அப்படி என்றால் என்ன?
எப்படி நிகழ்கிறது?
எதனால் வருகிறது?
இதன் அறிகுறிகள் என்னென்ன?
எப்படி இதைத் தவிர்க்க முடியும்?

என்ன சிகிச்சை இதற்கு?
சிகிச்சைக்குப் பின் என்ன செய்ய வேண்டும்?

இப்படி வருவதை, [அ] வரப்போவதை எப்படிக் கண்டுபிடிப்பது?
இதற்கான சோதனைகள் என்ன?
என்பதை இன்று பார்ப்போம்.

மோஹனுக்கு நெஞ்சுவலி வந்தது; அவன் நண்பன் குமார் உடனே அவனுக்கு உதவி அளிக்க வந்தான் என முதல் பகுதியில் பார்த்தோம்.

என்ன செய்தான் அவன்?

மோஹனிடம் 'இதோ நான் உடனே வருகிறேன்' எனச் சொன்னதும், உடனடியாக அவன் அவசரச் சிகிச்சைப் பிரிவிற்கு தொலபேசினான்.

உடனடியாக ஒரு ஆம்புலன்ஸை[ambulance] மெரீனா கடற்கரைக்கு கண்ணகி சிலை அருகில் வரச் சொல்லிவிட்டு, தன் காரில் விரைந்தான்.

அதற்குள் புத்திசாலித்தனமாக, மோஹனும், அருகில் இருந்த சிலரைக் கூப்பிட்டு, தன்னை கண்ணகி சிலையருகில் கொண்டு செல்லுமாற வேண்ட, அவர்களும் உடனடியாக நிலைமையின் தீவிரத்தை உணர்ந்து அப்படியே செய்தார்கள்.

சிறிது நேரத்தில் மருத்துவ ஊர்தி [ஆம்புலன்ஸ்] அங்கு வர, இரண்டு செவிலியர் [நர்ஸ்]அவன் இருக்குமிடம் நோக்கி விரைந்தனர்.
குமாரும் இப்போது வந்துவிட்டான்.

"என்னங்க பண்ணுது உங்களுக்கு?" எனக் கேட்டபடியே ஒருவர் மோஹனின் நாடித்துடிப்பு, ரத்த அழுத்தம், ஈ.ஸி.ஜி. [Pulse, Blood Pressure, E.C.G.] இவற்றைப் பரிசோதிக்க முனைய, அடுத்தவர், இவன் சொன்ன தகவல்களை ஒரு தாளில் குறித்துக் கொண்டே, ஸெல்ஃபோனில் அதை மருத்துவமனைக்கு அனுப்ப ஆரம்பித்தார்.

சிறிது ரத்தமும் எடுக்கப்பட்டு, ரத்தத்தில் இருக்கும் ரசாயன அளவுகள்[Blood chemistry] உடனடியாகப் பரிசோதிக்கப்பட்டு, அவையும் மருத்துவமனைக்கு அனுப்பப்பட்டது.

இவற்றின் மூலம், மோஹனுக்கு வந்திருப்பது ஒரு இதயத் தாக்குதல் தான்[Heart Attack] என்பது உறுதி செய்யப்பட்டு, மேலும் இரு பணியாளர்கள் ஒரு ஸ்ட்ரெட்ச்சரைக் கொண்டுவர, அதில் ஏற்றப்பட்டு, மருத்துவ ஊர்தியில் உடனடியாக மோஹன் மருத்துவ மனைக்குக் கொண்டு செல்லப்பட்டான்.

செல்லும் வழியிலேயே ஒரு ஆஸ்பிரின் மாத்திரயும், ரத்தக்கட்டியைக் கரைக்க உதவும் [Thrombolytics, clot-busters] ஒரு ஊசியும் போடப்பட்டது.

அங்கு அவசரச் சிகிச்சைப் பிரிவில் உடனடியாக அனுமதிக்கப்பட்டு, மீண்டும் ஒரு முறை, முறையான் பரிசோதனைகள் மேற்கொள்ளப்பட்டன.

முதலில் சொன்ன சோதனைகள் மீண்டும் செய்யப்பட்டு,இதயத்தாக்குதல்தான் என்பது உறுதி செய்யப்பட்டதும், கீழ்க்கண்ட சோதனைகள் ஆரம்பிக்கப் பட்டன.

எக்கோகார்டியோக்ராம் [Echo cardiogram] : இதயம் எப்படி ரத்தத்தை 'பம்ப்' [pump] செய்து அனுப்புகிறது, எந்தெந்த இடங்களில் இது முறைப்படி நிகழவில்லை, எந்த இடங்கள் தாக்குதலுக்கு உள்ளாகியிருக்கின்றன என்பதைக் கண்டுபிடிக்க உதவும் சோதனை இது.

கார்டியாக் கதீட்ரைஸேஷன்[Cardiac Catheterization] : அவசர சிகிச்சை பலனளிக்கவில்லை, வலி இன்னும் குறையவில்லை எனும் நிலையில், அடுத்து உடனடியாகச் செய்யப்படும் சோதனை இது. நேரடியாக காலில் இருக்கும் ஒரு பெரிய நாளம் வழியாக ஒரு கம்பி மூலம்[ இது வெறும் இரும்புக்கம்பி அல்ல! இதயம், இதயக்குழாய்களின் உள்ளே நிகழ்வதைப் பார்க்கவும், தேவைப்பட்டால், அடைப்பை நீக்கவும் இது உதவும்] இதயத்திற்குள் நிகழ்வதைப் பார்க்க உதவும் ஒரு சோதனை.

இதன் மூலம், அடுத்து என்ன செய்ய வேண்டும், வெறும் அடைப்பை நீக்கினால் மட்டும் போதுமா [PTCA], இல்லை, அடைப்பு இருக்கும் இடத்தில் ஒரு விரிப்பான்[stent] போடணுமா, இல்லை முழுதுமாகவே பழுதுபட்ட ரத்தக்குழாயை மாற்றணுமா[CABG] எனபதை முடிவு செய்யவும் இது தேவையானதாகிறது.

மோஹனுக்கும் இவையெல்லாமும் நிகழ்ந்தன!

இரண்டு இதயக் குழாய்களில்[Coronari arteries] அடைப்பு இருப்பது கண்டுபிடிக்கப்பட்டு, 'பை-பாஸ் ஸர்ஜரி'[By-pass surgery, CABG] செய்ய முடிவெடுத்து, அவனது காலில் இருக்கும் ஸஃபேனஸ் நாளத்தில் [Saphenous Vein] இருந்து சிறு துண்டுகள் வெட்டப்பட்டு, அவை இதயத்திற்கு ரத்தமளிக்கும்,.... ஆனால், இப்போது பழுதுபட்ட,..... குழாய்களுக்கு மாற்றாகப் பொருத்தப் பட்டன.

[இதய பலஹீனமானவர்கள் பார்க்க வேண்டாம்!]

[கொத்தனாருக்கு நன்றி!]

பிறகு, அங்கிருந்து, 'அதிதீவிர சிகிச்சை வார்டுக்கு'[Intensive Care Unit] மோஹன் கொண்டு செல்லப்பட்டு, முறையாகக் கவனிக்கப்பட்டு, 3 நாட்களுக்குப் பின், வீடு திரும்பினான்!

இனித்தான் இருக்கிறது இன்னும் சில சோதனைகள் !

அறுவை சிகிச்சை முடிந்து ஒரு இரண்டு மாதங்கள் ஆகும், உங்கள் இதயமும், மற்ற இடங்களும் முழுதும் குணமாக!

முதல் ஒரு வாரத்திற்கு, மிகவும் அசதியாகவும் சோர்வாகவும் இருக்கும்.

அறுவை சிகிச்சை முடிந்த அடுத்த இரு வாரங்களில் மோஹன் என்ன செய்யணும்?

படுக்கையிலேயே விழுந்து கிடக்காமல், தனக்குத் தேவையான காரியங்களை அடுத்தவர் உதவியின்றி தானே செய்து கொள்ளத் துவங்கினான்.

ஒரே நேரத்தில் அடுத்தடுத்து எல்லாவற்றையும் செய்ய முற்படாமல், விட்டு விட்டு, செய்தான். காலையில் பல்தேய்த்து விட்டு, ஒரு அரை கப் டீ சாப்பிட்டு விட்டு, சற்று நேரம் பேப்பர் படித்துவிட்டு, பிறகு கொஞ்சம் ஓய்வு எடுத்துக் கொண்டு, பின்னர், ஷேவிங்...... இப்படி படிப்படியாக செய்து வந்தான்.

மாடிப்படி ஏறக் கூடாது என மருத்துவர் தடை விதிக்காததால், மெதுவாக ஒருநாளைக்கு ஒரு முறை மாடிப்படிகளில் மெதுவாக ஏறி, சற்று ஓய்வு எடுத்துக் கொண்டு, பின்னர் கீழே இறங்கி படுக்கையில் படுத்துக் கொள்வான்.

எவ்வளவு நேரம் ஒரு நாளைக்கு நடக்கலாம் என மருத்துவர் சொல்லியபடி, இதையும் ஒரே நேரத்தில் செய்யாமல், விட்டுவிட்டு நடை பழகினான் [intermittent walking]!

கொஞ்சம் தெம்பு வர ஆரம்பித்ததும், வீட்டுவேலைகளில், ராதாவிற்கு உதவியாக சில சில வேலைகள்... துணி மடித்து வைத்தல், காய்கறி நறுக்கிக் கொடுத்தல், செடிகளுக்குத் தண்ணீர் பாய்ச்சுதல்.... செய்யத் தொடங்கினான்.

பளு தூக்கவோ, பெரிய சாமான்களை இழுக்கவோ முயற்சிக்கவில்லை.

இரு வாரங்களுக்குப் பிறகு, மருத்துவரைப் போய்ப் பார்த்தான்.

அவர் மீண்டும் ஒரு முறை, நாடி, ரத்த அழுத்தம், ஈ.ஸி.ஜி. போன்ற சோதனைகளைச் செய்து, தேறிவருகிறான் என்பதை உறுதிப் படுத்தி, மேலும் சில கடினமான வேலைகள் செய்ய இவனை அனுமதித்தார்.

அப்போது, ராதா, டாக்டரைப் பார்த்து சொன்னாள்," டாக்டர், இப்பவெல்லாம் இவருக்கு கொஞ்சம் கோபம் அதிகமாவே வருது. கூடவே பிரமை பிடிச்ச மாதிரி மோட்டுவளையைப் பார்த்துகிட்டு உக்கார்ந்திருக்காரு. என்னங்கன்னு கேட்டா, எரிஞ்சு விழறாரு. திடீர்னு, ராத்திரில எழுந்து என்னைக் கட்டிபிடிச்சுகிட்டு, 'நான் உங்களையெல்லாம் விட்டுட்டு சீக்கிரமா போயிருவேனா'ன்னு குழந்தை மாதிரி அழறாரு. இதல்லாம் ஏன் வருது? நான் எவ்வளவோ மாறிட்டேன். அந்தப் பொண்ணு கூடவும் பேசிட்டேன். அது என் கையைப் பிடிச்சுகிட்டு 'அவர் எனக்கு ஒரு அண்ணா மாதிரி. வேற ஒண்ணும் தப்பா எங்களுக்குள்ளே ஒண்ணுமில்லை'ன்னு சொல்லி அழுதிச்சு. எனக்கும் எல்லாம் புரிஞ்சு போச்சு. இனிமே அப்படி ஒண்ணு எங்க வாழ்க்கையில நடக்காது. இப்ப இவருக்கு எப்படி நான் ஆறுதல் சொல்றது?" எனக் கண்ணீர் விட்டாள்.

டாக்டர் அவளைப் பார்த்துச் சொன்னார்.

"நடந்திருக்கிறதுஒரு பெரிய அறுவை சிகிச்சை. அதுவும் இதயத்துல! எந்த மனுஷனுக்கும் கலக்கம் வர்றது சஹஜம்தான். இதை நீங்க புரிஞ்சுக்கணும். நான் ஸொல்ற விஷயங்களைக் கவனமா செயல்படுத்துங்க. கொஞ்ச நாள்ல இது சரியாயிடும். எனச் சொல்லி கீழ்க்கண்டவற்றைச் சொன்னார்.

1. தினம் ஒழுங்கா நேரத்துக்கு எழுந்து, நீட்டா ட்ரெஸ் பண்ணிக்கணும்.

2. படுக்கையிலேயே விழுந்து கிடக்கக் கூடாது.

3. தினசரி ரெகுலரா நடக்கணும் [walking]

4. எதையும் மனசுல போட்டு குழப்பிக்காம உங்க கிட்ட வந்து ஸொல்றாரு இல்லியா, அப்ப ஆறுதலா நாலு வார்த்தை பேசுங்க.

5. டயத்துக்கு தூங்கப் போகணும். சரியாத் தூங்கலேன்னாலும், எரிச்சல், அசதில்லாம் வரும்.
வேனும்னா நான் ஒரு மைல்ட் தூக்க மாத்திரை தரேன்.

6. நெருங்கின நண்பர்களைத் தவிர அதிகம் பேரோட பேச வேண்டாம், இன்னும் கொஞ்ச நாளைக்கு.

7. கார்டியாக் ரீ-ஹேப் ப்ரொக்ராம்ல சேரணும்.

8. டி.வி., கம்ப்யூட்டர்ல அதிர்ச்சி அளிக்கும் நிகழ்ச்சிகளையோ, பதிவுகளையோ பார்க்கவேண்டாம்.

9. முக்கியமா, உடலையும், மனஸையும் சந்தோஷமா வெச்சுக்கணும்.

இதுல எதனாச்சும் குறைவா இருக்கற மாதிரி தெரிந்தாலோ, அல்லது, மனச்சோர்வு குறையாமலிருந்தாலோ, உடனே மருத்துவரை அணுகி ஆலோசனை கேளுங்கள். இதைக் குறைக்க மாத்திரைகளும், மனநல ஆலோசனைகளும்[Counselling] கிடைக்கும்!:))

"அப்போ என்னென்ன அவர் சாப்பிடலாம் டாக்டர்!" என்று தொடர்ந்தாள் ராதா.

'நிறைய காய்கறிகள், பழம், சத்துப் பொருள்கள் எனச் சொல்லப்படும் Whole Grains சேர்த்துக்கணும்.

கலோரி அளவைக் கவனமாப் பார்த்துக்கணும்.

சரியான விகிதத்தில் புரதச் சத்தைத் தெரிந்தெடுத்து சேர்த்துக்கணும்.

சர்க்கரைச் சத்து எனச் சொல்லப்படும் கார்போஹைட்ரேட்ஸில் [Carbohydrates] இருவகைகள் உண்டு. உடனடியாக [simple], [அ] சற்றுத் தாமதித்து[complex] சக்தி கொடுப்பன எனப்படும். இவற்றுள் பிந்தைய வகையை [Complex] சற்று அதிகமாகவும், மற்றதை [simple] சற்று அளவோடும் உபயோகிக்கணும். :)

கொழுப்புச்சத்துள்ள பொருள்களை [Cholestrol] அளவோடு சேர்த்துக்கணும்.

உப்பைக் [Sodium] குறைக்கணும்; கால்ஸியம், பொட்டஷியம், மங்கனீஸ் Calcium, potassium, manganese] போன்ற தாதுப்பொருட்கள் இருக்கும் உணவுவகைகளைச் சேர்த்துக்கணும்.'

"அப்புறம் இன்னொரு முக்கியமான விஷயம் டாக்டர். எப்படிச் சொல்றதுன்னு தெரியலை....." என தரையைப் பார்த்துக் கொண்டே சொன்னாள் ராதா.

"புரியுதும்மா, புரியுது! நீங்க என்ன கேக்க வறீங்கன்னு புரியுது. தாம்பத்திய உறவு [Sexual activity] வெச்சுக்கலாமா இப்ப என்பதுதானே உங்க கேள்வி? தாராளமா வெச்சுக்கலாம். ஒருமுறை உடலுறவு கொள்வது என்பது, ஒரு முறை இரண்டு மாடி எறி இறங்கும் அளவுக்கோ [Two flight of stairs] அல்லது அரை மைல் [0.8km] தூரம் சீராக நடக்கும் அளவிற்கோதான் சக்தி தேவைப்படுகிறது. எனவே, மோஹனுக்கு இது போன்ற பயிற்சிகள் போது நெஞ்சுவலி வரவில்லை என்றல், இதற்கும் வராது. ஆனால், அதே சமயம், நெஞ்சுவலிக்கான அறிகுறிகளோ, மூச்சு வாங்குதலோ, அல்லது அளவிற்கும் மீறி அசதி ஏற்பட்டாலோ உடனடியாக மருத்துவ ஆலோசனை பெறுவது மிக முக்கியம்" என்றார் மருத்துவர்.

இதில் கவனத்தில் கொள்ள வேண்டியவை:

1. இருவரும் திறந்த மனத்துடன் இதை அணுகவேண்டும்.[Open minded approach]

2. நல்ல ஓய்வுக்குப் பின்னரே இதில் ஈடுபடணும்.

3. சற்று கவனத்துடனும், அன்புடனும் செயல்படணும்.

4. ஒரு சில மருந்து மாத்திரகளின் விளைவாக, ஆரம்ப கட்டத்தில் சற்று தாமதம் ஏற்படலாம். பயப்படத் தேவையில்லை. சரியான புரிதல், மற்றும் சில முன்விளையாட்டுகள்[foreplay] மூலம் இதை சரி செய்துவிடலாம்.

இதயத்தாக்குதல் மீண்டும் நிகழாமல் இருக்க என்ன செய்ய வேண்டும் என்பதை இந்த மினி தொடரின் இறுதிப் பகுதியில் பார்க்கலாம்.

[இதில் சொல்லப்பட்டிருப்பவை ஒரு தகவலுக்கு மட்டுமே! உங்கள் மருத்துவர் முறையான வழிகளைச் சொல்லுவார்.]

"லப்-டப்" 14 --"ஆ! நெஞ்சு வலிக்குதே"[3] "உயிரின் உயிருக்கு ஓம் நம:"

2007-02-26T19:32:00.000-08:00

"லப்-டப்" 14 -- "ஆ! நெஞ்சு வலிக்குதே"[3]

"உயிரின் உயிருக்கு ஓம் நம:"

மையோகார்டியல் இன்ஃபார்க்ஷன் [Myocardial Infarction, MI] என்றால் என்ன?

அப்படி என்றால் என்ன?
எப்படி நிகழ்கிறது?
எதனால் வருகிறது?
இதன் அறிகுறிகள் என்னென்ன?
எப்படி இதைத் தவிர்க்க முடியும்?
என்ன சிகிச்சை இதற்கு?
சிகிச்சைக்குப் பின் என்ன செய்ய வேண்டும்?

இதயத் தாக்குதலின் அறிகுறிகள் [symptoms] என்னென்ன?

1. 'ஆஞ்ஜைனா'[angina] எனும் நெஞ்சுவலி:
ஒரு விதமான இனம் புரியாத வலி அல்லது வேதனை, மார்பின் நடுப்பகுதியில் இருந்து கிளம்பி,
நெஞ்சழுத்தம்[pressure]
பாரம்[heaviness],
இறுக்கம்[tightness],
வலி[aching],
எரிச்சல்[burning],
மரமரப்பு [numbness] அல்லது
பிசைதல்[squeezing] போன்ற உணர்வு
ஒரு சில நிமிடங்களுக்கு இருந்து, பின்னர் மறையும் அல்லது மீண்டும் வரும்.

அஜீரணம்[indigestion] அல்லது நெஞ்செரிச்சல்[heartburn] என தவறாகக் கருதி அசட்டையாக இருந்து விடுவார்கள் பல நேரம்!

2. இந்த வலி உடலின் பல பாகங்களிலும் உணரப்படும். குறிப்பாக, கைகள், இடது தோள்பட்டை, முதுகு, கழுத்து, தாடை, அல்லது வயிறு போன்ற பாகங்கள் இந்த வலியால்

உணரப்பட்டு ஒரு அஸௌகரியத்தைக் கொடுக்கும்.

3. மூச்சுத் திணறல்[difficulty breathing], மேல்மூச்சு வாங்குதல்[shortness of breath]

4. உடல் வியர்த்துக் கொட்டும், சற்று குளிரும்!

5. வயிறு உப்புசம் [fullness], அஜீரண ஏப்பம்[indigestion], தொண்டை அடைப்பு போன்ற உணர்வு[choking sensation]

6. வாந்தி வருவது போன்ற உணர்வு[nausea], வாந்தி.

7. தலை சுற்றல்[light headedness] கிறு கிறுவென வருதல்[giddiness or dizziness]

8. உடம்பு தளர்ச்சி[weakness], ஒரு பரபரப்பு[anxiety], இதயத் துடிப்பு அதிகமாதல் [அ] சீரில்லாமல் துடித்தல்[rapid or irregular heartbeats]

9. தூக்கம் வருதல் போன்ற ஒரு உணர்வு.

இது எல்லாமே ஒருவருக்கு நிகழும் எனச் சொல்ல முடியாது.
தாக்குதலின் வீரியத்தைப் பொறுத்து இதில் ஒரு சிலவோ, அல்லது எல்லாமுமோ எற்படலாம்.

இவை எதுவுமே நிகழாமல் கூட இந்த தாக்குதல் நிகழும். பெரும்பாலும், நீரிழிவு நோய் உள்ளவர்க்கே இது நிகழும் வாய்ப்பு அதிகம்.
இப்படி நிகழ்வதற்கு, அமைதியான இதயத் தாக்குதல்[Silent MI] எனப் பெயர்.

அப்படியே நிகழ்ந்து, இது சரியாகவும் போயிருக்க, வழக்கமாக மருத்துவரைச் சந்திக்கும் போது, அவரால் கண்டுபிடிக்கப்படும் ஒரு ஈ.ஸி.ஜி.[E.C.G] மூலம்.

"உங்களுக்கு சமீபத்துல ஒரு அட்டாக் நிகழ்ந்திருக்கிறது" என அவர் சொல்ல நோயாளிக்கே ஆச்சரியமாகக் [அதிர்ச்சியாகவும்!] கூட இருக்கும் வாய்ப்பு இருக்கிறது.

முதல் முறையாக இதில் ஏதேனும் அறிகுறிகள் தெரிந்தால், முன் சொன்னது போல ஏதோ ஆஜீரணக் கோளாறு என அலட்சியமாக இருந்து விடாதீர்கள்.

சற்று படுத்து எழுந்தால் சரியாகிவிடும் என நீங்களே முடிவு செய்து விடாதீர்கள்!

உடனே ஒரு அருகில் உள்ள மருத்துவரை [அவர் உங்கள் குடும்ப மருத்துவராக இல்லாவிடினும்!] போய்ப் பாருங்கள்!
இது மிகவும் முக்கியம்.

அவர் உங்களைப் பரிசோதித்து, தேவையான சோதனைகளைச் செய்து முறையான மருத்துவ சிகிச்சையைச் செய்வார், அல்லது, அவசர உதவி செய்து உங்களை ஒரு தேர்ந்த மருத்துவமனைக்கு அனுப்பி வைப்பார்.

உங்களுக்கு இது முன்னரே ஒரு [அ] ஒருசில முறைகள் நடந்து அதற்கான சிகிச்சை அளித்திருந்து, அடுத்த முறை வலி வரும் போது சாப்பிட என நைட்ரோக்ளிசரின்[Nitroglycerine] மாத்திரையோ [அ] ஸ்ப்ரேயோ[spray] உங்களிடம் இருப்பின், உடனே அதை உபயோகிக்க வேண்டும்.

அருகில் ஒரு நிழலான இடத்தில் அப்படியே அமருங்கள்.

பிறகு அவசர உதவுக்கான எண்ணிற்கு தொலைபேசி, அவர்களை வரவழைக்க வேண்டும்.

'இது சரியாயிரும்; எனக்கு ஒண்ணுமில்லை' எனச் சொல்லி வாளாவிருக்க வேண்டாம்.

ஏனெனில், இதயத் தாக்குதல் நிகழ்ந்த அடுத்த ஒரு மணி நேரம் மிகவும் முக்கியமானது!

பெரும்பாலான தாக்குதல்கள் இந்த ஒரு மணி நேரத்திற்குள் கவனிக்கப்பட்டால், சரியாகும் சாத்தியக்கூறுகள் இருக்கின்றன.

ஒரு அட்டாக் நடந்ததும்,இதயத்தின் திசுக்கள் பாதிப்பு நடந்த இடத்தைச் சுற்றி, செயலிழக்கத் துவங்குகிறது, ஆக்ஸிஜன் கிடைக்காததால்.

நேரமாக, நேரமாக, இந்த இடஅளவு பெரிதாகும் அபாயம் இருக்கிறது.

எனவேதான், உடனே மருத்துவ உதவிக்கு போக வேண்டியதன் முக்கியத்துவம் மேலும் அதிகமாகிறது.

எப்படி இதைத் தவிர்க்க முடியும்?
எதனால் தாமதமாகிறது, சிகிச்சைக்குச் செல்ல?

'எனக்கு என்ன வயசாயிருச்சு இப்ப? 28 வயசுதானே ஆகுது. எனக்கு இதெல்லாம் வராது'

'இந்த அறிகுறி , வலி என்னன்னு தெரியலை, வெறும் அஜீரணமாயிருக்கும். கத்திரிக்காய் கறில கொஞ்சம் எண்ணை அதிகம் இன்னிக்கு!'

'இது ஒண்ணும் அப்பிடி வலி ஜாஸ்தியா தெரியலை! ஒரு மோர் கரைச்சுக் கொடு! சரியாயிரும்!'

'லக்ஷ்மி, ஏதோ லேசா முணுக் முணுக்குன்னு மார் வலிக்குது, என்னவாயிருக்கும்?' 'கத்தாதீங்க, கத்திப் பேசாதீங்கன்னு எத்தினி வாட்டி சொன்னாலும் ஒங்களுக்கு புத்தி வராது. கொஞ்சம் தண்ணி குடிங்க. சரியாப் போயிடும்! காலைல போய் டாக்டரைப் பார்க்கலாம்'

' காலைலேர்ந்தே வயித்தை என்னமோ பண்ணிகிட்டு இருக்கு. இந்த அஜீரண சனியன் என்னிக்குத்தான் என்னை விட்டுப் போகுமோ தெரியலை.'

'என்ன இந்த மூட்டு வலி இன்னிக்கு கொஞ்சம் ஜாஸ்தியாவே படுத்துதே. லக்ஷ்மி, அந்த மூட்டுவலி மாத்திரையக் கொண்டா!'

'இன்னிக்கு என்னமோ நெஞ்சு வலி ஜாஸ்தியா இருக்கு. சரியாப் போயிடும்னு நினைக்கிறேன். கமலாதான் என்ன பண்ணுவா பாவம்! அவ ஒருத்தி சம்பளத்துலதான் எங்க எல்லாரையும் பார்த்துக்கறா. இப்ப இதை வேற சொன்னா டாக்டர் செலவுதான் எக்ஸ்ட்ராவாகும். இந்த பணம் இருந்தா நாளைக்கு ராஜு ஸ்கூல் ஃபீஸ் கட்ட ஒதவும். கொஞ்சம் படுத்தா சரியாயிடும்'

இப்படிப் பல்வேறு காரணங்களால் இந்த நெஞ்சுவலி புறக்கணிக்கப்படும் அபாயம் நிகழலாம்!

ஆனால், இவையே உங்கள் உயிருக்கு எமனாகக் கூடிய சாத்தியம் உண்டு!

தாமதம் செய்யாதீர்கள் என்ற எச்சரிக்கையுடன் இப்பதிவை முடித்து கடைசி இரு கேள்விகளுக்கான விடையை அடுத்த பதிவில் பார்க்கலாம்!

[இங்கு சொல்லியிருப்பதெல்லாம் உங்கள் தகவலுக்காகவே!
உங்கள் மருத்துவரே இதை முறையாக பரிசோதித்து சிகிச்சை அளிக்க முடியும்.]

"லப்-டப்" -- 13 "ஆ! நெஞ்சு வலிக்குதே!"[2]"நடந்தது என்ன?"

2007-02-22T13:20:00.000-08:00

"லப்-டப்" -- 13 "ஆ! நெஞ்சு வலிக்குதே!"[2] "நடந்தது என்ன?"

இந்தத் தொடரை நான் ஆரம்பிப்பதற்கு, பொன்ஸின் இந்தப் பதிவுதான் தூண்டுகோலாய் இருந்தது!

அவர் சொன்னதைத் தொடர்ந்து ,சற்று விவரமாக இந்த 'ஹார்ட் அட்டாக்' பற்றி எழுதலாம் என ஆரம்பித்தது இன்று ஒரு டஜன் பதிவுகளைத் தாண்டி போய்க்கொண்டிருக்கிறது.

இதற்கு பொன்ஸுக்குதான் நன்றி சொல்ல வேண்டும்!

சென்ற பதிவில் ஒரு நிகழ்சியைப் பார்த்து, சில கேள்விகளையும் பார்த்தோம்!

சரி! இனி மேலே பார்க்கலாம்!

மையோகார்டியல் இன்ஃபார்க்ஷன் [Myocardial Infarction] என்றால் என்ன?

அப்படி என்றால் என்ன?
எப்படி நிகழ்கிறது?
எதனால் வருகிறது?
எப்படி இதைத் தவிர்க்க முடியும்?
இதன் அறிகுறிகள் என்னென்ன?
என்ன சிகிச்சை இதற்கு?
சிகிச்சைக்குப் பின் என்ன செய்ய வேண்டும்?

'மையோ' என்றால் சதை [muscle]; 'கார்டியல்' [cardial]என்றால் இதயத்தைக் குறிக்கும்; 'இன்ஃபார்க்ஷன்'[Infaction] என்பது ரத்த ஓட்டம் இல்லாமல் இறந்த திசு எனப் பொருள்.

எல்லா திசுக்களைப் போலவே, இதயமும் திசுக்களால் மட்டுமே ஆன ஒரு உறுப்பு.

அதற்கும் மற்ற உறுப்புகளைப் போலவே, தொடர்ந்த ரத்த ஓட்டம் மூலம் சத்துப் பொருள்களும், ஆக்ஸிஜனும் தேவை!

முன்பே சொல்லியிருப்பது போல், கரோனரி நாளங்கள்[Caronary arteries] மூலமே இது நிகழ்கிறது.

இதில் எதேனும் அடைப்பு[block], தடை[obstruction], குறுகல்[narrowing], இறுகல்[hardening], ரத்தக்கட்டி[bloodclot] எவையேனும் நிகழும் போது அதற்கு கரோனரி நாள நோய்[Caronary Artery Disease] எனப் பெயர்.

மேற்சொன்ன எல்லாமும் ரத்தஓட்டத்தை தடைப்படுத்தி, இதயத்திசுக்களின் சில பாகங்களை மரிக்கச் செய்கிறது.

இப்போது அந்தப் பகுதி, மற்ற திசுக்களோடு இழைந்து இயங்க முடியாமல் போகிறது.

ஒரு வலி மூலம் இது உணரப்படுகிறது.

இதற்கு ஆஞ்சைனா[angina]] எனப் பெயர்.

ஒன்று அல்லது ஒன்றுக்கும் மேற்பட்ட கரோனரி நாளங்களில் இது போல 'அடைப்பு'[block] ஏற்படுகையில் 'ஹார்ட் அட்டாக்'[heart attack] [அ] மாரடைப்பு நிகழ்கிறது!

"எப்படி நிகழ்கிறது?"

கொழுப்புச்சத்து ரத்த நாளங்களின் உள்ளே அதிகமாகும் போது, நாளங்களின் உட்சுவற்றில் சிறிய காயம்[injury] ஏற்படுகிறது

இதை ஆற்றுவதற்கென நாளச்சுவர்கள்[vessel walls] ஒருவிதமான ரசாயனப் பொருட்களை[chemicals] சுரக்கின்றன

இதனால், சீரான ரத்த ஓட்டம் தடைப்பட்டு, சற்று தேக்கம்[slowing] ஏற்படுகிறது

இப்போது, ரத்தத்தில் மிதக்கும் புரதம், கால்சியம், மற்றும் இன்னும் சில கழிவுப் பொருட்கள் [போன பதிவுகளில் படிக்கவும் இவையெல்லாம் என்னென்னவென!] இந்த நாளச்சுவர்களில் ஒட்டிக் கொள்கின்றன

இவையெல்லாம் கொஞ்சம் கொஞ்சமாகச் சேர்ந்து, உருண்டு, திரண்டு [!!] ஒரு துகள்[Plaque] என ஆகிறது.

நாளாக, நாளாக, இந்த துகள்கள் பல்வேறு அளவுகளில் உருவாகி ரத்தநாளங்களுக்குள் சும்மா அலம்பலா இங்குமங்குமாய் ஓடிக்கொண்டிருக்கின்றன.

உள்ளே சாதுவாகவும்[soft], வெளியே திடமாகவும்[hard] இருக்கும் இந்தத் துகள்கள்[plaques] எப்போதாவது உடையும் போது, இந்த மென்பொருள்[soft fatty inside]] வெளியே வர, உடனே ப்ளேட்லெட்டுகள்[platelets] இதனை அடைக்க வர, ரத்தக்கட்டி[clot] உருவாகுகிறது!!

இப்படி உருவான ரத்தக்கட்டி, ஏதேனும் ஒரு சிறிய ரத்தக்குழாயில் சென்று அடைத்துக் கொள்ளும் போது, அந்தக் குழாயில், நாளத்தில், அடைப்பு ஏற்பட்டு, அடைப்புக்குக் கீழே [below the block]செல்லும் நாளத்தில், ரத்தம் செல்வது தடைப்படுகிறது.

பிரணவாயு கிடைக்காமல் வெகு விரைவில், இந்தப் பகுதி உணர்விழக்கிறது[starved].

இதற்கு 'உடனடி கரோனரி சிண்ட்ரோம்'[Acute Caronary Syndrome] எனப் பெயர்.

இது மூன்று வித விளைவுகளை நிகழ்த்தலாம்.

1.இது உடனடியாக ரத்த ஓட்டத்தின் வேகத்தின் மூலமாகவே அகற்றப் படுகையில், இது தானாகவே சரி செய்யப்பட்டு சகஜ நிலை மீண்டும் திரும்புகிறது.

இதற்கு அன்ஸ்டேபிள் ஆஞ்சைனா[Unstable Angina] எனப் பெயர்.

2.அகற்றப்படாமலும், உடையாமலும், அடைப்பு அங்கேயே [பெரிய அளவில்] நிற்கையில், மாரடைப்பு[Heart attack] என்பது நிகழ்கிறது.

3.இதன் மூலம் இந்த ரத்தக்குழாய் அடைப்பு தாங்காமல் உடைபட்டு, இதய நிறுத்தம் [Cardiac arrest] நிகழும்.

"எதனால் வருகிறது?

எப்படி இதைத் தவிர்க்க முடியும்?
இதன் அறிகுறிகள் என்னென்ன?
என்ன சிகிச்சை இதற்கு?
சிகிச்சைக்குப் பின் என்ன செய்ய வேண்டும்?"

அடுத்த பதிவில் பார்க்கலாம்!

[இந்தப் பதிவில் சொல்லியிருப்பது எல்லாம் உங்gaள் தகவலுக்காகவே!

உங்கள் மருத்துவரை ஆலோசிப்பதே நல்லது!]

"லப்-டப்" -- 12 " ஆ! நெஞ்சு வலிக்குதே!....."

2007-02-20T18:13:00.000-08:00

"ஆ! நெஞ்சு வலிக்குதே!"

"உன்கிட்ட எத்தனை தடவை சொல்லி இருக்கேன்! எனக்கும் அவளுக்கும் ஒரு தப்பான உறவும் இல்லை! நானும் அவளும் நல்ல ஃப்ரெண்ட்ஸ்! அதுவும் ஆஃபீஸ்ல மட்டும் தான்! அவ வீட்டு விஷயம்லாமும் என்கிட்ட சொல்லுவா! அதெல்லாம் நான் உன்கிட்ட அன்னன்னிக்கே சொல்லியும் இருக்கேன். நீதான் என்னென்னவோ கற்பனை பண்ணிகிட்டு தெனம் என்னைப் புடுங்கறே! ஒரே நரகமா இருக்கு!"

"இருக்காதா பின்னே! அவ பேசினா இனிக்கும்... சொர்க்கமா இருக்கும். நான் பேசினா நரகமாத்தான் இருக்கும். ஒங்கள சொல்லி குத்தமில்லை! எனக்கு வாய்ச்சது அவ்வளவுதான்!. போங்க! போய் அந்த மேனாமினுக்கி கிட்டயே விளுந்து கிடங்க. நான் போறேன் எங்கம்மா வீட்டுக்கு!"

"போய்த்தொலை! நீ ஒழிஞ்சாத்தான் எனக்கு நிம்மதி!"

கடற்கரை மணலில் கால் போன போக்கில் நடந்து கொண்டே சென்ற மோஹனுக்கு சற்று முன் நடந்த சம்பவம் மனதில் அப்படியே ஆடிக் கொண்டிருந்தது!

"சே! சற்றுகூட நம்பிக்கை இல்லாத மனைவி! என்ன வாழ்க்கை இது! எதுக்கெடுத்தாலும் சந்தேகம்! நெனச்சுப் பார்க்கவே நெஞ்சு துடிக்குது....... "

திடீரென நெஞ்சு நிஜமாகவே வலிப்பது போல் தோன்றியது அவனுக்கு.

முணுக் முணுகென்று இடது பக்கம் மார்பில் ஒரு வலி!

உடல் வியர்க்க ஆரம்பித்தது.

இடது கையில் தோள்பட்டையில் இருந்து கிளம்பி 'ஜிவ்'வென்று ஒரு மின்னல் போல வலி கை முழுதும் பரவியது.

நாக்கு உலர்ந்தது போல ஒரு உணர்வு!

சற்று உட்கார்ந்தால் தேவலை எனத் தோன்றியது.

அப்படியே ஒரு படகின் பக்கம் போய் உட்கார்ந்தான்.

செல்ஃபோன் சிணுங்கியது!

நண்பன் குமார்தான்!

"என்னடா! எப்படி இருக்கே!" என்றான் குமார்.

"குமார், கொஞ்சம் உடனே மெரீனா பீச்சுக்கு வர்றியா? சீக்கிரம் வாயேன்!நெஞ்சு வலிக்கற மாதிரி இருக்கு. டாக்டர்கிட்ட போகலாம்னு நினைக்கறேன். நீயும் வந்தியானா கொஞ்சம் ஹெல்ப்ஃபுல்லா இருக்கும்." .............சொல்லி முடிக்குமுன் குமார் கத்தினான்..."நீ அங்கியே இரு, அஞ்சு நிமிஷத்துல வரேன்."

அடுத்த அரை மணி நேரத்தில் மோஹன் ஒரு தனியார் மருத்துவ மனையில் சேர்க்கப்பட்டான்.

அவன் மனைவிக்கும் தகவல் பறந்தது.

அலறி அடித்துக் கொண்டு அவளும் ஓடிவந்தாள்.

ஸ்கேன், ஈ.சி.ஜி. [scan, E.C.G] எல்லாம் எடுக்கப்பட்டு உடனடியாக கார்டியாக் கதீடரைசேஷன்னுக்கு [Cardiac catheterization] அழைத்துச் செல்லப்பட்டான்.

இதயத்தில் ஒரு நாளத்தில் அடைப்பு இருப்பதாகவும், உடனடியாக அறுவைச் சிகிச்சை மூலம் அதனை அகற்றாவிட்டால் உயிருக்கே ஆபத்து என்றும் மருத்துவர் சொல்ல, அதன்படியே நடந்து, இப்போது ரீ-ஹேப்பில் இருக்கிறான் மோஹன்.

சரியான நேரத்தில் கொண்டுவரப்பட்டதால்தான் மோஹனின் உயிரைக் காப்பாற்ற முடிந்தது என குமாரைப் புகழ்ந்தார் டாக்டர்.

"எனக்குத் தாலி பாக்கியம் கொடுத்தீங்க குமார்! உங்களை மறக்கவே மாட்டேன்!" என மோஹனின் மனைவி ராதா நன்றி சொன்னாள்.

கொஞ்ச நாளைக்கு அவருக்கு அதிர்ச்சி தரும் வகையில் எதுவும் பேச வேண்டாம். முழு ஓய்வு வேணும் அவருக்கு என மருத்துவர் அறிவுறுத்தினார்.

அப்படி ஒன்றும் வயதாகவில்லை மோஹனுக்கு.

34 தான் ஆகிறது!

மோஹனுக்கு அப்படி என்னதான் நிகழ்ந்தது?

டாக்டர் சொன்னார் அவனுக்கு வந்தது மையோகார்டியல் இன்ஃபார்க்ஷன் [Myocardial infarction] என்று.

அப்படி என்றால் என்ன?

எப்படி நிகழ்கிறது?

எதனால் வருகிறது?

எப்படி இதைத் தவிர்க்க முடியும்?

இதன் அறிகுறிகள் என்னென்ன?

என்ன சிகிச்சை இதற்கு?

சிகிச்சைக்குப் பின் என்ன செய்ய வேண்டும்?

அடுத்த சில பதிவுகளில் பார்க்கலாம்!

;">"லப்-டப்" -- 11 "ஓடிய கால்களை ஓடவிடாமல் ......!!"

2007-02-13T20:37:00.000-08:00

"லப்-டப்" -- 11 "ஓடிய கால்களை ஓடவிடாமல் ......!!"

ரத்தநாளங்களைப் பற்றிச் சொல்லி வரும்போது கால்களைப் பாதிக்கும் நோயைப் பற்றிப் பார்த்தோம்.

இன்னொரு வழி மூலமாகவும் கால்,கை செயலிழக்கக் கூடும்.
அதுதான் மூளையில் ஓடும் ரத்த நாளங்களால் ஏற்படும் 'பக்கவாதம்' என அழைக்கப்படும் மூளைத்தாக்குதல்[Cerebral Stroke] .

இதயத்திற்கு மேல்பகுதிக்கு, குறிப்பாக மூளைக்கு, ரத்தத்தை அனுப்பும் வேலையை கரோடிட்[Carotid vessels] என்னும் நாளம் செய்கிறது.
இது கழுத்தின் இரு பக்கங்கள் மூலமாக வலது, இடது கரோடிட் ஆர்ட்டெரி, வெயின்[Carotid Artery&vein] என சுத்த மற்றும் அசுத்த ரத்தத்தை எடுத்துச் செல்கின்றன.

இவற்றிலும் ஏற்கெனவே சொன்னது போல கொழுப்பு, கொழுப்புச்சத்து, மற்றும் இன்னும் சில கழிவுப்பொருட்களின் தேக்கத்தால் துகளோ[plaque], அல்லது அடைப்போ[clot], நிகழும் வாய்ப்புகள் உண்டு.

இதன் மூலம் மூளைக்குத் தேவையான ரத்தம் தடைப்படும் போது, எந்த குழாய் அடைபட்டதோ, அது ரத்தம் கொடுக்கும் இடங்களால் கட்டுப்படுத்தப்படும் உடலின் பாகங்கள் பாதிக்கப் படுகின்றன.

இதனையே பொதுவாக ஸ்ட்ரோக்[Stroke] எனச் சொல்லுகிறோம்.

இது நான்கு விதங்களால் நிகழக்கூடும்.

1.ரத்தக்குழாய் குறுகலாக ஆதல்.[Narrowing]

2.இந்த அடைப்பில் இருந்து ஒரு சிறு பகுதி பிய்த்துக் கொண்டு ரத்தத்தில் தவழ்ந்து சென்று, இன்னொரு சிறிய குழாயை அடைந்து அதை அடைத்துக் கொள்ளுதல்,[Plaque dislodgement]

3.ரத்தக்கட்டி[clot] உண்டாகி ஏதேனும் ஒரு குழாயை அடைத்துக் கொள்ளுதல்.
[இம்மூன்றும் ரத்தம் மூளையின் சில பகுதிகளுக்குச் செல்வது தடுக்கப்படுகிறது. இவ்வாறு நிகழும் போது, ரத்தம் கொண்டுவரும் பிராணவாயு[O2], குளூக்கோஸ்[சர்க்கரைச் சத்து][Glucose] மூளையில் இருக்கும் செல்களுக்கு போய்ச்சேராமல் இப்பகுதிகள் வெளிறிப் போகின்றன.[Ischemia] இவ்வாறான பாதிப்பு 3 முதல் 6 மணி நேரத்துக்கு மேல் நிகழும்போது, இதனால் ஏற்படும் விளைவுகளும் நிரந்தரமாகிப் போகின்றன.

4. அழுத்தம் அதிகமாகியோ, அல்லது வேறு சில காரணங்களாலோ,ரத்தக்குழாய் உடைந்து போகும் போது, மூளைத்திசுக்களில் ரத்தக்கசிவு ஏற்பட்டு, மூளையின் செல்கள் தாக்கப்படுவது இன்னொரு வகை. இதனை Hemorrhagic Stroke எனச் சொல்லுவார்கள்.

இந்த ஸ்ட்ரோக் நிகழ என்ன காரணங்கள்?

1. பரம்பரை வரலாறு.[Family History]: குடும்பத்தில் இது போல முன்னர் எவருக்கேனும் நிகழ்ந்திருந்தால், மற்றவர்க்கும் நிகழ வாய்ப்புகள் அதிகம்.
2. வயது.: 75 வயதுக்கு முன், பெண்களை விட ஆண்களுக்கும், 75-க்குப் பின், பெண்களுக்கும் வாய்ப்பு அதிகம்.
3. அதிகமாக புகை பிடித்தல்.
4. ரத்த அழுத்த நோய்[Hypertension]
5. கட்டுப்படுத்தாத நீரிழிவு நோய்[Uncontrolled Diabetes]
6. உடல் பரும்ன் அதிகமாதல்[Obesity]
7. அளவு மீறி மது அருந்துதல்
8. கெட்ட கொழுப்ப்புச்சத்து என அழைக்கப்படும் ஹை-லோ லைப்போ புரோட்டின்[High-Low Proteins] எனப்படும் கொழுப்புச்சத்து.

இப்போது இதன் அறிகுறிகளைப் [signs&symptoms] பார்ப்போம்.

1. உடலின் ஒரு பகுதி, குறிப்பாக ஒரு பக்க கை, கால் மரத்துப் போதல், அல்லது உணர்விழத்தல்.
2. திடீரென ஒன்று [அ] இரு கண்களிலும் பார்வை மங்கிப் போதல், [அ] அற்றுப்போதல்.
3. வாய் பேச முடியாமல் போதல், [அ] குழறுதல்.
4. பிறர் சொல்வது புரியாமல் போதல் [அ] தன் கருத்தை சரியான முறையில் வெளிப்படுத்த முடியாமல் போதல்.
[இதை இங்கே ரொம்ப பேர் பண்றாங்களென்னு ஒரு பி.ஊ. போட கொத்தனார் கை பரபரப்பது எனக்குத் தெரிகிறது!:))]
5.மூளை நினைப்பதை உடனே செய்யமுடியாமல் ஒரு குழப்பநிலை தோன்றுதல்[confusion]
6. விழுங்குவதில் சிரமம்.
7. மயங்கி விழுதல்.
8. நினைவு திரும்பாமல் போதல்.
9. மரணம்.

இறுதியில் கூறிய [7,8&9] மூன்றும் மிகப் பெரிய அளவிலான ஸ்ட்ரோக் [அ] தாக்குதல் நிகழும்போது மட்டுமே நடக்கக்கூடியவை.
இதன் அறிகுறிகள் தோன்றிய உடனேயே[1,2&3] ஒரு மருத்துவரிடம் சென்று, தேவையான பரிசோதனைகளைச் செய்து, சிகிச்சையை மேற்கொண்டால், ஒரு 50% அளவில் இதனைத் தடுக்க முடியும் என்பதை நினைவில் கொள்ளுங்கள். இந்த ஆரம்ப நிலையை தாற்காலிகத் தாக்குதல்[Transient Ischemic Attack] எனச் சொல்லுவார்கள்.

இதை உடனே கவனிக்காவிட்டால் ஒரு பெரிய தாக்குதலில் [Cerebral attack] போய் முடியும் அபாயம் இருக்கிறது.

ஏதோ சாதாரண மயக்கம், தலைசுற்றல், வாந்திதானே என நீங்களாகவே ஒரு மாத்திரையைச் சாப்பிட்டு, ஓய்வு எடுத்தால் சரியாகிவிடும் என அசட்டையாக இருந்துவிடாதீர்கள். முறையான சோதனைகளுக்குப் பிறகு உங்கள் மருத்துவர் அதைச் சொல்லட்டும்.

இப்பதிவில் வேறு எதை மறந்தாலும், இதனை மட்டும் மறந்து விடாதீர்கள் என வேண்டிக் கேட்டுக் கொள்கிறேன்.

இது ஒரு தவிர்க்கப்படக்கூடிய நோயே அன்றி, ஏதோ தீராத வியாதி அல்ல!

அறிகுறிகள் தென்பட்டதுமே சிகிச்சை அளித்தால், பெரும்பாலும் ஆரம்பநிலையிலேயே இதனைக் கட்டுப்படுத்த முடியும்.

இதைக் கண்டுபிடிக்கும் சோதனைகள், சென்ற பதிவில், PAD க்கு சொன்னது போல அல்ட்ராசவுண்ட்[Ultrasound], கரோடிட் ஆஞ்சியோக்ராஃபி[Carotid Angiography], CT ஸ்கேன்[CT Scan] போன்ற எளிதான சிலவே!

பாதிக்கப்பட்ட, பாதிக்கப்படப்போகும் மூளையின் பகுதிகளை இதன் மூலம் கண்டுபிடிக்க முடியும்.

இதற்கான சிகிச்சைமுறை வெறும் மருத்துவர் செய்வது மட்டும் அல்ல.

[Carotid Stent]

உடனடிக் காரணத்தை அடைப்பை நீக்கும் அறுவைச்சிகிச்சை[Carotid Stenting ] மூலமாகவும் ரத்தக்கசிவை சில மாத்திரைகள், தேவைப்பட்டால் அறுவைச்சிகிச்சை [Aneurysm Repair] மூலமாகவும் மருத்துவர் செய்தாலும், முக்கியமாகச் செய்ய வேண்டியவர் நீங்கள்தான்!

1. புகையிலை, புகைபிடித்தல் இவற்றை அறவே விடணும்
2. ரத்த அழுத்தம், நீரிழிவு இவற்ரை அளவோடு வைக்க வேண்டும்.
3. முறையான மருத்துவப்பரிசோதனை ஒழுங்காக செய்து கொள்ளணும்.
4. கொழுப்புச்சத்தை கட்டுப்பட்டுத்தணும்.
5. உணவில் மிகவும் கட்டுப்பாடுடன் இருக்கணும். உப்ப்பைக் குறைத்து, கொழுப்புச்சத்து உள்ள பொருட்களை அளவோடு பயன்படுத்தி, கொலெஸ்ட்ராலைக் கட்டுப்படுத்தணும்.
6. உடல் பருமனை வயது, உயரத்திற்குத் தக்க அளவில் வைக்கணும்.
7. தினசரி உடற்பயிற்சி, மருத்துவரின் ஆலோசனையுடன் செய்ய வேண்டும்.
8. மது அருந்துவதை நிறுத்தினால் நல்லது. முடியாவிட்டால்[!!] மிகுந்த கட்டுப்பாட்டுடன் இருக்கவாவது கத்துகோங்க.
9. மருத்துவர் எழுதிக் கொடுத்த மருந்து மாத்திரைகளை தவறாமல் சாப்பிடணும். [இதில் சில மருந்துகள் நீங்கள் ஆயுட்காலம் முழுதும் சாப்பிடும் படியாக இருக்கும்! அப்படிச் சாப்பிடும் போது, அதற்காக சில ரத்தப்பரிசோதனைகள் செய்யும் படியாகவும் இருக்கும். அதையும் தவறாமல் செய்து கொள்ளணும்.]
10. தடாலடியாக, உடலை வருத்தி அதிக வேலை செய்து ஆயாசப்பட வேண்டாம்.
11. கோபத்தைக் குறையுங்கள்.

இப்பதிவின் முக்கியத்துவம் உணர்ந்து ஒரு சிலராவது தங்கள் வாழ்க்கைமுறையை மாற்றி அமைத்துக் கொண்டால் பெரிதும் மகிழ்வேன்!

நன்றி. வணக்கம்.
அடுத்த வாரம் மீண்டும் சந்திக்கலாம்.

[நண்பர் கல்யாண் அவர்களின் அகால மரணத்தினால், இப்பதிவு வருவதில் ஓரிரு நாட்கள் தாமதமானதற்கு மன்னிக்க வேண்டுகிறேன்.
அவரது ஆத்மா சாந்தியடைய எல்லாம் வல்ல முருகப்பெருமானை வேண்டுகிறேன்.
அவரது குடும்பத்தினர்க்கு என் ஆழ்ந்த அனுதாபங்கள்.]

"லப்-டப்" -- 10 "நடை தளர்ந்தது நாளமல்லவா"

2007-02-04T05:59:00.000-08:00

"லப்-டப்" -- 10 "நடை தளர்ந்தது நாளமல்லவா!"

ரத்தம் பற்றிய சில தகவல்களை இதுவரை பார்த்தோம். விரைவில் இதயத்தை நோக்கி நம் பயணம் சென்றடைய வேண்டும் என்பதால், இந்த ரத்தத்தை எடுத்துச் செல்லும் ரத்த நாளங்களைத் தாக்கும் சில நோய்களை [Vascular diseases] இன்று பார்க்கலாம்!

1. புற நாள நோய் [Peripheral vascular Disease,[aka] Peripheral Arterial & Venous Diseases [aka] PAD & PVD]

சுத்த ரத்தத்தையும், அசுத்த ரத்தத்தையும் எடுத்துச் செல்லும் பணியை இந்த நாளங்கள் செய்கின்றன.

இதற்கு இதன் உட்பகுதி ஒரே சீராக, வழுவழுப்பாக [smooth] இருக்க வேண்டும்.
அப்போதுதான் ரத்தம் தங்கு தடையின்றி ஓடும்.

அதிகப்படியான கொழுப்பு [fat], கொழுப்புச் சத்து [cholestrol], இன்னும் சில பொருள்கள் [Inflammatory cells, proteins, and calcium] ரத்தத்தில் மிதந்து செல்லுகையில், நாளங்களின் உட்பகுதி இவற்றால் பாதிக்கப்பட்டு,குறுகலாகிறது.
சில சமயங்களில் அங்கங்கே அடைப்பும் ஏற்படுகிறது.

இவ்வாறு நிகழும் போது, இந்த நாளங்களால் பயன்பெறும் உடல் பாகங்கள் சரியான சத்தை [O2& nutrients] பெறமுடியாமலோ, [அ] கழிவுப்பொருட்களை உடனடியாக அகற்ற முடியாமலோ வலு இழக்கின்றன; நசித்துப் போகின்றன.

இவ்வாறு நிகழ்வதற்கு 'PAD/PVD' எனப் பெயர்.

இதனால், இதயத் தாக்குதல்[Heart attack]. சிறு அளவிலான [அ] பெருமளவிலான மூளைத் தாக்குதல்[Transient Ischemic Attack or Stroke], நடைவலி [Claudication], தோலின் நிறம் மாறுதல் [Skin color changes], புண்கள் [sores & ulcers], போன்றவைகள் ஏற்பட்டு, காலையே இழக்கும் அபாயம் ஏற்படலாம்.

அதிகமாகப் புகை பிடித்தல் [smoking], நீரிழிவு நோய் [Diabetes], முதிர்ந்த வயது[Advanced age], இனம்[Race], பரம்பரை வரலாறு[Family history], மிகுதியான ரத்த அழுத்தம்[High Blood Pressure] போன்றவை இந்த 'PAD/PVD'க்கு முக்கிய காரணங்கள் எனச் சொல்லலாம்.

இதன் அறிகுறிகள்:

கால்,கால்விரல்களில் ஒரு எரிச்சல், வலி
கால் மற்ற உடற்பாகங்களை விட சில்லிட்டுப் போதல்
முதலில் சிவப்பாகி, பின்னர் கருத்துப் போதல்
நோய்கள் விரைவாகத் தாக்கும் அபாயம்
காயங்கள் சீக்கிரம் ஆறாமல் போதல்

இவற்றில் ஏதேனும் தோன்றும் போது, உடனே உங்கள் மருத்துவரைக் கலந்தாலோசிப்பது மிகவும் முக்கியம்!

ஒரு சில பரிசோதனைகள் மூலம் [Arterial Dopplers, Pulse Volume Recording, Vascular ultrasound,CT scan, MRI] இதனை விரைவில் கண்டுபிடித்து, சிகிச்சை தொடங்க முடியும்.
முழுதுமாகக் குணப்படுத்த முடியாவிடினும், கட்டுப்படுத்த முடியும், எவ்வளவுக்கெவ்வளவு விரைவாகச் சிகிச்சையை ஆரம்பிக்கிறோம் என்பதைப் பொருத்து.

புகை பிடித்தலை விட்டு, சரியான உணவு முறைகளைக் கையாண்டு, உடல்பயிற்சிகள் மூலம் உடலைச் சீராக வைத்து, இதனைத் தடுக்க முடியும்.

2. நாளப் புடைப்பு [Aneurysm]
ரத்த நாளத்தின் உட்பகுதி ஏதேனும் ஓரிடத்தில் வலுவிழந்து, சிறிதாக புடைத்துக் கொள்ளும். எங்கு வேண்டுமானாலும் இது நிகழுமென்றாலும், அயோர்ட்டாவிலேயே[] இது பெரும்பாலும் நிகழ்கிறது.
இந்தப் புடைப்பில்[bulging] முட்டி மோதி ஓடும் ரத்தம் ஒரு சிறிய சுழலில் மாட்டிக் கொள்வது போல் ஆகி, துகள்கள்[plaques], கட்டிகள்[clots] ரத்தத்தில் உருவாகி அங்கிருந்து கிளம்பி வேறு சில சிறிய நாளத்தில் போய் அடைத்துக் கொள்ளும் போது விபரீத நிகழ்வுகள் ஏற்படலாம்.

சில நேரங்களில் இந்த புடைப்பு அதிகமாகி, ரத்த நாளம் வெடித்து, உயிருக்கே ஆபத்து ஏற்படும் நிலை இருக்கிறது.

'CT ஸ்கேன்', 'MRI', Ultrasound, டாப்ளர்[doppler] மூலம் இதனைக் கண்டுபிடித்து, தேவையான சிகிச்சையை உங்கள் மருத்துவர் கூறுவார்.

3. சிறுநீரக நாள நோய் [Renal Artery Disease]
வாலிப வயதில் தாக்கும் நோய் இது. இதன் விளைவு நம் உடலின் முக்கிய பாகமான சிறுநீரகத்தைப் பாதிக்கும் என்பதால் இது உடனடியாக கவனிக்கப்பட வேண்டிய விஷயம்.

4. 'ரேனால்ட்'ஸ் நோய் [Reynauld's Phenomenon/disease]
கை, கால் விரல்களில் இருக்கும் சிறு நாளங்களைத் 'துடிக்கச்'[spasms] செய்யும் நோய் இது! அதிகக் குளிர்[Extreme cold], ஆர்வம்[Excitement] இவற்றால் இது உண்டாகிறது.
ல்யூபஸ்[Lupus] முடக்கு நோய்[Rheumatoid Arthritis] ஸ்க்ளீரோடெர்மா[Scleroderma] என்னும் தோல் சுருக்க நோய் இவற்றால் பாதிக்கப்பட்டவர்களுக்கு இது நிகழும்.

5. பர்ஜெர்'ஸ் நோய்[Burger's disease]
மேலே சொன்ன நோயே சற்று பருமனான நாளங்களைத் தாக்குகையில் இந்த நோய் ஏற்படுகிறது. குளிரும், புகை பிடித்தலும் இதற்கான முக்கியக் காரணங்களாக அமைகின்றன.
பாதிக்கப்பட்ட உறுப்பையே இழக்கும் அபாயம் இதில் அதிகம்.

6. நரம்புச் சிலந்தி எனப் பொதுவாக[தவறாக!] அழைக்கப்படும் வெரிகோஸ் வெயின்கள் [varicose veins]
ஒரு இடத்தில் மட்டும் புடைப்பு[bulging] இல்லாமல், மொத்த நாளமும் வீங்கும் நிலை இது. பொதுவாக அசுத்த ரத்த நாளங்களையே, அதுவும் கால் நாளங்களையே இது பாதிக்கும்.
ஆண்களை விட பெண்களே இதனால் அதிகம் பாதிக்கப் படுகின்றனர். இதுவும் பரம்பரையாக குடும்பங்களில் வரும்.
ரத்த ஓட்டம் தடைப்பட்டு, கட்டிகள்[clots] உருவாகும் ஆபத்து இதில் அதிகம்.
தகுந்த சிகிச்சை முறைகளால் இதனைக் கட்டுப்படுத்த முடியும்.

இவை தவிர, Venous blood clots, Deep Vein Thrombosis, Pulmonary Embolism, Chronic Venous Insufficiency, clotting disorders,யானைக்கால் எனும் Lymphedema என இன்னும் சில நாள சம்பந்தமான நோய்கள் இருக்கின்றன.
பதிவின் நீளம் கருதி அதிகம் சொல்லாமல் விடுக்கிறேன்.
குறிப்பாக எதைப் பற்றியேனும் தெரிந்து கொள்ள வேண்டுமெனில், பின்னூட்டத்தில் கேட்கவும்.
எனக்குத் தெரிந்ததைச் சொல்கிறேன்.

முக்கியமான சில செய்திகள்:
இதன் அறிகுறிகள் தெரிந்தவுடனேயே, மருத்துவரைப் பார்ப்பதை, மறந்து விடாதீர்கள்!
புகை பிடிப்பவர்கள் அதனை விட்டு விடுங்கள் [அ] புகை பிடிப்பதைக் குறையுங்கள்.
உணவுக் கட்டுப்பாட்டின் மூலம், கொழுப்புச் சத்தை அளவோடு வைக்க வேண்டும். [இது பற்றி அடுத்த பதிவில் விரிவாக வரும்!]
தகுந்த உடற்பயிற்சிகள்,[regular walking is a must!] செய்ய வேண்டும்.

இதய நோய்களை நோக்கி இனி பயணிக்கலாம்!

[இது ஒரு சிறிய விளக்கம் மட்டுமே!

This is for informational purposes only!]

"லப்-டப்" 9 -- சாதி உட்பிரிவுகள்

2007-01-27T19:35:00.000-08:00

"லப்-டப்" 9 -- சாதியில் உட்பிரிவுகள்!

நாலு வகை பிரிவுகள் ரத்தத்தில் இருக்கிறதென போன பதிவில் சொன்னேன்.

இதற்குள்ளும் உட்பிரிவுகள் இருக்கிறதென அதே "மனு", கார்ல் லேண்ட்ஸ்டைனெர் Carl Landsteiner] 1940-ல், அலெக்ஸாண்டர் வைனெர் [Alexander Weiner] என்பவருடன் சேர்ந்து, கண்டு பிடித்தார்!

இதைப் பற்றிச் சொல்லலாமென நினைத்த போது,

ஏற்கெனவே நம்ம டாக்டர் ராமநாதனும், திருமதி கீதா சாம்பசிவமும் விளக்கமாக சொல்லியிருப்பதை,

"பின்னூட்ட நாயகன்", "பின்னூட்ட ஜாம்பவான்" ,"பின்னூட்ட முன்னோடி", இலவசக் கொத்தனார் என் கவனத்திற்குக் கொண்டு வந்தார்!

இதைவிடச் சிறப்பாகவோ, புதிதாகவோ சொல்ல என்னால் முடியாது என்பதால், அதை உங்கள் பார்வைக்கு முன் வைக்கிறேன்

சுட்டி-1

சுட்டி-2

சுட்டி-3

அதைப் படிக்க நேரம் இல்லாதவர்களுக்காக ஒரு சிறு விளக்கம், சுருக்கமாக!

45 தனித்தனி ஆண்டிஜென்களால் நிர்ணயிக்கப்பட்டு, குரோமோசோம் எண் ஒன்றின்[Chromosome #1] ஜீன்களில் நிலை பெற்றுள்ள ஒரு கணிப்பால், நம் அனைவரின் ரத்த குரூப்புகளும், பாசிடிவ் அல்லது நெகடிவ் [posiyive or negative] என மேலும் உட்பிரிவுகளாய்ப் பிரிக்கப் படுகிறது!

எனவே, நாலு சாதிகளும்[A, B, AB, O] ஏ பாசிடிவ், ஏ நெகடிவ், பி பாசிடிவ், பி நெகடிவ், ஏபி பாசிடிவ், ஏபி நெகடிவ், ஓ பாசிடிவ், ஓ நெகடிவ் என எட்டாகப் பிரிகின்றன!!

இதனை ஆர்ஹெச் பாசிடிவ், நெகடிவ் [Rh positive, Rh Negative] எனச் சொல்வர்.

ஆர்ஹெச் தந்தையும், ஆர்ஹெச் தாயும் ஒரு ஆர்ஹெச் பாசிடிவ் குழந்தையையோ, அல்லது ஆர்ஹெச் நெகடிவ் குழந்தையையோ 50/50 என்ற கணக்கில் உருவாக்க முடியும்.

அப்போது, தாயின் நெகடிவ் செல்கள், இந்த பாசிடிவ் குழந்தையின் [பாசிடிவ்] செல்களை அழிக்கும் அபாயம் நிகழ்கிறது.

பொதுவாக, முதல் குழந்தை இதிலிருந்து தப்பித்து விடுகிறது!

ஆனால், இதனால் ஏற்படும் ஆர்ஹெச் ஆண்டிபாடிகள் அடுத்து வரும் பிறப்புகளுக்கு பெரும் ஆபத்தைக் கொடுக்கின்றன!

இது அறிந்தவுடன், ஏழாம் மாதத்திலும், குழந்தை பிறந்த 72 மணி நேரத்துக்குள்ளும் ஒரு தடுப்பு ஊசி போடுவதின் மூலம், தடுக்க முடியும் என்பது இன்றைய மருத்துவ உலகின் சாதனை!

திருமணத்திற்கு முன்னோ, அல்லது கருத்தரிக்கும் முன்னரோ இதைச் சோதனை செய்து கொள்வது மிகவும் முக்கியம்!

அடுத்த வாரம் மீண்டும் சந்திப்போம்!

"லப் - டப்" -- 8 "சாதிகள் இருக்குதடி பாப்பா!"

2007-01-20T19:04:00.000-08:00

"லப் - டப்" -- 8 "சாதிகள் இருக்குதடி பாப்பா!"

பதினேழாம் நூற்றாண்டு மத்தியில், உலகின் முதல் ரத்த பரிமாற்றம்[Blood Transfusion] நடைபெற்றது.
ஆனால், நோயாளி இறந்து போனார்!
அதன் பிறகு, நோயாளியைக் காப்பாற்ற முயற்சி செய்யும் கடைசி ஆயுதமாகவே ஒரு 150 ஆண்டுகள் கழிந்தன.... பெரும்பாலும் தோல்வியாகவே!

இதைப் பற்றி சிந்தித்த ஒரு மருத்துவர் பெரிதும் முயன்றார். வெற்றியும் பெற்றார் 1900-ல்!
அவர் பெயர் கார்ல் லேண்ட்ஸ்டைனெர்[Karl Landsteiner].

மருத்துவ உலகின் "மனு" இவர்!

ஆமாங்க! ரத்தத்தில் 4 தனித் தனி சாதிகள் இருக்கு எனச் சொன்னவ்ர் இவர்தான்!

A, B, AB, O என்ற நாலுவகைப் பிரிவுகள்.
இவற்றை நிர்ணயிக்க உதவும் நால்வகைப் பொருட்கள், நம் உடலிலேயே இருப்பவை,.. கீழே!
A, B, என இரு 'தடுப்பு சக்தியை தூண்டும் என்சைம்கள்'[Immune response enzymes],ஆன் டிஜென்கள்[antigens].
anti-A, anti-B என இவற்றிற்கு மாற்றான விளைவை, எதிர்ப்பை [] உண்டுபண்ணும் ஆன்டிபாடிகள்[antibodies]

ஒரே ஒரு உதாரணம் கொடுக்கிறேன்.

'ஏ' வகை ரத்தம் தனது சிவப்பணுக்களின் மேல்பாகத்தில், 'ஏ' ஆண்டிஜெனைக் [A antigen]கொண்டிருக்கும்.
இதன் மூலம், 'ஆண்டி-ஏ' ஆண்டிபாடிகள் [anti-A antibodies] உருவாகமால் தடுக்கப் படுகிறது.
'ஏ' குரூப் ரத்தம் தானமாக[கொடையாக!] வழங்கப்பட்டு ஏற்றுக்கொள்ளப் படுகிறது.

அதே சமயம், 'பி'குரூப் ரத்தம் இவர்களுக்குச் செலுத்தப்படும் போது, நோயாளியின் ரத்தத்தில் இருக்கும் ப்ளாஸ்மாவில் உள்ள ஆண்டி-பி ஆண்டிபாடிகள்[anti-B antibodies] இதனை வேற்றுப் பொருளாகக் கருதி, ரத்தம் உடலில் சேரவிடாமல் முறியடித்து, உயிருக்கே ஆபத்தையும் உண்டு பண்ணுகிறது.

இது போலவே, மற்ற பிரிவுகளுக்கும் நிகழ்கிறது!

இதிலும் ஒரு தனிச் சாதி எல்லாருக்கும் உதவும் ஒரு சாதியாக இருக்கிறது!

'ஓ' குரூப் ரத்தம் ஏபிஓ ஆண்டிஜென்களை[ABO antigens] உருவாக்குவதில்லை.
நோயாளியின் ரத்தத்தில் இருக்கும் ஆண்டிபாடிகளுக்கு இப்போது வேலையில்லாமல் போகிறது.
எனவே, இவ்வகை ரத்தம் மற்ற எல்லாவகை ரத்தத்துடனும்[ஏ, பி, ஓ] தயக்கமின்றி சேரும்!
இவ்வகை ரத்தம் உள்ளவர்கள் "பொதுவான கொடையாளிகள்"[Universal donors] எனப்படுவர்.

ஆனால், இவர்களால் எல்லாருக்கும் கொடுக்கத்தான் முடியுமே தவிர, பெறமுடியாது!
'ஓ'குரூப் ரத்தம் ஒன்றுதான் இவர்களுக்குச் சேரும்.

இப்படி ஒன்று இருந்தால், இவர்களுக்கு ஒரு மாற்று இருக்கவேண்டும் என்பதுதானே நியதி!

ஆம், 'ஏபி' வகை ரத்தப் பிரிவாளர்[AB group] எவரிடமிருந்தும் ரத்தம் பெற முடியும், ஏபிஓ ஆண்டிபாடிகளை[ABO antibodies] உருவாக்காததால்!
இவர்கள் ரத்தம் எவருக்கும் சேராது, தன்வகை குரூப்பைத் தவிர!
ஏனெனில், இவர்கள் ரத்தம் இருவகையான ஆண்டிஜெனையும்[A&B] உண்டுபண்ணுவதால், எந்த ரத்தத்தையும் அந்நியமாகப் பார்ப்பதில்லை!

ஒரு சில சொட்டு ரத்தத்தைப் பரிசோதித்து, இவ்வகைகளை சுலபமாகக் கண்டு பிடித்து விடலாம், ஒரு ஆய்வுக்கூடத்தில்!
உங்கள் வகைப் பிரிவு இன்னது என்பதை ஒவ்வொருவரும் அறிந்து வைத்திருக்க வேண்டியது மிகவும் அவசியம்.
தனது குரூப் இன்னது எனத் தெரியாதவர்கள், இப்பதிவைப் படித்ததும், மறக்காமல் சென்று, உங்கள் மருத்துவரிடம் சொல்லி, உடனே பரிசோதித்துக் கொள்ளவும்!!

இந்த குரூப் சமாச்சாரம் நமது மரபணுக்களில் [genes] உள்ள ஒரு குரோமோஸோமில் [Chromosome 9] பதிந்திருப்பதால், உங்கள் குரூப் எப்போதும், எந்த நிலையிலும் மாறாத ஒன்று!!
பிறந்தது முதல், மரிக்கும் வரை சாதி மாறாது!

மாற்று வகைப்பிரிவுகள் உள்ள தம்பதியர்க்குப் பிறக்கும் குழந்தைகளின் பிரிவு[Genetic Inheritance] எப்படி நிர்ணயிக்கப்படுகிறது என்பது, இப்பதிவிற்குச் சற்று அதிகம் என்பதால் தவிர்க்கிறேன்.
வேண்டுமென்பவர் கேட்டால், பின்னூட்டத்தில் பார்க்கலாம்.

இன்னொரு முக்கியமான விஷயம்!

ஒரு சில பிரிவுகள், குறிப்பிட்ட சில நோய்களால் அதிகமாகப் பாதிக்கப்பட வாய்ப்புகள் இருக்கிறது!

உதாரணமாக, 'ஏ' குரூப் மக்கள் அம்மை நோய், தொண்டைகுழாய்[Oesophagus],கணையம்[pancreas],வயிறு [Stomach] புற்றுநோய் இவற்றால், மற்ற வகையினரை விட அதிகமாகப் பாதிக்கப்படலாம்.

குடல்[வயிற்றுப்] புண்[Peptic Ulcer]காலரா,[Cholera] ப்ளேக் [Plague], மலேரியா[Malaria] முதலிய நோய்கள் 'ஓ' குரூப்பினரை அதிகமாய்த் தாக்கும்.

அடுத்த பதிவில், தாயே தன் கருவை எப்படி, தான் ஒன்றுமே செய்யாமல், அழிக்கிறார்[??!!] என்பதைப் பார்ப்போம்!

[இதில் கூறியிருக்கும் கருத்துகள், முழுக்க, முழுக்க மருத்துவ சம்பந்தமானவையே! மேல்விவரத்திற்கு உங்கள் மருத்துவரை அணுகவும்!]